သျှမ်းပြည် တောင်ပိုင်း နမ့်စန်မြို့နယ်အတွင်း SSSG – PDF နှင့် အိမ်စောင့်တပ်တို့ အကြား တိုက်ပွဲ ဖြစ်ပွါးခဲ့ကြောင်း SSSG-PDF ၏ FB Page တွင်း သတင်းထုတ်မှုအပေါ် စစ်မှန်သည့် လူထု ကာကွယ်ရေးတပ် PDF အတွက် ထိခိုက်သည်ဟု ပြောပါသည်။
သြဂုတ်လ ၉ ရက်နေ့ ညနေပိုင်း ၅ နာရီ ၃၇ မိနစ်အချိန်ခန့်တွင် သျှမ်းပြည် တောင်ပိုင်း နမ့်စန် မြို့ အနီး အမြန်လမ်းမကြီးအတိုင်း မောင်းနှင်လာသော စစ်ကောင်စီ၏ ဗိုလ်ကြီး တစ်ဉီးနှင့် တပ်သားနှစ်ယောက်ပါသည့် ကားတစ်စီးကို ခြုံခိုတိုက်ခိုက်ရာ စစ်ကောင်စီဘက်မှ ၃ ဉီး စလုံးသေ ဆုံးပြီး စစ်သားကျောပိုးအိတ်နှစ်လုံးနှင့် ၎င်းတို့ ကိုင်ဆောင်လာသည့် သေနတ်များ သိမ်းဆည်းရမိ ကြောင်း SSSG-PDF မှ ၎င်းတို့ လူမှုကွန်ယက်စာမျက်နှာတွင် တင်ထားသည်။
“တကယ်ပဲ အလုပ်လုပ်တယ် ၊ အလုပ်ဖြစ်တယ်ဆိုရင်တော့ ကောင်းတာပေါ့၊ ဒါပေမယ့် PDF ကို နာမည်ခံ ပြီး Proxy လုပ်နေတာက အဆင်မပြေဘူး၊ တခြား အလုပ်တကယ်လုပ်တဲ့ PDF တွေ ထိခိုက်မှာ” ဟု သျှမ်း-ကယားနယ်စပ် လှုပ်ရှားသည့် PDF တပ်ဖွဲ့ဝင်တဉီးက ပြောသည်။
SSSG – PDF တပ်ဖွဲ့ကို မည်သူဦးဆောင်တည်ထောင်ခြင်း၊ မည်သည့်လူငယ်များပါဝင်ထားခြင်း သေချာ မသိရှိရသည့်အပြင် ယခု လုပ်ရပ်များသည် အမှန်တကယ် လုပ်ဆောင်ချက်များ မဟုတ်ပါက မြေပြင်တွင် တကယ်လှုပ်ရှားနေသည့် တခြား PDF များအတွက် အခက်အခဲရှိလာကြောင်းလည်းပြောသည်။
သျှမ်းပြည်တောင်ပိုင်းမျိုးဆက်သစ် လူထုကာကွယ်ရေးတပ်- SSSG-PDF မြေပြင် စစ်ဆင်ရေးမှူး ဆိုသူ စိုင်းနော်ခမ်း က ခြုံခိုတိုက်ပွဲ အမှန်ဆင်နွဲကြောင်း၊ လုံခြုံရေးအရ နေရာအတိကျ ပြောရန် မဖြစ်နိုင်သေး ကြောင်း သျှမ်းသံတော်ဆင့်သို့ပြောသော်လည်း နမ့်စန်ဒေသခံများက သြဂုတ်လ ၉ ရက်နေ့ အတွင်း မည့်သည့်တိုက်ပွဲသတင်း နှင့် သေနတ်သံလုံးဝ မကြားရကြောင်း သျှမ်းသံတော်ဆင့်အား ပြောသည်။
ဇူလိုင်လ ၁၅ ရက်နေ့တုန်းကလည်း ကျေးသီးမြို့နယ် မိုင်းနောင်ခွဲအတွင်း PDF နှင့် အာဏာသိမ်းတပ် တို့ကြား တိုက်ပွဲ တစုံတရာမရှိဘဲ မိုင်းနောင်- ဒူယား လမ်းပိုင်းတွင် သျှမ်းပြည်လွတ်မြောက်ရေးပါတီ သျှမ်းပြည် ဖက်ဒရယ်တပ်ဉီး SSLP-SSFF နှင့် အာဏာသိမ်းစစ်တပ် အကြား တိုက်ပွဲ အပြင်းအထန်ဖြစ်ပွားသည်ဆိုသည့် သတင်းထုတ်ပြန်ခဲ့ပါသေးသည်။
