သျှမ်းပြည်မြောက်ပိုင်း နမ့်လန်မြို့တွင် လျှပ်စစ်ဝန်အားကို လျှော့ချလိုက်သောကြောင့် လျှပ်စစ်မီးကို အားကိုးပြီး အလုပ်လုပ်သည့်သူများ ဝင်ငွေထိခိုက်လာမည်ကို စိုးရိမ်နေကြောင်း စုံစမ်းသိရသည်။

ယနေ့ (နိုဝင်ဘာ ၇ ရက်) မှစပြီး လကုန်အထိ လျှပ်စစ်ဝန်အားကို မနက် ၆ နာရီမှ ၉ နာရီ ၊ ည ၃ နာရီမှ ၆ နာရီ အထိ မီးပိတ်သွားမည်ဖြစ်ကြောင်း နမ့်လန်မြို့ လျှပ်စစ်မှူးရုံးက ယနေ့ ထုတ်ပြန်ခဲ့သည်။

လျှပ်စစ်မီးဖြင့် အလုပ်လုပ်သည့် ဆန်စက်၊ ကွန်ပျူတာ ဆိုင်များက အလုပ်လုပ်ရန် ခက်ခဲလာပြီး ဝင်ငွေ ထိခိုက်လာနိုင်ကြောင်း သိရသည်။

“ဝင်ငွေတော့ ထိခိုက်လာနိုင်တာပေါ့။ မီးစက်နိုးရင်လည်း ပတ်ဝန်းကျင်ကို အားနာရတယ်လေ။ ပြီးတော့ ဆီဈေးကကြီးတော့ သူများကို ဈေးအများယူတော့လည်း မရပြန်ဘူး။ အလုပ်ကို ပုံမှန်မလုပ်ရဘူး။ ပြီးချိန်တန် မပြီးတော့ဘူး” ဟု နမ့်လန်မြို့ ဓာတ်ပုံ ဆရာတစ်ဦးက ပြောသည်။

ထိုအပြင် ယခင်က NLD အစိုးရ နှင့် လက်ရှိ နိုင်ငံရေး ရှုပ်ထွေးချိန်တွင် ဝင်ငွေ ထက်ဝက်စီ ကွာခြားကြောင်း သိရသည်။

“ အခုကတော့ ဝင်ငွေကို ပုံမှန်တွက်ပြလို့မရဘူး။ အလုပ်က ပုံမှန်မလုပ်ရဘူး။ အရင်က နိုင်ငံရေးကောင်းချိန်နဲ့ အခုနိုင်ငံရေး အခြေနေနဲ့ဆိုရင် ဝင်ငွေက မိုးနဲ့ မြေကွာခြားတယ်။ အရင်က ၁ သောင်းနဲ့ဈေးဆိုရင် အခုက ၃ သောင်းလောက်မှ ရတော့တယ်” ဟု အထက်ပါ ဓာတ်ပုံဆရာက ပြောသည်။

လက်ရှိ နမ့်လန်မြို့သည်လည်း နိုဝင်ဘာလ ကစပြီး မီးပုံမှန် မလာကြောင်း သိရသည်။

“ မီးပျက်တာ ၂ ရက် ၃ ရက်ရှိနေပြီ။ ဒီနေ့မှ သူတို့ထုတ်ပြန်တာ။ မီးပျက်တော့ ကျနော်တို့ အလုပ်မဖြစ်ဘူးပေါ့။ ပြီးသင့်တဲ့ အလုပ်တွေလည်း မပြီးတော့ဘူး။ ကျနော်တို့ဆို ကွန်ပျူတာနဲ့ အလုပ်လုပ်ရတာ။ အင်တာနက်တွေလည်း မီးမလာရင် မရတော့ဘူး” ဟု ရုံးဝန်ထမ်းတစ်ဦးက ပြောသည်။

အလားတူ လျှပ်စစ်အားကို အသုံးပြုပြီး အလုပ်လုပ်သည့် ဆန်စက်များသည် အလုပ်ပုံမှန်မပြီးဘဲ အချိန်ကြာနေကြောင်း သိရသည်။

“ အခုချိန်တော့ စပါးလာကြိတ်တဲ့ သူတွေ သိပ်မရှိသေးဘူး။ စပါးရိတ်နေသေးတယ်ဆိုတော့လေ။ ဒါမယ့်လည်း မီးပျက်တော့ အလုပ်မလုပ်ရဘူးပေါ့။ မီးစက်သုံးရင်လည်း ပိုက်ဆံပိုကုန်တယ်။ ဆီဈေးက တက်နေတယ်” ဟု ဆန်စက်ပိုင်ရှင်တစ်ဦးက ပြောသည်။

ယနေ့ နမ့်လန်မြို့ ဓာတ်ဆီ ကာလပေါက်စျေးမှာ တစ်လီတာကို ၂,၅၀၀ ကျပ် မှ ၂,၆၀၀ ကျပ် အထိဈေးရှိနေကြောင်းသိရသည်။

ထိုအပြင် နမ့်လန်မြို့ လျှပ်စစ်မီးသည် လျှပ်စစ်မှူးရုံးတို့ သတ်မှတ်ထားသည့် အချိန်အတိုင်း ပုံမှန်လာခြင်း မရှိကြောင်း ဒေသခံများ ပြောပြချက်အရ သိရသည်။

အဆိုပါ လျှပ်စစ်မီး ဝန်လျှော့ရခြင်းသည် ရွှေလီမြစ်မှ လျှပ်စစ်မီးထုတ်လုပ်မှု မလုံလောက်သောကြောင့် မီးဝန်အားကို လျှော့ချရကြောင်း နမ့်လန်မြို့ လျှပ်စစ်ဖြန့်ဖြူးရေး တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ သူတို့ လျှပ်စစ်မီး ထုတ်လုပ်မှု မလုံလောက်လို့ မီးကို အချိန်ပြည့် မပေးနိုင်တော့တာ။ ရွှေလီကနေ လျှပ်စစ်ထုတ်လုပ်ပေးတာက နည်းလာတာကြောင့် ကျနော်တို့ ဒီမြို့တွေကို လျှပ်စစ်ပေးမှု နဲ့လျော့ချရတာ။ အထက်က လျှော့ချခိုင်းတဲ့အတိုင်းလျှော့ချပေးရတာပါ။ ဒီလကုန်ရင်တော့ နောက်လကျရင် ပုံမှန် ပြန်ရမယ်ထင်တာပဲ” ဟု ၎င်းက ပြောသည်။

စစ်ကောင်စီက အာဏာသိမ်းပြီး နောက်ပိုင်း သျှမ်းပြည်အတွင်းမှာ မြို့နယ်တိုင်း အားလုံးနီးပါးကို မီးဖြတ်တောက် နေလျက်ရှိကြောင်း သိရသည်။