သျှမ်းပြည်တောင်ပိုင်း တောင်ကြီးမြို့နယ် အေးသာယာမြို့တွင် မိုးသည်းထန်ရွာသွန်း၍ ကလေးတစ်ဦး ရေစီးချောင်းထဲ မျောပါပြီး သေဆုံးသွားကြောင်း စုံစမ်းသိရှိရသည်။
ယမန်နေ့ နိုဝင်ဘာ ၅ ရက် ညနေ ၃ နာရီဝန်းကျင်တွင် အေးသာယာမြို့၊ မြို့ဉီး ရပ်ကွက်နေ သားအမိ ၃ ဦးသည် ရေချောင်းအနီးတွင် ရှိနေစဉ် တောင်ကျချောင်းရေက အရှိန်အဟုန်ဖြင့် စီးဆင်းလာပြီး ကလေးတစ်ဦးမှာ ရေစီးချောင်းထဲသို့ မျောပါသွားကြောင်း အေးသာယာ ဒေသခံ အသက် ၂၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကလေးက ချောင်းထဲမှာ ရေဆော့ ကစားနေတုန်း တောင်ကျ ချောင်းရေက အရှိန်နဲ့ဆင်းလာပြီး ကလေးက ရေထဲကိုပါသွားတာ။ သူ့အစ်မ နဲ့ အမေက လိုက်ဆယ်ရင်း ချောင်းထဲကို ပြုတ်ကျသွားပြီး ၃ ယောက်စလုံးက ရေထဲကိုမျောပါသွားတယ်။ ကလေးကတော့ မနေ့က အေးသာယာဆည်မှာ အလောင်းပြန်တွေ့တယ်။ ဒီမနက်ထိ သူ့ အစ်မနဲ့ အမေကိုတော့ ပြန်မတွေ့သေးဘူး “ ဟု ၎င်း ဒေသခံတစ်ဦးက ပြောသည်။
ယမန်နေ့ နေ့လည် ၂ နာရီ ဝန်းကျင်တွင် စတင်ပြီး တောင်ကြီးမြို့ပေါ်တွင် မိုးသည်းထန်စွာ ရွာသွန်းခဲ့ပြီးနောက် နေ့လည် ၄ နာရီဝန်းကျင်ထိ ဆက်လက်ရွာသွန်းခဲ့ကြောင်း သိရသည်။
ထို့အပြင် တောင်ကြီးမြို့ပေါ်တွင် မိုးသည်းထန်ရွာသွန်းပြီးလျှင် အေးသာယာမြို့ရှိ သစ်ပင်ထောင်ရပ်ကွက် နှင့် မကျီးပင်ရပ်ကွက် စသည့် ရပ်ကွက်များတွင် ချောင်းရေများ လျှံပြီး နေအိမ်အတွင်းထိ ရေများ စီးဝင်ခဲ့ကြောင်း သစ်ပင်ထောင် ရပ်ကွက်နေ ဒေသခံ တစ်ဦးက ပြောသည်။
“ တောင်ပေါ်က မိုးတအားကြီးရင် ကျနော်တို့ဘက် ရပ်ကွက်က ချောင်းရေတွေ လျှံတယ်။ တစ်ခါတစ်လေ ချောင်းရေလျှံထွက်ပြီး နေအိမ်ထဲကို စီးဝင်တယ်။ တောင်ပေါ်မှာ မိုးတအားရွာရင်တော့ စိုးရိမ်ရတယ်။ တောင်ပေါ်မှာ ရေကြီးရင် ကျနော်တို့ အေးသာယာမှာ ပိုခံရတယ်လေ။ အခုက ရာသီဥတု မမှန်တော့ဘူး ဆောင်းရာသီဝင်နေပြီ မိုးကရွာနေသေးတယ် “ ဟု ၎င်း ဒေသခံတစ်ဦးက ပြောသည်။
ယခုနှစ် မိုးရာသီ ကာလတွင် ရာသီဥတု ပြောင်းလဲမှု နှင့် သစ်တောများ ပြုန်းတီးမှုကြောင့် သျှမ်းပြည်အတွင်း ယခင်နှစ်ထက် ရေကြီးမှု ပိုမိုဖြစ်လာကြောင်း သျှမ်းပြည်တွင်း သဘာဝ ပတ်ဝန်းကျင်ဆိုင်ရာ အဖွဲ့များကပြောသည်။
Leave a Comments