ကချင်ပြည် မိုးမောက်မြို့နယ် လုံဂျာရွာ နှင့် နောင်ပေါင်းကျေးရွာတွင်း စစ်ကောင်စီ တပ်ရင်း (၈၈) က တပ်စွဲနေထိုင်ထားခြင်းကြောင့် နေအိမ် မီးရှို့ခံရမည်ကို စစ်ရှောင်များက စိုးရိမ်နေကြောင်း စုံစမ်းသိရသည်။
ပြီးခဲ့သည့် အောက်တိုဘာ ၃၁ ရက်မှစပြီး ယနေ့ထိ စစ်ကောင်စီတပ်ရင်း (၈၈)က စစ်ကား၂ စီး နှင့် စစ်အင်အား ၄၀ ကျော်သည် ကျေးရွာအတွင်းရှိ ကားလမ်းမပေါ်၊ ပြည်သူ၏ နေအိမ်၊ အဆောက်အဦးထဲတွင် တပ်စွဲ နေထိုင်ခြင်းကြောင့် နေအိမ် မီးရှို့ခံရမည်ကို စိုးရိမ်နေကြောင်း အသက် (၃၀) နှစ် စစ်ရှောင် အမျိုးသား တစ်ဦးက သျှမ်းသံတော်ဆင့် ကိုပြောသည်။
“ ရွာမှာ စစ်ကောင်စီတပ်စွဲထားတာ ၃ ရက်လောက်ရှိပြီ။ စစ်ရှောင်လာတဲ့ တချို့ပြည်သူတွေက အခုအိမ်မှာ အိမ်စောင့်ပေးမယ့်သူ မရှိဘူး။ တချို့စစ်ရှောင်တွေက အိမ်မှာ ၃ ယောက်ပဲရှိရင် အကုန်ထွက်ပြေး လာရတယ်လေ။ စစ်တပ်က ညဘက်ရောက်လာပြီဆိုရင် ရွာထဲဝင်ပြီး မနက် မိုးလင်းတဲ့အချိန်ထိ နေတယ်။ နေ့ဘက်ဆိုရင်း စစ်အင်အားတွေခွဲပြီး ကားလမ်းမပေါ်မှာ စောင့်နေကြတယ်။ ကျနော် စိုးရိမ်တာတော့ စစ်တပ်တွေက အိမ်မီးရှို့တာ၊ နေအိမ်ကို ဖျက်စီးသွားမှာကို စိုးရိမ်နေတယ် “ ဟု ၎င်း ကော်မတီဝင်တစ်ဦးက ပြောသည်။
လက်ရှိ အချိန်ထိ စစ်ကောင်စီ တပ်ရင်း (၈၈) က ကျေးရွာထဲတွင် တပ်စွဲနေထိုင်ထားဆဲဖြစ်ပြီး တိုင်းရင်းသား လက်နက်ကိုင် တပ်ဖွဲ့များ နှင့် နှစ်ဖက်အပြန်အလှန် တိုက်ပွဲထပ်မံ ဖြစ်ပွားမည်ကို စိုးရိမ်နေကြောင်း ၎င်းကဆက်ပြောသည်။
ထို့အပြင် တိုက်ပွဲအတွင်း ထွက်ပြေးတိမ်းရှောင်ရသော စစ်ရှောင်ဦးရေ ၆၅၀ ကျော်သည် လက်ရှိမှာ မြို့ပေါ်ရှိ ဘုန်းကြီးကျောင်းအချို့တွင် စစ်ရှောင်နေရပြီး နေရပ်သို့ မပြန်နိုင်သေးကြောင်း စစ်ရှောင်ကော်မတီဝင် တစ်ဦးက ပြောသည်။
“ ကျနော်တို့ စစ်ရှောင်တွေက ချမ်းမြေ့ဘုန်းကြီးကျောင်း နဲ့ မြို့ပေါ်က တချို့ဘုန်းကြီးကျောင်းမှာ စစ်ရှောင်နေတယ်။ ရွာမှာက စစ်ကောင်စီ တပ်စွဲထားတယ်ဆိုတော့ ကျနော်တို့ ပြန်သွားရင် ဘာဖြစ်မယ် ဆိုတာ မသိဘူး။ တိုက်ပွဲထပ်ဖြစ်ရင်လည်း ကျနော်တို့က ထပ်ပြီး ထွက်ပြေးလာရမယ်။ အခုတော့ စစ်ရှောင်ထားပြီး စားနပ်ရိက္ခာတွေ စုဆောင်းထားရတယ်။ စားနပ်ရိက္ခာတွေက အချိန်ကြာရင်တော့ စိတ်ပူရတယ် “ဟု ၎င်း စစ်ရှောင် အမျိုးသားတစ်ဦးက ပြောသည်။
ပြီးခဲ့သည့် အောက်တိုဘာလ ၂၀ ရက်မှစပြီး စစ်ကောင်စီ တပ်ရင်း (၈၈) နှင့် ကချင် လွတ်လပ်ရေး တပ်မတော် KIA နှင့် ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့ တိုက်ပွဲပြင်းထန်ပြီး စစ်တပ်ဘက်မှ လက်နက်ကြီးဖြင့် ပစ်ခတ်ကာ အမျိုးသမီး ၂ ဦး သေဆုံးခဲ့ရပြီး အမျိုးသမီး ၄ ဦး ဆေးဝါး ကုသခံနေရကြောင်း သိရသည်။
Leave a Comments