သျှမ်းပြည်မြောက်ပိုင်း ကျောက်မဲမြို့နယ်အတွင်းရှိ စစ်ဘေးရှောင်များ၏ ကလေးငယ်များ ပြုစုပျိုးထောင်ရေး အတွက် သျှမ်းမူကြိုကျောင်း ဖွင့်လှစ်မည် ဖြစ်ကြောင်း သတင်း သိရသည်။

ကျောက်မဲမြို့နယ် ရှမ်းစာပေ နှင့် ယဥ်ကျေးမှုအသင်းမှ ဦးဆောင်ကာ လာမည့် နိုဝင်ဘာလ ၁၃ ရက်တွင် မူကြိုကျောင်း စတင်ဖွင့်လှစ်မည်ဖြစ်ပြီး စစ်ရှောင် ကလေးများ သိသင့်သိထိုက်သည့် အသိပညာများရရှိရန် ရည်ရွယ်ပြီး ဖွင့်လှစ်ခြင်းဖြစ်ကြောင်း ရှမ်း/စာယဥ် ဥက္ကဌ လုံးစိုင်းလျန်းဟန်က သျှမ်းသံတော်ဆင့်ကို ပြောသည်။

“မူကြိုကလေးတွေ နဲ့ သင့်လျော်တဲ့ နေထိုင်စားသောက်မှုတွေ၊ ဘာသာစကားနဲ့ဆိုင်တဲ့ ယာဥ်ကျေးမှုတွေ၊ ပြီးတော့ ရိုးရာအမွေအနှစ် နဲ့ ကဗျာတွေ၊ ဘုရားစာတွေကို စာသင်တဲ့ သဘောမျိုးမဟုတ်ပဲ သရုပ်ပြ နဲ့ နှုတ်တိုက်သင်ပေးဖို့ပါ၊ ရှမ်းစာပေယဥ်ကျေးမှုကိုပဲ အခြေခံပြီးတော့ သင်ကြားမှု ပြုမှာပါ”ဟု လုံးစိုင်းလျန်းဟန်က ဆက်ပြောသည်။

ရှမ်း စာ/ယဥ်မှ ဦးဆောင်ဖွင့်လှစ်သည့် ရှမ်းမူကြိုကျောင်းသည် အသက် ၃ နှစ်မှ ၆ နှစ်အထိ ကလေးဦးရေ ၂၅ ဦး ဝန်းကျင်ရှိပြီး ဆရာမနှစ်ဦးဖြင့် ဖွင့်လှစ်မည်ဖြစ်ကြောင်း နှင့် ယင်းကဲ့သို့ မူကြိုကျောင်းဖွင့်လှစ်ပေးနိုင်ခြင်းသည် စစ်ရှောင်စခန်းမှ မိဘများ လုပ်ကိုင်စားသောက်ရေး အဆင်ပြေရန် အတွက်လည်း အထောက်အကူပြုကြောင်း လုံးစိုင်းလျန်းဟန်က ဆက်ပြောသည်။

“ကလေးတွေကို မူကြိုကျောင်းပို့ထားရင် မိဘတွေက နေ့စားထွက်လုပ်တာတွေ၊ အပိုဝင်ငွေ ရှာတာတွေ လုပ်နိုင် တယ်၊ ကလေးတွေကို အထိန်းမရှိပဲ Camp မှာပဲ ထားထားရင် စိတ်မချရဘူးလေ၊ ဒါကြောင့် ဒီမူကြိုကျောင်းရှိ လာ ရင် ကလေးထိန်းဖို့လည်း မလိုတော့ အပြင်ထွက် ငွေရှာနိုင်တယ်၊ စားရေးသောက်ရေးအဖို့ အဆင်ပြေ လာနိုင် တယ်” ဟု လုံးစိုင်းလျန်းဟန်က ဆက်ပြောသည်။

ကျောက်မဲမြို့ရောက် စစ်ရှောင်ကလေးများသည် နိုင်ငံရေး မငြိမ်သက်မှုများကြောင့် တစ်နှစ်ကျော်နီးပါး ကျောင်း နားထား ရပြီးနောက် ယခုနှစ်တွင် အသက် ၇ နှစ်အထက် ကလေးများက ခိုအုံကျေးရွာရှိ အစိုးရမူလတန်း ကျောင်းသို့ သွားရောက် ကျောင်းတက်နေကြောင်း သိရသည်။

ရှမ်း စာ/ယဥ်မှ ဖွင့်လှစ်သည့် သျှမ်းမူကြိုကျောင်းသည် တခြား Camp မှ စစ်ရှောင်ကလေးများကိုလည်း လက်ခံနိုင် အောင် ကြိုးစားသွားမည်ဖြစ်ပြီး လက်ရှိမှာတော့ မူကြိုကျောင်း ဆရာမ ၂ ဦးအတွက် လစာအဖြစ် တစ်ယောက်စီကို တစ်လ ၁ သိန်းနှုန်းဖြင့် လစဥ်ပေးအပ်သွားနိုင်ရေးအတွက် အကူအညီလိုအပ် နေကြောင်းလည်း သတင်းသိရသည်။

ပြီးခဲ့သည့် ၂၀၂၁ ခုနှစ် နောက်ပိုင်း ကျောက်မဲမြို့နယ်အတွင်း ပြင်းထန်လာသည့် သျှမ်းပြည် ပြန်လည် ထူထောင်ရေးကောင်စီ (RCSS/SSA) နှင့် မြောက်ပိုင်းမဟာမိတ်တို့၏ တိုက်ပွဲကြောင့် ကျောက်မဲမြို့နယ် အတွင်းမှ ကျေးရွာ ၂၈ ရွာ၊ စစ်ရှောင်ဦးရေ ၅,၀၀၀ နီးပါးတို့က နေရပ်စွန့်ခွာပြီး လက်ရှိအချိန်ထိ စစ်ဘေးရှောင်နေရသည်။