သျှမ်းပြည်မြောက်ပိုင်းအတွင်း ကချင်လွတ်မြောက်ရေး တပ်မတော် KIA အမည်ခံပြီး အခွန်ကောက်တောင်းဆိုမှု များကို သတိထား စီစစ်ကြရန် တပ်ဖွဲ့ပြောရေး ဆိုခွင့် ဗိုလ်မှူးကြီး နော်ဘူ က ပြောဆိုလိုက်သည်။

စစ်တပ်မှ နိုင်ငံတော် အာဏာသိမ်းတစ်နှစ်ကျော်ကြာလာပြီးနောက် သျှမ်းပြည်မြောက်ပိုင်း တန့်ယန်းမြို့နယ် အတွင်း၌ KIO/KIA အမည်ခံကာ အခွန်တောင်း ဆက်ကြေးကောက်ခံမှုများ ရှိနေခြင်းနှင့် ပတ်သက်ပြီး သျှမ်းသံတော်ဆင့်မှ ဆက်သွယ်မေးမြန်းရာတွင် KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောလိုက်ခြင်းဖြစ်သည်။

“တန့်ယန်းမြို့ဆိုတာ ကျနော်တို့နဲ့ အရမ်းအလှမ်းဝေးတဲ့ ဒေသဖြစ်တဲ့အတွက် KIO/KIA အမည်နဲ့ ဆက်ကြေး ကောက်တဲ့ ကိစ္စက ဖြစ်စဥ်အသေးစိတ်ကို ကျနော်မသိရှိရသေးဘူး၊ ဒါပေမဲ့ KIO/KIA အမည်ခံပြီး လုပ်စားနေ တယ်လို့ပဲ မြင်တယ်၊ အဲ့ဒီနေရာမှာ ကျနော်တို့တပ်ဖွဲ့မရှိဘူး၊ ပြည်သူတွေ အဓိကထား စီစစ်ဖို့ လိုအပ်တယ်” ဟု ဗိုလ်မှူးကြီး နော်ဘူက ပြောသည်။

ပြီးခဲ့သည့် နိုဝင်ဘာလ ၁ ရက် ညပိုင်းတွင် KIO/KIA အမည်ခံပြီး တန့်ယန်းမြို့ပေါ်ရှိ စိန်ပန်းပန့်ဆီဆိုင် အပါအဝင် တခြားစတိုးဆိုင်များကို ဖုန်းဆက်ကာ အခွန်ငွေ ပေးဆောင်ရန် ခြိမ်းခြောက်တောင်းဆိုမှု ရှိခဲ့ကြောင်း သိရသည်။

“ဖုန်းဆက်လာပြီးKIO/KIA အခွန်ဌာနက ဖြစ်တယ်၊ ပန့်ဆီဆိုင်အတွက် အခွန်ကျပ် သိန်း ၅၀ ပေးရမယ်ဆိုပြီး အဲ့ဒီ ဖုန်းနံပါတ်နဲ့ပဲ Viber ကနေ အခွန်ပြေစာတွေပို့လာတယ်၊ ပန့်ဆီဆိုင်တွေဆို သိန်း ၅၀၊ စတိုးဆိုင်တွေဆို ၁၀ သိန်း တဲ့၊ Kpay နဲ့ လွဲပေးရမယ် မဟုတ်ရင် သူတို့လူကိုယ်တိုင် လာတောင်းတဲ့အချိန် ဒီထက်ပိုများသွားနိုင်မယ် ဆိုပြီး ခြိမ်းခြောက်သွားတယ်” ဟု အမည်မဖော်လိုသူ တန့်ယန်းမြို့ခံအမျိုးသားက ပြောသည်။

လက်ရှိတွင် အခွန်ပေးဆောင်ရန်အတွက် KIO/KIA အမည်ခံအဖွဲ့မှ ခြိမ်းခြောက် ပိုက်ဆံတောင်းခြင်းကို ခံရသည့် တန့်ယန်းမြို့ပေါ်မှ ပြည်သူများသည် ပန့်ဆီဆိုင် ပိုင်ရှင် ၃ ဦးထက်မနည်းရှိနေပြီး စတိုင်းဆိုင်ပိုင်ရှင်များလည်း ရှိနေကြောင် စုံစိမ်းသိရသည်။

လက်ရှိတွင် တန့်ယန်းပြည်သူများအနေဖြင့် KIO/KIA အမည်ခံ အဖွဲ့မှ ခြိမ်းခြောက် အခွန်ဆောင်ခိုင်းသည့် ကိစ္စနှင့် ပတ်သက်ပြီး ဒေသအတွင်းရှိ SSPP/SSA နယ်မြေတာဝန်ခံ အရာရှိကို အကျိုးကြောင်းတင်ပြ ထားကြောင်း သိရသည်။

ရှမ်းပြည် တိုးတက်ရေးပါတီ/ရှမ်းပြည်တပ်မတော် (SSPP/SSA) ပြောရေးဆိုခွင့် ဗိုလ်မှူးဖုန်းဟန်က ၎င်းတို့ ထိန်းချုပ်နယ်မြေဖြစ်သည့် တန့်ယန်းမြို့နယ်အတွင်း KIO/KIA မှ လာရောက်အခွန် ကောက်ရန် မဖြစ်နိုင်ကြောင်း သျှမ်းသံတော်ဆင့်ကို ပြောသည်။

“ကျနော်တို့မှာ မဟာမိတ် မူဆိုတာရှိတယ်၊ ဒါကြောင့် အခုတန့်ယန်းမြို့နယ်ထဲကို KIO/KIA ရောက်လာတာ မကြား မိဘူး၊ ဒါကြောင့် အခုအခွန်ဆောင်ဖို့ ပြောတဲ့အဖွဲ့က တပ်ဖွဲ့နာမည်ကို အလွဲသုံးစားလုပ်ပြီး လိမ်စားနေတာလို့ မြင် တယ်၊ တကယ်လို့ KIO/KIA က လာတယ်ဆိုရင်လည်း ကျနော်တို့လက်မခံနိုင်ဘူး၊ သူတို့က ဒီတန့်ယန်းနယ်ထဲကို အခွန်ကောက်ဖို့အကြောင်းမရှိဘူး” ဟု ဗိုလ်မှူးဖုန်းက ပြောသည်။

ယင်းဖြစ်စဥ်နှင့် ပတ်သက်ပြီး ခြိမ်းခြောက်ငွေတာင်းခံရသည့် တန့်ယန်းမြို့နယ်မှ အမျိုးသမီးတစ်ဦးက ဖုန်းဆက် လာသူသည် ကချင်သံမဟုတ်သည့်အတွက် KIO/KIA တပ်ဖွဲ့ဖြစ်သည်ကို အတည်ပြုရန်ခက်ခဲကြောင်း သျှမ်းသံတော်ဆင့်ကို ပြောသည်။

“ငွေတောင်းနေတဲ့အသံက ကချင်အသံမဟုတ်ဘူး၊ လူလိမ်တွေလို့ထင်တယ်၊ တန့်ယန်းမြို့ပေါ်မှာ KIA လာစရာ အကြောင်းမရှိဘူး၊ လူထုက ဘယ်သူ့ကိုအားကိုးရမလဲမသိတော့ဘူး၊ လုံခြုံမှုကိုမရှိဘူး” ဟု အထက်ပါ အမျိုးသမီး က ပြောသည်။

KIO/KIA အမည်ခံပြီး အခွန်ကောက်ခံ တောင်းယူခြင်းသည် ကောင်းသည့် ကိစ္စရပ်မဟုတ်သည့်အတွက် လူမျိုးရေးပြဿနာများလည်း ဖြစ်လာနိုင်သဖြင့် ပြည်သူများ အထူးဂရုစိုက်ရန်နှင့် လက်ရှိတွင် KIO/KIA တပ်ဖွဲ့မှလည်း စီစစ်မှုများ ပြုလုပ်နေကြောင်း ဗိုလ်မှူကြီး နော်ဘူက ပြောသည်။

“ဒီလိုလုပ်တာတော့ မကောင်းဘူးပေါ့၊ အဖွဲ့အစည်းကို တိုက်ခံချင်လို့လား၊ ကိုယ်ကျိုးအကျိုးစီးပွား ရှာချင်တာ လား ဒီလိုမလုပ်သင့်ဘူး၊ ရှေ့တန်းမြေပြင်မှာ ရှိတဲ့ ကျနော်တို့တာဝန်ရှိသူက စီစစ်မှုတွေလုပ်နေတယ်၊ ပြည်သူ တွေ မီဒီယာတွေကိုလည်း ပူးပေါင်းကူညီပေးစေချင်တယ်” ဟု ဗိုလ်မှူးနော်ဘူက ပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက်တွင် နိုင်ငံရေး မတည်ငြိမ်မှုများဖြစ်ပေါ်လာပြီး သျှမ်းမြောက်တွင် တိုင်းရင်းသားလက်နက်ကိုင်တပ်ဖွဲ့ ပေါင်းများစွာ တည်ရှိနေပြီး လက်နက်ကိုင်တပ်ဖွဲ့အားလုံးကို ဆက်ကြေး (အခွန်ဆောင်)နေရသဖြင့် ပြည်သူများအတွက် ဝန်ထုတ်ပိုကြီးနေကြောင်း သိရသည်။