သျှမ်းပြည် တောင်ပိုင်း အောင်ပန်းမြို့ ပြည်သာယာစျေးအနီးရှိ လွယ်မယ်အတက်လမ်းဘေးတွင် လဲကျပြီး သေဆုံးနေသည့် ပိုင်ရှင်မဲ့ အလောင်းမှ ကိုဗစ်ရောဂါပိုး စစ်ဆေးတွေ့ရှိကြောင်း သတင်းသိရသည်။
ယမန်နေ့ (နိုဝင်ဘာလ ၁) ရက်နေ့ မနက်ပိုင်း ၁၀ နာရီဝန်းကျင်တွင် ပြည်တော်သာဈေးအနီး လဲကျသေဆုံးနေသည့် ပိုင်ရှင်မဲ့ ရုပ်အလောင်းတွေ့ရှိရကြောင်း ဒေသခံများ ဖုန်းဆက်လာသဖြင့် အောင်ပန်းမြို့ နာရေးကူညီမှုအသင်းမှ သွားရောက်သယ်ဆောင်ခဲ့ရကြောင်း သိရသည်။
“မနေ့က ၁၀ နာရီလောက်မှာ အလောင်းတစ်လောင်း တွေ့တယ်ဆိုပြီး ကျနော်တို့ကို ဖုန်းဆက်အကြောင်းကြား လာလို့ အလောင်း ကို သွားသယ်ပေးရတယ်၊ ဆေးရုံကို ပို့ပေးတဲ့အချိန် ဆေးရုံက Covid-19 ရှိမရှိ Tests/kit နဲ့ စစ်လိုက်တော့ Positive ထွက်လို့ ညတွင်းချင်းပဲ သဂြိုဟ်လိုက်တယ်” ဟု အောင်ပန်း နာရေး ကူညီမှုအသင်း တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
ယင်းသေဆုံးသူ အမျိုးသားသည် အသက် ၅၀ ဝန်းကျင်ဖြစ်ပြီး နေရပ်လိပ်စာ နှင့် အမည် မသိရကြောင်း အောင်ပန်းနာရေးကူညီရေးမှ တာဝန်ရှိသူက ဆက်ပြောသည်။
လက်ရှိတွင် အောင်ပန်းမြို့နယ်အတွင်း၌ ကိုဗစ် – ၁၉ ကြောင့် သေဆုံးသူ ဦးရေ ၅ ယောက်ခန့် ရှိနေပြီး ကိုဗစ် ရောဂါပျံ့နှံ့ကူးစက်မှု တစ်ဖန်ပြန်လည် မြင့်မားလာမှာကို စိုးရိမ်ကြောင်း ၎င်းက ပြောသည်။
“အခုဆို ကိုဗစ်ကြောင့် သေဆုံးသူက ၅ / ၆ ယောက်လောက် ရှိလာပြီ၊ ပြီးတော့ အခုလို လူမသိ သူမသိထံကနေ လည်း ကိုဗစ်ပိုးတွေ့တယ်ဆိုတော့ စိတ်ပူစရာကောင်းတယ်၊ ဒါကြောင့် ပြည်သူတွေ အသွားအလာ ကျန်းမာရေး အစစအရာရာ ဂရုစိုက်ဖို့ပြောချင်ပါတယ်” ဟု နာရေးကူညီရေးအသင်းက တာဝန်ရှိသူက ဆိုသည်။
စစ်ကောင်စီ အာဏာသိမ်းပြီး တစ်နှစ်ကျော်ကြာလာသည့် အချိန် သျှမ်းပြည် အပါအဝင် နိုင်ငံတစ်ဝှမ်းလုံး၌ ပြီးခဲ့သည့် သြဂုတ်လအတွင်းမှ စတင်ကာ ကိုဗစ်ရောဂါ ကူးစက်မှုပြန်လည် မြင့်တက်လာကြောင်းလည်း သိရသည်။
ယခု တကကြော့ပြန် ဖြစ်ပွားလာသော ကိုဗစ်ရောဂါပိုးသည် ပြင်းထန်ရောဂါလက္ခဏာများ ခံစားရသူ နည်းပါးလျက် ရှိပြီး ရာသီတုပ်ကွေးကဲ့သို့ အဖျားရက်ရှည်သည့် ရောဂါလက္ခဏာများသာ အများစု ဖြစ်ပွားလျက်ရှိကြောင်း သိရ သည်။
