သျှမ်းပြည်တောင်ပိုင်း ပင်လောင်း – လွိုင်ကော် ကားလမ်းပေါ် ဆောင်းပြောင်းဂိတ်တွင် ပအိုဝ်းပြည်သူ့စစ် PNO တပ်ဖွဲ့က စစ်ဆေးရေး တင်းကြပ်နေကြောင်း စုံစမ်းသိရှိရသည်။

အောက်တိုဘာလမှ စတင်ပြီး ပင်လောင်းမြို့ နှင့် ၁၄ မိုင်ခန့်ကွာဝေးသော ဆောင်းပြောင်းကျေးရွာရှိ ပအိုဝ်း ပြည်သူ့စစ် PNO စစ်ဆေးရေးဂိတ်တွင် ခရီးသွား ပြည်သူများကို မှတ်ပုံတင်များနှင့်တကွ စစ်ဆေးမေးမြန်းပြီး ကုန်တင်ကား တစ်စီးကို ကျပ်ငွေ (ငါးထောင်) မှ (တစ်သောင်း) အထိ အခွန်လမ်း ကောက်ခံနေကြောင်း ယာဉ်မောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် အောက်တိုဘာ ၂၀ ရက်တွင်လည်း ဆောင်းပြောင်းဂိတ်ကို ဖြတ်မောင်းလာသော ယာဉ်မောင်းတစ်ဦး အား ကားမရပ်ပေးသဖြင့် ပအိုဝ်းပြည်သူ့စစ် တပ်ဖွဲ့ PNO က သေနတ်ဖြင့် ပစ်ခတ်ခဲ့ကြောင်း ဆိုသည်။

“ ခရီးသည်တွေကို သူတို့ အရမ်းစစ်ကြမ်းတယ်။ အဓိက လူငယ်တွေကို မှတ်ပုံတင်ကြည့်ပြီး စစ်ဆေးတယ်။ ဟိုတစ်ပတ်တုန်းက အဲ့ဂိတ်ကို ဖြတ်မောင်းလာတဲ့ ယာဉ်မောင်းတစ်ဦး ကားကို မရပ်ပေးလို့ သေနတ်နဲ့ ပစ်သေးတယ်။ ယာဉ်မောင်းကလည်း ပြောင်းဖူးခြံထဲကို မောင်းပြေးသွားတော့ သူတို့ လိုက်ဖမ်းမိတယ်။ သူတို့ အရမ်းစစ်ဆေးတော့ ပြည်သူတွေက အရမ်းကြောက်သွားတာ “ ဟု ၎င်း ယာဉ်မောင်းတစ်ဦးက ပြောသည်။

အဆိုပါ ဆောင်းပြောင်းဂိတ်တွင် ပြည်သူ့စစ်တပ်ဖွဲ့ PNO များအပြင် စစ်ကောင်စီတပ်သား တချို့လည်း ပါဝင်နေပြီး စစ်ဆေးရေးဂိတ်ကို ၂၄ နာရီအတွင်း စစ်ဆေးမှု ပြုလုပ်နေကြောင်း သိရသည်။

ထို့အပြင် ဆောင်းပြောင်းဂိတ်တွင် ပအိုဝ်းပြည်သူ့စစ် တပ်ဖွဲ့ PNO နှင့် စစ်ကောင်စီ တပ်သား တချို့ စစ်ဆေးရေး တင်းကြပ်ထားသောကြောင့် ခရီးသွားပြည်သူများ သွားလာရန် ခက်ခဲနေကြောင်း ပင်လောင်းဒေသခံ တစ်ဦးက ပြောသည်။

“ တစ်ခါတလေ မလိုတဲ့စကား၊ မဆိုင်တဲ့ စကားတွေ အရမ်းမေးတယ်။ အမျိုးသမီးတွေဆို အိမ်ထောင်သည် လား၊ အပျိုလေးလားလို့ မေးတယ်။ ပြည်သူတွေက သွားလာဖို့ အဆင်မပြေဘူး၊ မလွှတ်လပ်ဘူး။ လူငယ်တွေဆိုလည်း PDF သွားလုပ်မလား၊ ဘာညာ အရမ်းမေးတယ်။ အခု လွိုင်ကော်ကို သွားရင်လည်း အဲ့လမ်း တစ်ခုပဲရှိတော့ သွားလာဖို့ အရမ်းခက်ခဲလာတယ်။ အဲ့ဂိတ်ကို ရောက်ရင် ကားပေါ်က အကုန်ဆင်းပြီး စစ်ဆေးခံရတယ် “ ဟု ၎င်း ဒေသခံတစ်ဦးက ပြောသည်။

သျှမ်းပြည်တောင်ပိုင်း နယ်စပ်ဒေသတွင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF တို့ စစ်ဆေးရေး တင်းကြပ်ထားမှုကြောင့် ဆောင်းပြောင်းဂိတ်မှာ စစ်ကောင်စီတပ်ဖွဲ့ နှင့် ပူပေါင်းတပ်ဖွဲ့ ပအိုဝ်းပြည်သူ့စစ်တပ်ဖွဲ့ PNO စစ်ဆေးရေး အတင်းအကြပ် ပြုလုပ်နေကြောင်း ဒေသခံများက ဆိုသည်။