သျှမ်းပြည်မြောက်ပိုင်း မူဆယ်-ကွက်ခိုင် ကြား မော်တောင်းကျေးရွာအနီးတွင် ကချင် လွတ်လပ်ရေး တပ်မတော် (KIA)တပ်ဖွဲ့သည် သွားလာနေသည့် ကုန်တင်ကားသမားများထံ ဆက်ကြေးများကို အရင်ကထက် ပိုကောက်ခံနေကြောင်း စုံစမ်းသိရှိရသည်။
စစ်အာဏာသိမ်းပြီး နောက်ပိုင်း မူဆယ်-ကွက်ခိုင်ကြား သွားလာနေသည့် ကုန်တင်ကားသမားများကို ၂၂ ဘီးတွဲ ကားတစ်စီးလျှင် ကျပ်ငွေ (ငါးသိန်း) မှ (ဆယ်သိန်း) နှင့် ၁၂ ဘီး တွဲကားနှင့် သဲသယ်ဆောင်လာသည့် ကားများကို ကျပ်ငွေ (သုံးသိန်း) မှ (ငါးသိန်း) ထိ မော်တောင်း ဟိုခေကျေးရွာမှာ KIA အခွန်ပေးဆောင်ရကြောင်း မူဆယ်မြို့ကုန်သည် သမားတစ်ဦးက သျှမ်းသံတော်ဆင့်ကို ပြောသည်။
“ ကုန်တင်လာတဲ့ ကုန်သည်သမားတွေက ကွတ်ခိုင်မြို့ကို ရောက်ပြီဆိုရင် သူတို့ကို ဖုန်းကြိုဆက်ထားရတယ်။ မော်တောင်းကို ရောက်သွားရင်တော့ KIA ကို အခွန်ဆောင်ရတယ်။ အခွန်မဆောင်ဘဲ မူဆယ် ၁၀၅ မိုင်ကို ရောက်သွားရင်တော့ သူတို့ဒဏ်ငွေရိုက်တယ်။ ကုန်တင်ကား တစ်စီး (၁၀) သိန်းပေးရမယ့်အစား သူတို့က ၂ ဆသတ်မှတ်လိုက်ပြီး ကျပ်ငွေ သိန်း ၃၀ ပေးရတယ်။ တစ်ခါသွားရင် တစ်ကြိမ်ပေးရတယ် “ ဟု ၎င်းကုန်သည်တစ်ဦးက ပြောသည်။
ယခင်က တာလုံကျေးရွာရှိ KIA အခွန်ပေးဆောင်သည့် နေရာတွင် အခွန်ဆောင်ရသော်လည်း ယခုတွင် မောင်တောင်းအဝင် ဟိုခေရွာတွင် KIA အခွန်ဆောင်သည့် နေရာတွင် ဖြတ်ပိုင်းယူပြီး အခွန်ပေးဆောင်နေရ ကြောင်း သိရသည်။
ထို့ပြင် မူဆယ်- ကွက်ခိုင်ကြား ကားလမ်းမကြီးဘေးရှိ ကုန်စုံဆိုင်များ၊ ဈေးဆိုင်များ၏ အပေါ်မူတည်ပြီး တစ်နှစ်တစ်ကြိမ် KIA ထံတွင် အခွန်ပေးဆောင်ရကြောင်း ဈေးဆိုင်အမျိုးသမီး တစ်ဦးက ပြောသည်။
“ တစ်နှစ်တစ်ကြိမ် KIA ဆီကို အခွန်ဆောင်ရတယ်။ အရင်နှစ်တုန်းက ကျပ်ငွေ (ငါးသိန်း)ဆောင်ဖို့ ပြေစာစာရွက် ပေးလာတယ်။ အဲ့လောက်အခွန်ဆောင်ရတာတော့ ကျမတို့ မတတ်နိုင်ဘူးလေ။ သူတို့နဲ့ဆွေးနွေးပြီးတော့ အခွန်ဆောင်ရတာကျမတို့တော့ မဖြစ်စေချင်ဘူး။ လက်နက်ကိုင်ကို လှူသန်းတဲ့ အနေနဲ့ တစ်နှစ်ကို အများဆုံး ကျပ်ငွေ (တစ်သိန်း) ပေးဆောင်မယ်လို့ တောင်းဆိုတယ်။ ဒီနှစ်တော့ လာမကောက်သေးဘူး “ ဟု ၎င်း အမျိုးသမီးတစ်ဦးက ပြောသည်။
အခွန်ဆက်ကြေး ကောက်ခံနေသည့် ကိစ္စနှင့် ပတ်သက်ပြီး KIA ဗိုလ်မှူးကြီးနော်ဘူ ထံကို သျှမ်းသံတော်ဆင့်က ဆက်သွယ်မေးမြန်းသော်လည်း ဖုန်းလက်ခံဖြေကြားခြင်း မရှိကြောင်း သိရသည်။
“ ကျမတို့ ဈေးဆိုင်ခန်းဖွင့်ထားတဲ့သူတွေ၊ ကုန်တင်ကားသမားတွေတော့ အရမ်းခက်ခဲတာပေါ့။ ဒီကိစ္စနဲ့ ပတ်သက်ပြီး ကျနော်တို့ သျှမ်းလက်နက်ကိုင်တပ်ဖွဲ့ကို ပြောပြီး လာဖြေရှင်းပေးဖို့လည်း အခုထိဘာအကြောင်း မှမကြားရသေးဘူး။ ကုန်တင်ကားသမားတွေဆို ဆီဈေးနှုန်းနဲ့ ကုန်တင် ရောင်းမထွက်တာ ဘယ်လိုမှ တွက်ချေမကိုက်တော့ဘူး “ ဟု ၎င်းအထက်ပုဂ္ဂိုလ် အမျိုးသမီးက ဆက်ပြောသည်။
ပြီးခဲ့သည့် အောက်တိုဘာ ၁၉ ရက်တွင် နမ့်ခမ်းမြို့နယ် KIA အမှတ် (၄) ၊ အမှတ် (၆) နှင့် အမှတ် (၁၀) တပ်မဟာ လှုပ်ရှားနယ်မြေအတွင်းရှိ ဘဏ်များ၊ ကုမ္ပဏီများ၊ စီးပွားရေးလုပ်ငန်းရှင်များ အခွန်ဆက်ကြေး ပေးဆောင်မှု ပျက်ကွက်ပါက အရေးယူမည်ဖြစ်ကြောင်း ခြိမ်းခြောက်ထားသည်။
Leave a Comments