သျှမ်းပြည်တောင်ပိုင်း ဖယ်ခုံမြို့နယ် လွယ်ပေါကျေးရွာအုပ်စုအတွင်း စစ်ကောင်စီတပ်ဖွဲ့က ကယန်းပြည်သစ်ပါတီ နှင့် ညှိနှိုင်းကာ စစ်ဆေးရေးဂိတ် ပြန်ဖွင့် ရန်အတွက် ကြိုးစားနေကြောင်း သတင်းသိရသည်။

ယခု နိုဝင်ဘာလအတွင်းတွင် ဖယ်ခုံမြို့နယ် လွယ်ပေါကျေးရွာအုပ်စု ဖယ်ခုံအင်းအရှေ့ဘက်ကမ်း ကန်ပတ်လမ်း တွင် စစ်ကောင်စီ နှင့် PNO ပြည်သူ့စစ်တို့က ကယန်းပြည်သစ်ပါတီတို့နှင့် ညှိနှိုင်းပြီး စစ်ဆေးရေးဂိတ် ဖွင့်လှစ်ရန် ကြိုးစားနေကြောင်း ဒေသခံများက ပြောသည်။

“ဒီ ကန်ပတ်လမ်းမှာ ထီရီတိုက်ပွဲမဖြစ်ခင် စစ်ကောင်စီ စစ်ဆေးရေးဂိတ် ရှိခဲ့ဖူးတယ်၊ အခု ကျတော့ ညောင်ရွှေမြို့ နယ်ထဲက ဒေသခံတွေကို ခြုံ /မြက်တွေ ရှင်းခိုင်းပြီး ပြန်ဖွင့်မယ်လို့ သိရတယ်၊ ပြီးတော့ စစ်ဘေးရှောင်နေရတဲ့ ဒေသခံတွေကိုလည်း နေရပ်ပြန်လာဖို့ အတင်း ခေါ်နေတယ်” ဟု လွယ်ပေါကျေးရွာအုပ်စု မှ အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် အာဏာသိမ်း စစ်ကောင်စီတပ်ဖွဲ့သည် လွယ်ပေါကျေးရွာ၊ ဆောင်နန်းခဲကျေးရွာ၊ နန်းပေါ်လုံရွာ၊ နန်းဆွတ်ရွာ၊ ပိန္နဲကုန်းရွာ၊ လွယ်ဟယ်ရွာ၊ မခေခမ်းရွာတို့မှ စစ်ရှောင်ပြည်သူများကို နေရပ်သို့ အတင်းပြန်ခိုင်းပြီး ကယန်းပြည်သစ်ပါတီဘက်မှ စစ်ရှောင်များ နေရပ်ပြန်ပါက လုံခြုံရေးတာဝန်မယူပေးနိုင်ဟု ပြန်ပြောခဲ့ကြောင်း သတင်းသိရသည်။

ထို့အပြင် ညောင်ရွှေမြို့နယ်မှ တောင်ပို့ကွဲ ၊ဟိုပန်းရွာနှင့် ပင်လောင်းမြို့နယ် နန်းတုတ်၊ ကုန်သာ၊ အိမ်မူရွာရှိ ဒေသခံများခေါ်ပြီး စစ်ဆေးရေးဂိတ်ပြန်ဖွင့်ရန်အတွက် ခြုံပင် မြက်ပင်များရှင်းရန် အတင်းအဓမ္မလုပ်အားပေး ခိုင်းစေနေကြောင်း ဒေသခံ ပြောပြချက်အရ သိရသည်။

“ဒီလမ်းပိုင်းက တိုက်ပွဲတွေ မကြာခဏဖြစ်နေတယ်၊ ဒါကြောင့်မို့ ဒေသခံတွေက မသွားရဲဘူး၊ စကစတွေက ရွာလူကြီးကနေ တစ်အိမ်တစ်ယောက် လုပ်အားပေးဖို့ ခိုင်းလာတာ၊ တချို့က တိုက်ပွဲကို ကြောက်လို့ ရေတွေ ထမင်းတွေ ပိုက်ဆံတွေ ပေးမယ်၊ မသွားနိုင်ဘူးဆိုပြီး ငြင်းကြတာရှိတယ်” ဟု နန်းတုတ်ရွာမှ အသက် ၄၀ကျော်ရှိ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မေလတွင်းက ထီရီတိုက်ပွဲဖြစ်ပွားပြီးနောက် ဆောင်နန်းခဲတစ်ရွာလုံးနီးပါး ဒေသခံအိမ်များ မီးရှို့ ခံရပြီး အဆိုပါ လမ်းကြောင်းလည်း ပိတ်ထားကာ ဒေသခံများလည်း ယခုအချိန်ထိ စစ်ဘေးရှောင်နေရသော် လည်း စစ်ကောင်စီဘက်မှ စစ်ဆေးရေးဂိတ်ပြန်ဖွင့်ရန် ကြိုးစားနေခြင်းဖြစ်ကြောင်း သိရသည်။

ယင်းကဲ့သို့ ဖြစ်စဥ်နှင့် ပတ်သက်ပြီး စစ်အာဏာရှင် တော်လှန်ရေးသည် မပြီးဆုံးသေးသည့်အတွက် ဒေသခံ ပြည်သူများအနေဖြင့် ဘေးကင်းလုံခြုံသည့်နေရာတွင်သာ ဆက်နေသင့်ကြောင်း ဖယ်ခုံ PDF မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ စစ်ကောင်စီတွေရှိနေတဲ့ ရွာထဲကို ဒေသခံတွေသွားနေ ရင်လည်း အန္တရာယ်အရမ်းများတယ်။ အရင်တုန်းက မြင်ဖူးကြားဖူးသလို လူသားဒိုင်းကာတွေ၊ ဖမ်းဆီးရိုက်နှက် တာတွေက ဆက်ရှိလာနိုင်တယ်။ ဒါကြောင့်မို့ ဖြစ်နိုင်ရင်တော့ ပြည်သူတွေကို မပြန်စေချင်သေးဘူး။ ဘေးကင်း တဲ့ အရပ်မှာပဲ နေစေချင်သေးတယ်” ဟု ဖယ်ခုံ PDF တပ်ဖွဲ့မှ တာဝန်ရှိသူက ပြောသည်။

ပြီးခဲ့သည့် အောက်တိုဘာ ၂၇ ရက်မှ စတင်ပြီး ကရင်နီပြည် (ကယားပြည်) မှ သျှမ်းပြည်တောင်ပိုင်း ဆီဆိုင်မြို့ ၊ ပင်လောင်းမြို့ မှ ဖယ်ခုံ၊ မိုးဗြဲဘက်သို့ ဆက်သွယ်ရန် အရေးပါသည့် ဆောင်ကန်း လမ်းကြောင်းကို စစ်ကောင်စီဘက်မှ ထိန်းချုပ်ရန် ကြိုးစားနေသည့် တိုက်ပွဲဖြစ်ပွားနေကြောင်းသိရသည်။