ကချင်ပြည် မိုးမောက်မြို့နယ်ရှိ စစ်ရှောင်များ နေရပ်သို့ ရိက္ခာများ ပြန်သယ်ယူနေစဉ် ကျေးရွာအတွင်းတွင် တိုက်ပွဲထပ်မံဖြစ်ပွားပြီးထွက်ပြေး တိမ်းရှောင်လာခဲ့ရကြောင်း စုံစမ်း သိရှိရသည်။
ယမန်နေ့ (အောက်တိုဘာ ၃၁) ရက် နေ့လည် ၂ နာရီခွဲတွင် လုံကြာကျေးရွာ နှင့် နောင်တောင်းကျေးရွာထဲတွင် စစ်ကောင်စီတပ်ဖွဲ့ နှင့် တိုင်းရင်းသား လက်နက်ကိုင်တပ်ဖွဲ့တို့ လက်နက်ကြီး၊ လက်နက်ငယ် ဖြင့် တိုက်ပွဲထပ်မံဖြစ်ပွားပြီး ကျေးရွာအတွင်းရှိ ပြည်သူ ၅၀ ဝန်းကျင် ထပ်မံထွက်ပြေးလာခဲ့ရကြောင်း စစ်ရှောင်ကော်မတီဝင် တစ်ဦးက သျှမ်းသံတော်ဆင့်ကို ပြောသည်။
“ မနေ့က ကျနော်တို့ စစ်ရှောင်တချို့ ရွာထဲမှာ စားနပ်ရိက္ခာ ပြန်သယ်နေတုန်း တိုက်ပွဲဆက်ဖြစ်တာ။ လက်နက်ကြီး၊ လက်နက်ငယ် တွေနဲ့ ပစ်နေတယ်။ စစ်ရှောင်တွေတော့ ထိခိုက်ဒဏ်ရာရတဲ့သူ မရှိဘူး။ ကျေးရွာထဲက တိုက်ပွဲရှောင် ပြည်သူ ၅၀ ကျော် နဲ့ ကျနော်တို့ စစ်ရှောင်တချို့ လမ်းတဝိုက်မှာ ကားနဲ့ ပြန်လာရတယ် “ ဟု ၎င်း ကော်မတီဝင်တစ်ဦးက ပြောသည်။
တိုက်ပွဲသည် ယမန်နေ့ နေ့လည် ၂ နာရီခွဲမှ နေ့လည် ၄ နာရီထိ တိုက်ပွဲ ဖြစ်ပွားခဲ့ကြောင်း ၎င်းက ဆက်ပြောသည်။
ထို့အပြင် လုံကြာကျေးရွာ နှင့် နောင်တောင်းကျေးရွာ ကြားရှိ ကားလမ်းမပေါ်တွင် တိုက်ပွဲအတွင်း ပစ်ခတ်ခဲ့သော လက်နက်ကြီးတစ်လုံးမှာ မပေါက်သေးဘဲ ကျစ်ရစ်နေကြောင်း နောင်တောင်းကျေးရွာ ဒေသခံ တစ်ဦးကပြောသည်။
“ သူတို့ တိုက်ပွဲတော့ ပြင်းထန်တယ်လို့ ပြောရတယ်။ လက်နက်ကြီး၊ လက်နက်ငယ်တွေနဲ့ ဆက်တိုက် ပစ်နေတယ်။ ပြည်သူနေအိမ်တွေ ထိခိုက်မှု ရှိမရှိတော့ မသိရသေးဘူး။ လုံကြာနဲ့ နောင်တောင်းကြား ကားလမ်းမပေါ်မှာ လက်နက်ကြီးတစ်လုံး မပေါက်ကွဲသေးတာ တစ်လုံးရှိတယ်။ ဒီနေ့ တိုက်ပွဲဆက်မဖြစ်ရင်တော့ ရွာထဲပြန်ဝင်ကြည့်မှသိရမယ် “ ဟု ၎င်းဒေသခံတစ်ဦးက ပြောသည်။
ပြီးခဲ့သည့် အောက်တိုဘာ ၂၀ ရက်မှစပြီး ယမန်နေ့ အောက်တိုဘာ ၃၁ ရက်နေ့ထိ တိုက်ပွဲအတွင်း ထွက်ပြေးလာသော စစ်ရှောင်များသည် လူဉီးရေ (၆၅၀) ဝန်းကျင်ထိ ရှိလာပြီး ထိုထဲတွင် ကလေးငယ်များ နှင့် သက်ကြီးရွယ်အိုများဖြစ်ကြပြီး စားနပ်ရိက္ခာများအတွက် အရေးပေါ် အကူညီလိုအပ်နေကြောင်း သိရသည်။
