သျှမ်းပြည်တောင်ပိုင်း ဖယ်ခုံမြို့နယ် လက်နက် နှင့် ရိက္ခာ သယ်ဆောင်ရေးအတွက် အရေးပါသည့် ဆောင်ကန်း လမ်းကြောင်း ကို စစ်ကောင်စီ တပ်ဖွဲ့မှ ထိန်းချုပ်ရန် ကြိုးစားနေကြောင်း သတင်းသိရသည်။

ပြီးခဲ့သည့် အောက်တိုဘာ ၂၇ ရက်နေ့မှ စတင်ပြီး ကရင်နီပြည် (ကယားပြည်) မှ သျှမ်းပြည်တောင်ပိုင်း ဆီဆိုင်မြို့ ၊ ပင်လောင်းမြို့ မှ ဖယ်ခုံ၊ မိုးဗြဲဘက်သို့ ဆက်သွယ်ရန် အရေးပါသည့် ဆောင်ကန်းလမ်းကြောင်း ကို စစ်ကောင်စီဘက်မှ ထိန်းချုပ်ရန် ကြိုးစားနေသည့်အတွက် ဒေသခံ PDF ပူးပေါင်းတပ်ဖွဲ့မှ ခုံခံတိုက်ခိုက်နေကြောင်း ဖယ်ခုံ တပ်ရင်း ၂ မှ တပ်ဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။

“ဒီ ဆောင်ကန်းလမ်းကြောင်းက သူတို့ (စစ်ကောင်စီ) အတွက်ရော ကျနော်တို့ ရဲဘော်တို့ အတွက်ရော လက်နက် တွေ ရိက္ခာတွေ စစ်ကူအင်အားတွေ ဖြည့်ဖို့ အဓိက အရေးပါတဲ့ လမ်းကြောင်းလည်း ဖြစ်တယ်၊ ဒါကြောင့် စကစ တွေက ဒီလမ်းကြောင်းကို မရမက ယူချင်နေတာ၊ ဒီနေ့ဆို တိုက်ပွဲက ၅ ရက်ကြာခဲ့ပြီ၊ ဖြစ်နေတုန်းပဲ” ဟု ဖယ်ခုံ တပ်ရင်း ၂ မှ တပ်ဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။

ဆောင်ကန်းလမ်းကြောင်းသည် ဖယ်ခုံမြို့ အရှေ့ဘက်ကမ်း နှင့် အနောက်ဘက်ကမ်းကို ဆက်သွယ်ထားသည့် အပြင်၊ ပင်လောင်းမြို့နယ် နောင်ဝိုးရွာ ဘက်မှ တစ်ဆင့် ဖယ်ခုံမြို့၊ မိုးဗြဲမြို့တို့နှင့် ဆက်သွယ်ထားသည့် အရေးပါ သည့် လမ်းကြောင်း ဖြစ်ကြောင်းလည်း သိရသည်။

အဆိုပါ တိုက်ပွဲအတွင်းတွင် ဖယ်ခုံ PDF တပ်ရင်း ၂ ပူးပေါင်းတပ်ဖွဲ့ဘက်မှ ကျဆုံးဒဏ်ရာရရှိခဲ့ပြီး၊ စစ်ကောင်စီ ဘက်မှလည်း အရာရှိများ အပါအဝင် ကျဆုံးဒဏ်ရာရသူ များပြားကြောင်း သတင်းသိရသည်။

ဆောင်ကန်း တိုက်ပွဲစတင်ခဲ့သည့် အောက်တိုဘာလ ၂၇ ရက်မှ ယနေ့ ၃၁ ရက် ၅ ရက်သာ ကာလအတွင်းတွင် တိုက်ပွဲတွင်း လူ၊ လက်နက်ဆုံးရှုံးထားသည့် စစ်ကောင်စီက ပြည်သူလူထုနေထိုင်သည့်ကျေးရွာ နှင့် စစ်ရှောင်စခန်း များကို ပစ်မှတ်ထားပြီး လက်နက် ကြီးဖြင့် တိုက်ခိုက်မှုများ ဆက်တိုက်ပြုလုပ်လာကြောင်းလည်း ဖယ်ခုံအနောက် ဘက်ကမ်းမှ ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီတွေက တစ်ဖက်မှာ တိုက်ပွဲဖြစ်ရင် တဖက်မှာရှိတဲ့ စစ်ကူက လက်နက်ကြီးတွေနဲ့ ကူပစ်ပေးတယ်၊ ရမ်းပစ်ကြတာ၊ လူနေရပ်ကွက်ရော၊ စစ်ရှောင်စခန်းတွေဆီရော လက်နက်ကျတယ်၊ ဒါကြောင့် ဖယ်ခုံအနောက် ဘက်ကမ်းက ဒေသခံတွေ အားလုံးနီးပါးက စစ်ရှောင်ထွက်ပြေးနေကြရပြီ၊ လူနေမရှိသလောက်ပဲ” ဟု အထက်ပါ အမျိုးသမီးက ပြောသည်။

ပြီးခဲ့သည့် အောက်တိုဘာ ၂၉ ရက်တွင် ဖယ်ခုံ အရှေ့ဘက်ကမ်းသို့ ထွက်ပြေးတိမ်းရှောင်လာသည့် လွယ်ပေါဂွင် မှ စစ်ရှောင်များ နေရပ်ပြန်လိုကြောင်း ဆင်ဖြူရှိ ကယန်းပြည်သစ်ထံ အကြောင်းကြားရာတွင် မိမိနေအိမ်ပြန် ပါကပြန်နိုင်သည်၊ ခြံယာလုပ်ချင်ပါကလုပ်နိုင်သည် စစ်ကောင်စီ လာပါက ထွက်မပြေးရန်၊ ထွက်ပြေးပြီး စစ်ကောင်စီ ကပစ်သတ်လျှင်တာဝန်မယူနိုင်ကြောင်း ကယန်းပြည်သစ်က ပြန်ပြောကြောင်း သိရသည်။

ဆောင်ကန်း လမ်းကြောင်းတိုက်ပွဲအတွင်း PDF ပူးပေါင်း တပ်ဖွဲ့ဝင် (၈) ဦး ထိခိုက်ဒဏ်ရာရရှိပြီး (၁) ဦးမှာ မျက်လုံးတစ်ဖက် ထိခိုက်ဒဏ်ရာရကာ စိုးရိမ်ရကြောင်း နှင့် ရဲဘော်တစ်ဦး ကျဆုံးခဲ့ကြောင်း ဖယ်ခုံ PDF တပ်ရင်း (၂) မှ တာဝန်ရှိသူ တစ်ဦး ထံမှ သတင်း သိရသည်။