တနိုင်ငံလုံးအပစ်အခတ်ရပ်စဲရေးစာချုပ် NCA လက်မှတ်ရေးထိုးထားသည့် သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်မတော် RCSS/SSA ခေါင်းဆောင် ဗိုလ်ချုပ်ကြီးယွက်စစ်သည် စက်တင်ဘာ ၁၀ ရက်နေ့က စ၍ ယနေ့ အထိ နေပြည်တော် ရန်ကုန် သို့ ခရီးထွက်နေကာ တန်းတူညီမှု တရားမျှတမှု ရှိသည့် ဖက်ဒရယ် ဒီမိုကရေစီ ပြည်ထောင်စုကြီး အတွက် နိုင်ငံတော် အကြီးအကဲများ၊ တပ်မတော်အကြီးအကဲများ၊ နိုင်ငံရေးပါတီများ၊ နိုင်ငံခြားသံသမာန်များ နှင့် တွေ့ဆုံပြီးဆွေးနွေးခဲ့ပါသည်။

ဤခရီးစဉ်နဲ့ ပတ်သက်ပြီး ယနေ့ စက်တင်ဘာ ၁၅ ရန်ကုန်မြို့တွင် သတင်းထောက် များနှင့်တွေ့ဆုံကာ  သတင်းစာရှင်းလင်းပွဲတရပ်ကျင်းပါခဲ့ပါသည်။ ထိုသတင်းစာရှင်းလင်းပွဲမှ သတင်းထောက်များ မေးမြန်းချက်များအနက် CSSU,NCA,TNLA,UWSA, နှင့် DDR/SSR ဆိုင်ရာ ကိစ္စရပ်များအားကောက်နှုတ်ဖေါ်ပြထားခြင်းဖြစ်ပါသည်။

သတင်းထောက်။ ။ ဒေါ်အောင်ဆန်းစုကြည် ဦးဆောင်တဲ့အဖွဲ့က အစိုးရဖြစ်လာတဲ့ နောက်ပိုင်းငြိမ်းချမ်းရေးလုပ်ငန်းဟာ သူမရဲ့အဓိကလုပ်ငန်းတခုဖြစ်တယ်လို့ကြေငြာခဲ့ပါတတယ်။ ဒီတနှစ်တာကာလအတွင်း သူမရဲ့လုပ်ဆောင်ချက်တွေကဘာတွေရှိပါသလဲ။ အားရကျေနပ်မှုရှိတယ်လို့မြင်ပါသလား။ဘာတွေလိုအပ်ချက်တွေရှိသလဲဆိုတာပြောပြပေးပါ။

ဗခက ယွက်စစ် ။ ။ဟုတ်ကဲ့ပါ။ အားရကျေနပ်မှုရှိပါသလားလို့မေးလာရင်တော့  အားရ ကျေနပ်မှုတော့မရှိခဲ့ပါဘူး။ ဒါပေမယ့် နိုင်ငံတော်အတိုင်ပင်ခံပုဂ္ဂိုလ်ရဲ့ အခက်အခဲ ကိုလည်း ကျနော်တို့နားလည်ပါတယ်။

သတင်းထောက်။ ။ ချင်းမိုင်မှာပြုလုပ်မယ့် CSSU အစည်းအဝေးကို တားမြစ်ခံရတယ်လို့ကြားသိရပါတယ်။ အခုလို နိုင်ငံတော်အတိုင်ပင်ခံပုဂ္ဂိုလ်နဲ့တွေ့ပြီးနောက်ပိုင်း CSSU အစည်းအဝေး ဆက်လက်ကျင်းပဖို့ရှိပါသလား။

ဗခက ယွက်စစ် ။ ။ကျနော်တို့  စုစည်းမှုအတိုင်း စီမံချက်အတိုင်းဆက်လက်ပြီး ပုံမှန်လုပ် ဆောင်သွားမယ်။  အခက်အခဲတွေကို ကြုံတွေ့ရပေမယ့် အခက်အခဲတွေကိုဖြေရှင်းပြီးဖြစ်ပါတယ်။

သတင်းထောက်။ ။ တပ်မတော်ဘက်ကပိတ်ခိုင်းတာလို့သိထားရတော့ ကာကွယ်ရေးဦးစီးချုပ် နဲ့တွေ့ဆုံရာမှာ ဘာတွေဆွေးနွေးဖြစ်သလဲ။

ဗခက ယွက်စစ် ။ ။တပ်မတော်နဲ့တွေ့တုန်းက ဒီကိစ္စကိုမဆွေးနွေးဖြစ်ပါဘူး။ ကျနော်တို့ NRPC ကိုစာရေးအကြောင်းကြားပြီဖြစ်လို့ ပြသနာက သူတို့ဖြေရှင်းပေးလိမ့်မယ်လို့ယုံကြည်လို့ပါ။

သတင်းထောက်။ ။ TNLA နဲ့ဆက်ဆံရေးအခြေအနေကကော် ဘယ်လိုရှိပါသလဲ။

ဗခက ယွက်စစ် ။ ။ဘယ်လိုမှမရှိပါဘူး။ခုချိန်အထိကျနော်တို့ တိုက်ပွဲတွေကြိုကြားဖြစ်နေတုန်းပါဘဲ။

သတင်းထောက်။ ။ မကြာသေးခင်တုန်းက RCSS  ကိုယ်စားလှယ်နဲ့ UWSA တို့တွေ့ဆုံခဲ့တယ် လို့ကြားသိရပါတယ်။TNLA နဲ့ ပဋိပက္ခဖြစ်နေတဲ့ကိစ္စ  UWSA ကနေကြားဝင်ဆောင်ရွက် ပေးဖို့ဖြစ်တယ်လို့ကြားသိရပါတယ်။

ဗခက ယွက်စစ် ။ ။ဒါကတော့အမြင်လွဲမှားမှုဘဲဖြစ်ပါလိမ့်မယ်။ ကျနော်တို့ကပန်ဆန်းအထိမသွားရပါဘူး။UWSA နဲ့ကျနော်တို့က နယ်မြေချင်းထိစက်နေတော့ ကျနော်တို့အမြဲတမ်း အဆက်အသွယ်ရှိနေပါတယ်။ ကျနော်တို့ ပဋိပက္ခတွေရှိပြီးတဲ့နောက်ပိုင်းကျနော်တို့အမြဲတွေ့ဆုံပြီးပြသနာတွေဖြေရှင်းကြပါတယ်။

သတင်းထောက်။ ။ အခု ခရီးစဉ်ကနေ ငြိမ်းချမ်းရေးလုပ်ငန်းစဉ် နဲ့ ပတ်သက်ပြီး ဘယ်လိုသုံးသပ်ပြလိုပါသလဲ။

ဗခက ယွက်စစ် ။ ။ကျနော်တို့ မီဒီယာတွေကိုတခုတောင်းဆိုချင်ပါတယ်။ ကျနော်တို့ ငြိမ်းချမ်းရေးကိုဖော်ဆောင်တဲ့နေရာမှာ ငြိမ်းချမ်းရေးလိုလားမှုက တယောက်နဲ့တယောက်မတူကြပါဘူး။ တပ်မတော်ဘက်က အမြင်ကတော့ လက်နက်ချပြီးမှ   DDR/SSR လုပ်ပြီးမှ ငြိမ်းချမ်းရေးကိုဖော်ဆောင်ချင်ကြတယ်။ ကျနော်တို့ဘက်ကတော့ ကျနော်တို့တွေ လက်တွဲပြီး တရားမျှတမှုရှိအောင် ၊ စစ်မှန်တဲ့ဒီမိုကရေစီ ဖက်ဒရယ် ပုံစံဖြစ်အောင်လုပ်ပြီးမှ ငြိမ်းချမ်းရေးလုပ်ပြီးမှဘဲ လက်နက်ဖြုတ်သိမ်းရေးကိစ္စ ဆွေးနွေးကြရမယ်လို့မြင်တယ်။

သျှမ်းပြည်တပ်မတော် RCSS/SSA ခေါင်းဆောင် ဗိုလ်ချုပ်ကြီးယွက်စစ် နှင့်အဖွဲ့ဟာ စက်တင်ဘာ ၁၁ ရက်နေ့စပြီး နိုင်ငံတော်အတိုင်အပင်ခံဒေါ်ဆောင်ဆန်းစုကြည်နှင့် တွေ့ဆုံပြီး ၁၂ ရက်နေ့က တပ်မတော်ဒုတိယကာကွယ်ရေး ဦးစီးချုပ် ဒုတိယ ဗိုလ်ချုပ်မှူးကြီး စိုးဝင်းနှင့် တွေ့ဆုံခဲ့သည်။

တွေ့ဆုံမှုတွင် နိုင်ငံတော် အတိုင်အပင်ခံ ဒေါ်အောင်ဆန်းစုကြည်က ငြိမ်းချမ်းရေး နှင့် မူးယစ်ဆေးဝါး တိုက်ဖျက်ရေးမှာ အမျိုးသမီးတွေ ပါ၀င်ဖို့လိုသည်ဟု ပြောပြီး ဒုတိယ ဗိုလ်ချုပ်မှူးကြီး စိုးဝင်းက NCA စာချုပ်ပါအတိုင်းအတူ လျှောက်လှမ်းဖို့ ပြောကြားသည်ဟုဆိုသည်။

တနိုင်ငံလုံးအပစ်ရပ်စာချုပ်လက်မှတ်ရေးထိုးထားသည့် သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA သည် အစိုးရတပ်မတော် နယ်မြေစိုးမိုးရေး လှုပ်ရှားမှုများကြောင့် အပစ်ရပ်စာချုပ်လက်မှတ်ရေးထိုးထားသော်လည်း ယခုနှစ်အတွင်း တိုက်ပွဲပြန်စိတ်လာသည့် နောက်ပိုင်း တပ်မတော် ထိပ်ပိုင်းခေါင်းဆောင်များနှင့် တွေ့ဆုံသကဲ့သို့ NLD ပါတီအာဏာရလာသည့် နောက်ပိုင်း နိုင်ငံတော်အတိုင်အပင်ခံပုဂ္ဂိုလ် ဒေါ်ဆောင်ဆန်းစုကြည် နှင့်လည်း ပထမ ဆုံး တွေ့ဆုံ သည့်ခရီးစဉ်ပဲဖြစ်သည်။

Photo by Hsen Pai