သျှမ်းပြည်တောင်ပိုင်း တောင်ကြီးမြို့နယ် အေးသာယာ မှ တောင်ကြီးမြို့ အတက်လမ်းတွင် ကုန်တင်ကား နှင့် ဆီဘောက်ဆာကား တိုက်မိမှုကြောင့် ကားလမ်းများ ပိတ်နေပြီး သွားလာရေး ခက်ခဲနေကြောင်း သတင်း သိရသည်။
ယနေ့ အောက်တိုဘာလ ၃၁ နံနက် ၈ နာရီကျော်ဝန်းကျင်တွင် အေးသာယာဘက်မှ တက်လာသည့် ကုန်တင်တွဲ ကား တစ်စီး နှင့် ဆီဘောက်ဆာကား တစ်စီးတို့သည် လမ်းကြောင်းလုမောင်းရာမှ ယာဥ်မတော်တဆ တိုက်မိကြပြီး လက်ရှိတွင် လမ်းကြောင်းပိတ်နေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ယာဥ်မတော်တဆဖြစ်တဲ့နေရာက ပစောက်ကွေ့အနီးမှာပါ၊ လမ်းလည်းတော်တော်ကို ကွေ့နေတဲ့ နေရာပါ၊ အခုလို ယာဥ်ကြီး နှစ်စီးက ယှဥ်မောင်းလိုက်တော့ ကားနှစ်စီးက တိုက်မိသွားကြတာ၊ ယာဥ်ပေါ်ပါ လူတွေကတော့ ဘာမှ မဖြစ်ဘူး၊ ကားကတော့ ထုတ်ရခက်နေတယ်၊ လမ်းလည်းပိတ်နေတယ်” ဟု အေးသာယာမှ တောင်ကြီးသို့ တက်လာမည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ယာဥ်တိုက်မှုကြောင့် အေးသာယာ – တောင်ကြီး အတက်လမ်းလည်း ပိတ်နေပြီး လမ်းသွားလမ်းလာ ပြည်သူများအတွက် ခက်ခဲနေကြောင်း ဒေသခံများက ပြောသည်။
“အတက်လမ်းက ပိတ်ထားလို့ တောင်ကြီး – အေးသာယာ အဆင်းလမ်းကိုပဲ အတက်အဆင်းအဖို့ လုပ်နေရတယ်၊ အဲ့ဘက်လမ်းကလည်း နည်းနည်းကျဥ်းနေတော့ အဲ့လို အတက်အဆင်း မောင်းရတာ အန္တရာယ်များတယ်” ဟု အထက်ပါ ပုဂ္ဂိုလ်က ဆက်ပြောသည်။
တောင်ကြီး – အေးသာယာ အတက်အဆင်းလမ်းသည် တောင်ပေါ်လမ်း ဖြစ်သည့်အတွက် မြေပြိုမှုများ၊ သစ်ပင်လှဲကျမှုကြောင့် လမ်းပိတ်မှုများ နှင့် မော်တော်ယာဉ်များ မတော်တဆ မကြာခဏ ဖြစ်ပွားလေ့ရှိကြောင်းလည်း သိရသည်။
