သျှမ်းပြည်မြောက်ပိုင်း မိုင်းရယ်မြို့ရှိ စစ်ဆေးရေးဂိတ်တွင် တရုတ်ပြည်မှ ပြန်လာသည့် ရွှေ့ပြောင်း အလုပ်သမား ၂ ဦးထံ ပိုက်ဆံတောင်းခံမှု ပြုလုပ်ကြောင်း စုံစမ်းသိရှိရသည်။

ပြီးခဲ့သည့် အောက်တိုဘာလ ၂၆ ရက်နေ့တွင် တရုတ်ပြည်ပြန် မြန်မာရွှေ့ပြောင်း အလုပ်သမား ၂ ဦးသည် မိုင်းရယ် မြို့အဝင် မီးသတ်စခန်းရှေ့တွင် ရှောင်တခင် စစ်ဆေးမှု ပြုနေကြသည့် စစ်ကောင်စီတပ်ဖွဲ့၏ စစ်ဆေးမှုကို ခံရပြီးနောက် ၎င်းတို့၏ ဖုန်းထဲတွင် တရုတ်ပြည်မှ ရိုက်လာသည့် စစ်သား နှင့် သေနတ်ပုံ တွေ့ရှိသဖြင့် ငွေကြေး တောင်းခံခဲ့ကြောင်း အမည်မဖော်လိုသူ ဒေသခံ အမျိုးသားတစ်ဦး က သျှမ်းသံတော်ဆင့် ကိုပြောသည်။

“ကျန်တဲ့ ခရီးသည်တွေကတော့ မှတ်ပုံတင်ပြပြီး ဘယ်ကိုသွားမလဲဆိုတာကို ပြောရုံနဲ့ လွတ်ပေးတယ်၊ သူတို့ နှစ်ယောက်ကတော့ ဖုန်းထဲမှာ တရုတ်ပြည်က ရိုက်လာတဲ့ စစ်သား နဲ့ သေနတ်ပုံတွေ့လို့ ပိုက်ဆံ ၁ သိန်းခွဲ တောင်းတယ်တဲ့၊ ဒါပေမယ့် တောင်းတောင်းပန်ပန် နဲ့ ၃ သောင်းပေးခဲ့ရတယ်” ဟု ၎င်းက ထပ်လောင်းပြောသည်။

အဆိုပါ စစ်ဆေးခံရသည့် တရုတ်ပြည်ပြန် မြန်မာရွှေ့ပြောင်း အလုပ်သမားသည် အသက် ၃၀ ကျော်ဖြစ်ပြီး မိုင်းရယ်မြို့နယ် မှ တရုတ်ပြည်ဘက်သို့ ၄ နှစ်ကျော်ကြာ အလုပ်သွားလုပ်ပြီး ပြန်လာသည့်အချိန်တွင် စစ်ဆေးခြင်းခံရကြောင်း သိရသည်။

“မီးသတ်စခန်းရှေ့မှာ လာစောင့်ပြီး စစ်ဆေးမှုတွေ လုပ်တာမျိုးတော့ မူးယစ်အဖွဲ့ နဲ့ လုံခြုံရေးအဖွဲ့ ပေါင်းပြီး တခါတလေမှ လုပ်ပါတယ်၊ ဘီးခွန်ကောက်တဲ့ မြို့အဝင် စစ်ဆေးရေး ဂိတ်မှာတော့ စစ်သားအစောင့် တစ်ယောက် နှစ်ယောက် နဲ့ ဘယ်ကလာ ဘယ်ကိုသွား ဆိုတာမျိုးပဲ စစ်တာ၊ မီးသတ်စခန်းရှေ့မှာ စောင့်ပြီး စစ်နေကြတာတော့ နည်းနည်းတင်းကြပ်တယ်၊ သွားလာဖို့လည်း လန့်ရတာပေါ့” ဟု မိုင်းရယ်မြို့ခံ အမျိုးသား တစ်ဦးက ပြောသည်။

အဆိုပါ မီးသတ်စခန်းရှေ့ရှိ မျက်နှာချင်းဆိုင်တွင် ဘီးခွန် ကောက်သည့် မြို့အဝင် စစ်ဆေးရေးဂိတ် ရှိနေပြီး ယခုကဲ့သို့ စစ်ကောင်စီတပ်ဖွဲ့မှ လာရောက်စစ်ဆေးခြင်းသည် အမြဲတမ်း မဟုတ်ကြောင်းလည်း ဒေသခံများက ပြောသည်။

ယင်းကဲ့သို့ စစ်ဆေးမှုများ တင်းကြပ်ထားသော်လည်း ပြီးခဲ့သည့် အောက်တိုဘာ ၂၀ ရက်နေ့တွင် အမည် မသိ၊ နေရပ်လိပ်စာ မသိရှိရသည့် လူတစ်စုသည် မိုင်းရယ်မြို့အတွင်းသို့ ရောက်လာပြီး ပြည်သူများ၏ နေအိမ်ကို ဆေးသုတ်ပေးမည်ဟု ပြောကာ ပိုက်ဆံများ လိမ်ယူသွားသည့် ဖြစ်စဥ်လည်း ဖြစ်ပွားခဲ့သည်။