သျှမ်းပြည်မြောက်ပိုင်း ကျောက်မဲမြို့နယ် စစ်ရှောင် ၅ ထောင်ကျော် နေရပ်ပြန်ရန် စစ်ကောင်စီမှ ဖိအားပေးနေသော်လည်း တိုင်းရင်းသား လက်နက်ကိုင်တပ်ဖွဲ့မှ နေရပ်သို့ ပြန်ခွင့် မပြုသေးကြောင်း စုံစမ်းသိရှိရသည်။
ကျောက်မဲမြို့နယ်အတွင်း တစ်နှစ်ကျော်ခန့် စစ်ဘေးတိမ်းရှောင်လာသည့် စစ်ရှောင်ဦးရေ (၅,၀၀၀) ကျော်သည် အောက်တိုဘာလကုန်တွင် စစ်ကောင်စီဘက်မှ နေရပ်သို့ ပြန်ရန် ပြောဆိုထားသော်လည်း TNLA တပ်ဖွဲ့မှ နေရပ်သို့ ပြန်ခွင့် မပေးကြောင်း စစ်ရှောင်တစ်ဦး က သျှမ်းသံတော်ဆင့် ကိုပြောသည်။
“အခု ကျနော်တို့ စစ်ရှောင်တွေတော့ တွေဝေနေတယ်။ စစ်ကောင်စီဘက်ကလည်း နေရပ်ကို ပြန်ခိုင်းနေတယ်။ တဖက်ကလည်း TNLA က နေရပ်မပြန်လာဖို့ ဟန့်တားထားနေတယ်။ ကျနော်တို့ ဒေသမှာ သူတို့ မြေမြှုပ်မိုင်းတွေ အများအပြား ရှိထားတယ်။ တကယ်လို့ ကျနော်တို့ ပြန်သွားရင် လုံခြုံရေး အတွက် တာဝန်မယူပေးနိုင်ဘူးလို့ သူတို့က ပြောတယ်။ အခုတော့ ပြန်ရမလား၊ မပြန်ရဘူးလား ဖြစ်နေတယ် “ဟု စစ်ရှောင်တစ်ဦး က ပြောသည်။
ယခု အောက်တိုဘာလကုန်ပိုင်းမှ စတင်ပြီး စစ်ရှောင်များကို လာရောက် ကူညီပေးနေသည့် အဖွဲ့အစည်းများ၊ ပရဟိတ အဖွဲ့များမှ စစ်ရှောင်များထံ စားနပ်ရိက္ခာ ထောက်ပံ့ခွင့် ပြုတော့မည် မဟုတ်ကြောင်း စစ်ကောင်စီ လက်အောက်ခံများက ပြောဆိုထားသည်ဟု ကျောက်မဲမြို့ စစ်ရှောင် တစ်ဦး ကပြောသည်။
“လက်ရှိ မြန်မာနိုင်ငံမှာ ငြိမ်းချမ်းနေတာကို မြင်အောင် ပြချင်တာ။ တိုက်ပွဲလည်း မရှိသလို စစ်ရှောင်များလည်း မရှိဘူးဆိုတာကိုပေါ့။ အဲ့ကြောင့် ကျနော်တို့ စစ်ရှောင်တွေကို နေရပ်ပြန်ပို့ခိုင်းတယ် “ ဟု ၎င်း အထက်ပါ ပုဂ္ဂိုလ်က ထပ်လောင်းပြောသည်။
ကျောက်မဲမြို့နယ်အတွင်း ပြီးခဲ့သည့် (၂၀၂၁) ခုနှစ်တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တပ်ဖွဲ့ တို့ တိုက်ပွဲဖြစ်ပွားသဖြင့် ကျောက်မဲမြို့နယ်အတွင်းရှိ ကျေးရွာ (၂၈) ရွာခန်ံ့ နေရပ်မှ ထွက်ပြေးတိမ်းရှောင်ခဲ့ရသည်။
လက်ရှိ ကျောက်မဲမြို့နယ်အတွင်းရှိ စစ်ရှောင်များသည် ကျောက်မဲမြို့ ရှမ်းစာပေ ယဥ်ကျေးမှု မြေနေရာနှင့် သျှမ်းပြည်တောင်ပိုင်း ဟိုပုံးမြို့နယ်ရှိ ပန်လုံကျေးရွာတွင် စစ်ဘေးတိမ်းရှောင်ထားကြောင်း သိရသည်။
