ကချင်ပြည်နယ် မိုးမောက်မြို့သို့ ရောက်ရှိနေသည့် စစ်ဘေးရှောင် (၆၀၀) ဝန်းကျင် အရေးပေါ် အကူအညီ လိုအပ်နေကြောင်း စုံစမ်းသိရှိရသည်။
ထို စစ်ရှောင်များသည် မိုးမောက်မြို့နယ် လုံဂျာကျေးရွာ နှင့် နောင်ပေါင်း ကျေးရွာမှ ဒေသခံများ ဖြစ်ကြပြီး ရှမ်းမေ့ရောင်ခြည် ဘုန်းကြီးကျောင်း နှင့် လောကမာရစိန် ဘုန်းကြီးကျောင်းသို့ အောက်တိုဘာ (၂၁) ရက်နေ့က စစ်ဘေးတိမ်းရှောင်လာခဲ့ကြောင်း မိုးမောက်မြို့ ရှမ်းစာပေ နှင့် ယဉ်ကျေးမှု ဥက္ကဌက သျှမ်းသံတော်ဆင့်ကို ပြောသည်။
“အခု လက်ရှိမှာက ကျနော်တို့ စစ်ဘေးရှောင်တွေအတွက် အစားအသောက်တွေ အရေးပေါ် လိုအပ်နေပါတယ်။ ဒီမှာက အသက်ကြီးတဲ့ သူတွေလည်းများတယ်။ ကလေးတွေလည်း များတယ်။ အစားအသောက်က လုံလောက်မှု မရှိထားဘူး” ဟု ၎င်းက ထပ်လောင်းပြောသည်။
ပြီးခဲ့သည့် အောက်တိုဘာ ၂၀ ရက်တွင် မိုးမောက်မြို့နယ် လုံဂျာတောင်ဝန်းကျင်တွင် စစ်ကောင်စီ နှင့် ကချင်လွတ်လပ် ရေး တပ်မတော် KIA တို့ တိုက်ပွဲ ပြင်းထန်စွာ ဖြစ်ပွားခဲ့ပြီး စစ်ကောင်စီဘက်မှ လေကြောင်းလိုင်းဖြင့် တိုက်ခိုက်ခဲ့ကြောင်း ဒေသခံများ ပြောပြချက်အရ သိရသည်။
“ မနေ့ ည ၁၀ နာရီကနေ ၁၂ နာရီအထိက သေနတ်သံတွေ ကြားနေရတယ်။ ဒီနေ့တော့ နည်းနည်းငြိမ်နေတယ်။ ပြီးတော့ အခုက စပါးတွေ ရိတ်သိမ်းချိန် ဖြစ်တယ်လေ။ လူငယ်တွေက နေ့လည်ဆိုရင် ပြန်သွားပြီး အလုပ်လုပ်တယ်။ ည အချိန်ဆိုရင် ဒီကို ပြန်လာကြတယ်။ မလုပ်ရင်လည်း နောက်နှစ်အတွက် ဝင်ငွေ မရှိကြဘူးလေ” ဟု အထက်ပါ ဥက္ကဌက ပြောသည်။
လက်ရှိ အချိန်ထိလည်း စစ်ကောင်စီ နှင့် KIA တို့ စစ်ရေးတင်းမာလျက်ရှိပြီး ယမန်နေ့ အောက်တိုဘာ ၂၆ ရက် ည ၁၀ နာရီမှ စပြီး တိုက်ပွဲ ဖြစ်ပွားခဲ့သည်။
အဆိုပါ နောင်ပေါင်ကျေးရွာ ဒေသခံများသည် ရှမ်းမေ့ရောင်ခြည်ကျောင်းသို့ စစ်ဘေးရှောင်လာရာတွင် ၃ ရက် ရှိပြီး လုံဂျာကျေးရွာဒေသခံများက လောကမာရစိန် ဘုန်းတော်ကြီးကျောင်းတွင် ၆ ရက် ရောက်ရှိပြီး ခိုလုံနေကြောင်း သိရသည်။
Leave a Comments