သျှမ်းပြည်အရှေ့ပိုင်း တာချီလိတ်မြို့နယ် ဖန်မင်ကျေးရွာအုပ်စုတွင် နေထိုင်သည့် CDM ကျောင်းဆရာမတစ်ဦးကို စစ်ကောင်စီက ဖမ်းဆီးသွားကြောင်း သိရသည်။
အဆိုပါ CDM ကျောင်းဆရာမ သည် ၎င်း၏ လူမှုကွန်ရက် စာမျက်နှာပေါ်တွင် “ဝင်ငွေမရှိပါဘူးဆို ဖုန်းကပျက်သေး ငိုးမ မအလ” ဟု ရေးသားဖော်ပြထားမှုကြောင့် အောက်တိုဘာ (၂၃) ရက်နေ့ ညပိုင်းတွင် ဆရာမ နှင့် ၎င်း၏အမျိုးသားကိုပါ စစ်ကောင်စီက လာရောက်ဖမ်းဆီးသွားကြောင်း ဒေသခံ အမျိုးသား တစ်ဦး က သျှမ်းသံတော်ဆင့် ကိုပြောသည်။
“ဆရာမက သူ့ရဲ့ လူမှုကွန်ရက်ပေါ်မှာ စစ်ကောင်စီ ကို ဆဲဆိုထားတဲ့ အသုံးအနှုန်း ရေးသားထားလို့ လာဖမ်းသွားတယ်။ စစ်ကောင်စီကို သတင်းသွားပေးလို့ နေမှာပေါ့။ စစ်ကောင်စီ နဲ့ ရဲတွေက သတင်း အချက်အလက်ရပြီး လာဖမ်းသွားတယ်။ သူပို့စ်က သူ့ယောကျာ်းအကောင့်ပါ တွဲထားတော့ သူ့ယောကျာ်းပါ ဖမ်းသွားတယ်” ဟု ၎င်း ဒေသခံ တစ်ဦးက ပြောသည်။
CDM ကျောင်းဆရာမဖြစ်သူ ဒေါ်ခင်လတ်လတ်ထွေး နှင့် အမျိုးသား ဖြစ်သူ ကိုဇော်မင်းဦး တို့ နှစ်ဦးကို အောက်တိုဘာ (၂၅) ရက်နေ့က တာချီလိတ်မြို့ ဟောင်လိတ် ရဲစခန်းမှာ ရာဇသတ်ကြီး ဥပဒေ ပုဒ်မ (၅၀၅-က) ဖြင့် အမှုဖွင့်ထားကာ ဖမ်းဆီးထားကြောင်း နီးစပ်သူ အသိုင်းအဝိုင်းမှ သျှမ်းသံတော်ဆင့်ကို ပြောသည်။
“အရင်တုန်းကတော့ ကျနော်တို့ ရွာမှာရှိတဲ့ စာသင်ကျောင်းမှာ စာသင်ပေးနေတဲ့ ဆရာမ။ စစ်အာဏာသိမ်းပြီး နောက်ပိုင်းမှ ဆရာမက CDM ဝင်သွားတာ။ အခု သူတို့ မိသားစုတွေက အခန်းဌားပြီး နေနေတာ။ တချို့တွေက ဆရာမနဲ့ မတည့်တာ၊ ဆရာမကို မနာလိုတာကြောင့် စကစကို သတင်းတွေ သွားပေးလို့ ဖြစ်မယ်။ အဲ့ကြောင့် အခုလိုဖမ်းခံရတယ် “ ဟု မန်ယန်းကျေးရွာဒေသခံ တစ်ဦး ကပြောသည်။
CDM ဝင်ထားသော ကျောင်းဆရာမ ဒေါ်ခင်လတ်လတ်ထွေးသည် မယ်ယန်းကျေးရွာ အ.ထ.က အထက်တန်းကျောင်းတွင် အလယ်တန်းပြ ဆရာမတစ်ဦးဖြစ်သည်။
ထို့အပြင် စစ်အာဏာသိမ်းပြီး ၂ နှစ် နီးပါး ကာလအတွင်း မယ်ယန်းကျေးရွာတွင် ပြည်သူ ၄ ဦး ဖမ်းဆီးခံထားရပြီး သျှမ်းပြည်အတွင်းရှိ ပြည်သူများကို ပြည်သူ့ကာကွယ်ရေး တပ်ဖွဲ့ PDF နှင့် ပတ်သက်မှုများဖြင့် စွပ်စွဲခံထားရပြီး ဖမ်းဆီးခံထားရသော ပြည်သူ အများပြားရှိနေကြောင်း သိရသည်။
မြန်မာနိုင်ငံတွင် ၂၀၂၁ ခုနှစ် အာဏာပြီးနောက်ပိုင်း ၂၀၂၂ အောက်တိုဘာ ၂၅ ရက်နေ့ထိတိုင် ဖမ်းဆီးချုပ်နှောင်ခြင်း ခံထားရသူ စုစုပေါင်း (၁၂,၇၅၄) ဦး ရှိနေပြီး ၎င်းတို့အနက်မှ (၁,၅၉၃) ဦးမှာ ထောင်ဒဏ်ချမှတ်ခြင်း ခံထားရကြောင်း အောက်တိုဘာ ၂၅ ရက်စွဲဖြင့် AAPP ၏ ထုတ်ပြန်ချက်မှ သိရသည်။
Leave a Comments