သျှမ်းပြည်မြောက်ပိုင်း မူဆယ်မြို့နယ် မုံးပေါ်ဒေသ တိုက်ပွဲအတွင်း စစ်ကောင်စီ ပစ်လိုက်သည့် လက်နက်ကြီးကြောင့် အမျိုးသား ၁ ဦး နှင့် အမျိုးသမီး ၂ ဦး ထိခိုက်ဒဏ်ရာရကြောင်း သတင်းသိရသည်။

ယမန်နေ့ အောက်တိုဘာ ၂၅ ရက်နေ့ ညနေ ၇ နာရီ ဝန်းကျင်တွင် မုံးပေါ်ရှိ မိုင်ဖန် စစ်ကောင်စီတပ်ကို KIA တပ်ဖွဲ့မှ လာရောက်တိုက်ခိုက်ခဲ့ပြီး စစ်ကောင်စီတပ်ဖွဲ့ ပစ်လိုက်သည့် လက်နက်ကြီး ကျည်ဆန် ၁ လုံးက ဈေးရွာ အတွင်းသို့ ကျရောက်ပေါက်ကွဲရာ အရပ်သား ပြည်သူ ၃ ဦး ထိခိုက် ဒဏ်ရာရခဲ့ကြောင်း မုံးပေါ်မှ အသက် ၅၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

“မုံးပေါ်က မိုင်ဖန် စစ်ကောင်စီ တပ်စခန်းကို KIA တွေက လာတိုက်ခိုက်ခဲ့တာပါ၊ ၁၀၅ မိုင်က စစ်ကောင်စီတပ်က လက်နက်ကြီး နဲ့ လှမ်းပစ်ကူတာ၊ ဈေးရွာထဲကို လက်နက်ကြီး ၂ လုံးကျတာ တစ်လုံးပဲကွဲတယ်၊ ကွဲတဲ့ တစ်လုံးက အမျိုးသား ၁ ဦး နဲ့ အမျိုးသမီး ၂ ဦး ဒဏ်ရာရတယ်၊ သိပ်တော့ မစိုးရိမ်ရဘူး” ဟု အထက်ပါ အမျိုးသားက ပြောသည်။

လက်နက်ကြီးကြောင့် ထိခိုက်ဒဏ်ရာ ရသူများအနက် အမျိုးသား နှင့် အမျိုးသမီးတစ်ဦးသည် ဦးခေါင်း ထိခိုက် ဒဏ်ရာရပြီး၊ ကျန်သည့် အမျိုးသမီး ၁ ဦးသည် ဝမ်းဗိုက်မှာ ထိခိုက် ဒဏ်ရာ ရရှိထားကြောင်း သတင်း သိရသည်။

စစ်ကောင်စီတပ်ဖွဲ့တို့ ပစ်ခတ်လိုက်ပြီး မပေါက်ကွဲသေးသည့် လက်နက်ကြီး တစ်လုံးသည် ဒေသခံ အိမ်ဝန်းအတွင်း ရှိနေသည့်အတွက် အိမ်ရှင်များက ကတုတ်ကျင်းအတွင်းသာ ဆက်လက်ရှိ နေကြောင်း သိရသည်။

“မနေ့က လက်နက်ကြီးတွေ ပစ်နေတုန်း ရွာသားတွေက ကြောက်ပြီး ပုန်းခိုနေကြရတယ်။ ကတုတ်ကျင်းမရှိသေး တဲ့ အိမ်တွေလည်း ဒီနေ့မှာ စတူးနေကြပြီ၊ လက်နက်ကြီး တစ်လုံးက မကွဲပေမယ့် အိမ်ဝန်းအတွင်းမှာပဲ ရှိလို့ အိမ်ရှင် မိသားစုတွေက ကတုတ်ကျင်းထဲမှာပဲ ရှိနေကြတုန်းပဲ”ဟု မုံးပေါ်မှ အသက် ၅၀ ကျော် အထက်ပါ အမျိုးသား က သျှမ်းသံတော်ဆင့်ကို ဆက်ပြောသည်။

အဆိုပါ တိုက်ပွဲကြောင့် ထိခိုက်ဒဏ်ရာရသူများသည် အသက် ၃၀ ကျော် အမျိုးသား နှင့် အမျိုးသမီး ၁ ဦး၊ အသက် ၅၀ နီးပါး အမျိုးသမီးတစ်ဦး တို့ဖြစ်ကြပြီး လက်ရှိ မုံးပေါ်မှ ကျေးလက်ဆေးပေးခန်းတွင် ကုသမှုခံယူ နေလျက်ရှိကြောင်းလည်း သိရသည်။

ပြီးခဲ့သည့် အောက်တိုဘာလ ၂၃ ရက်ညတွင် ဖားကန့်မြို့မှ KIA တပ်မဟာ ၉ နယ်မြေ အတွင်း KIO တည်ထောင်ခြင်း ၆၂ နှစ်ပြည့် အထိမ်းအမှတ်နေ့ ပွဲကျင်းပနေစဉ် စစ်ကောင်စီမှ ဂျက်လေယာဉ် ၃ စီးဖြင့် လာရောက် ဗုံးကြဲ တိုက်ခိုက်ခဲ့သည့် ဖြစ်စဥ် ဖြစ်ပွားခဲ့ဖူးသည်။

ယင်းကဲ့သို့ ဖြစ်စဥ်ဖြစ်ပွားပြီးနောက် သျှမ်းပြည်မြောက်ပိုင်းရှိ မုံးပေါ်မှ မိုင်ဖန် စစ်ကောင်စီတပ်ကို KIA တပ်ဖွဲ့မှ ဝင်ရောက် တိုက်ခိုက်ခဲ့ခြင်း ဖြစ်ကြောင်း သတင်းသိရသည်။

လက်ရှိတွင်လည်း မုံးပေါ်ဒေသအတွင်း အာဏာသိမ်း စစ်ကောင်စီတပ်ဖွဲ့ နှင့် KIA တပ်ဖွဲ့တို့မှ စစ်ရေးတင်းမာမှုများ ရှိနေသေးသည့်အတွက် တိုက်ပွဲဆက်လက်ဖြစ်ပွားမည်ကို စိုးရိမ်ကြောက်လန့်ကြောင်း သတင်းသိရသည်။