သျှမ်းပြည်အရှေ့ပိုင်း တာချီလိတ်မြို့ မိုင်းဖုန်း (က) ကျေးရွာအုပ်စုအတွင်း မြန်မာ – ထိုင်းနယ်စပ် မဲခေါင်မြစ်ဘေးရှိ ဇွဲသာယာကမ်းခြေတွင် သေနတ်ပစ်ခတ်မှု ဖြစ်ပွားပြီး အမျိုးသမီးတစ်ဦး သေဆုံးသွားကြောင်း စုံစမ်း သိရှိရသည်။
ယမန်နေ့ အောက်တိုဘာ ၂၅ ရက် ညပိုင်း ၇ နာရီ ဝန်းကျင်တွင် ဇွဲသာယာကမ်းခြေ ပိုင်ရှင် ဦးဇွဲ၏ နေအိမ်ခြံဝန်းထဲတွင် ခွေးအချင်းချင်း ကိုက်နေစဉ်အတွင်း ၎င်းက ပစ္စတိုသေနတ်ဖြင့် ပစ်ပြီး ခွေးများ မောင်းထုတ်ခဲ့ကြောင်း ဆိုသည်။
အဆိုပါ ပစ်ဖောက်လိုက်သော ကျည်ဆံသည် ခွေးများကို မထိပဲ အနီးရှိ ဈေးသည်အမျိုးသမီးတစ်ဦးကို ကျည်ထိမှန်ခဲ့ပြီး သေဆုံးသွားကြောင်း တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ဇွဲသာယာ ကမ်းခြေပိုင်ရှင် ကိုယ်တိုင်က သေနတ်နဲ့ ပစ်မိတာ။ ခြံဝန်းထဲက ခွေးကိုချိန်ပြီး ပစ်တာမမှန်ပဲ၊ ဈေးသည်ကို သွားမှန်တယ်။ ကျည်က ရင်ဘတ်ကို မှန်သွားတော့ တာချီလိတ် ပြည်သူ့ဆေးရုံကို ခေါ်သွားတယ်။ အဲ့ဆေးရုံမှာပဲ ဆုံးသွားတယ်။ ဈေးသည်ကတော့ ဘယ်သူမှန်း မသိဘူး “ ဟု ၎င်း အမျိုးသားတစ်ဦး ကပြောသည်။
ပစ္စတိုသေနတ်ဖြင့် ပစ်ခတ်ခံရသော အမျိုးသမီးသည် အသက် (၄၀) အရွယ်ရှိပြီး ဇွဲသာယာကမ်းခြေတွင် ဈေးရောင်းနေကြောင်း သိရသည်။
ပြစ်မှုကျုးလွန်သူ ဇွဲသာယာကမ်းခြေပိုင်ရှင် ဦးဇွဲဆိုသူမှာ လက်ရှိတွင် ရာဇာသတ်ကြီးပုဒ်မ ၃၀၂ ဖြင့် ရဲတပ်ဖွဲ့များက အမှုဖွင့် အရေးယူထားကြောင်း ဆိုသည်။
“ အခု သူတို့တော့ အရေးယူထားတယ်။ ဇွဲသာယာကမ်းခြေက တာချီလိတ်မြို့ရဲ့ အပြင်ဘက်မှာရှိတယ်။ ကျနော်တို့နဲ့တော့ ၂၀ ကီလိုမီတာလောက်တော့ ဝေးတယ်။ အဲ့နေရာမှာ အပန်းသွားဖြေတဲ့ နေရာတစ်ခုဖြစ်ပြီး ရေသွားဆော့လို့လည်း ရတယ်။ ဦးဇွဲ ဆိုသူက တပ်ထွက်ဖြစ်ပြီး အခု ဇွဲသာယာကမ်းခြေကို ဖွင့်လှစ်ထားတာ။ ဈေးသည်တွေအတွက် တဲတွေဆောက်ထားပြီး အဌားပေးတယ်။ သူဖွင့်ထားတာက ၁၀ နှစ်ခန့်တော့ ရှိပြီ” ဟု ၎င်းဒေသခံတစ်ဦးက ထပ်လောင်းပြောသည်။
ဦးဇွဲသည် စစ်တပ်မှ ထွက်လာသော စစ်ထွက်တစ်ဦးဖြစ်ပြီး ထိုင်း-မြန်မာ နယ်စပ်မဲခေါင်မြစ်ဘေးတွင် ၁၀ နှစ်ခန့်ကြာ ဇွဲသာယာကမ်းခြေအမည်ဖြင့် ပုဂ္ဂလိက ကမ်းခြေ ဖွင့်လှစ်ထားကြောင်း သိရသည်။
