သျှမ်းပြည်မြောက်ပိုင်း ကျောက်မဲမြို့နယ် နမ့်မန်းကျေးရွာအုပ်စုရှိ ဒေသခံများ၏ ကျွဲများ မကြာခဏ ပျောက်ဆုံးမှု ရှိနေကြောင်း စုံစမ်း သိရှိရသည်။
ကျောက်မဲမြို့သို့ (၁) နှစ်ကျော်ကြာ စစ်ဘေးတိမ်းရှောင်နေသည့် နမ့်မန်းကျေးရွာမှ ဒေသခံ၏ ကျွဲလေးကောင် ပျောက်ဆုံးနေပြီး ယနေ့အချိန်အထိ အစအန မသိရသေးကြောင်း လုံခြုံရေးအရ အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“၁၀ ကောင်ကျော်ရှိတဲ့ ကျွဲအုပ်ကို အသက် ၅၀ ကျော် အမျိုးသားတစ်ဦးက ထိန်းတာ၊ ပြီးခဲ့တဲ့ အောက်တိုဘာလဆန်းပိုင်းက စပြီး စားကျက်တွေဆီကို လွတ်တဲ့ ကျွဲအုပ်က တစ်ကောင်စ နှစ်ကောင်စ ပျောက်လာတာ၊ အခုဆို ပျောက်တဲ့ ကျွဲက စုစုပေါင်း ၄ ကောင်ရှိပြီ ဘယ်လိုရှာရှာ ရှာလို့မတွေ့ဘူး” ဟု အထက်ပါ ပုဂ္ဂိုလ်က ပြောသည်။
တိုင်းရင်းသား လက်နက်ကိုင် တိုက်ပွဲများကြောင့် နမ့်မန်းကျေးရွာမှ ဒေသခံများသည် ကျောက်မဲမြို့ ရပ်ကွက် (၇) ရှိ ၁၁ မိုင် စစ်ဘေးရှောင်စခန်းတွင် နေထိုင်ကြပြီး ကျွဲရှိသူများလည်း ကျွဲတင်းကုပ် ဆောက်လုပ်ကာ ကျွဲများကို ထိန်းကျောင်းနေကြောင်း ဒေသခံများက ပြောသည်။
လက်ရှိ ပျောက်ဆုံးသွားသော ကျွဲများသည် တင်းကုပ်မှ စားကျက်သို့ လွတ်သည့်အချိန်တွင် ပျောက်ဆုံးသွားခြင်း ဖြစ်ပြီး ကာလတန်ဖိုးအရ ကျွဲတစ်ကောင် ကျပ်သိန်း ၂၀ ဝန်းကျင် ရှိပြီး ယနေ့ အောက်တိုဘာ (၂၅) ရက်နေ့ထိ သတင်းအချက်အလက် မသိရှိရကြောင်း အထက်ပါ ပုဂ္ဂိုလ်က ဆက်ပြောသည်။
“ ၁၁ မိုင်မှာက ကျွဲကျောင်းဖို့ နေရာမရှိလို့ လယ်ကွင်းတွေဘက်မှာ လွတ်ရတာ ရှိတယ်၊ တခါတလေလည်း နမ့်မန်း ရွာဟောင်းဘက်ကို သွားတာရှိတယ်၊ အခု ပျောက်သွားတဲ့ကျွဲက အမ ၃ ကောင် အထီး ၁ ကောင်ပါ၊ လက်ရှိ တန်ဖိုး အရ ကျွဲအထီးတစ်ကောင်ကို ကျပ်သိန်း ၂၀ လောက်ပေါက်ဈေးရှိတော့ ပိုင်ရှင်ဖြစ်သူက နှမြောတာပေါ့” ဟု ၎င်းက ပြောသည်။
ပြီးခဲ့သည့် သြဂုတ်လ အတွင်းမှာလည်း နမ့်မန်းရွာအနီးတစ်ဝိုက်မှာ သေနတ်ဒဏ်ရာများဖြင့် လဲကျသေဆုံး နေသည့် ကျွဲများ တွေ့မြင်ခဲ့သည့် ဖြစ်စဥ်လည်း ရှိခဲ့ကြောင်း သတင်း သိရသည်။
အဆိုပါ နမ့်မန်းရွာအနီးတစ်ဝိုက်တွင် မြောက်ပိုင်းမဟာမိတ် တပ်ဖွဲ့ဝင်ဖြစ်သည့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့ မှ သွားလာလှုပ်ရှားနေကြောင်းလည်း သတင်း သိရသည်။
