သျှမ်းပြည်တောင်ပိုင်း ဖယ်ခုံမြို့နယ် အရှေ့ဘက်ကမ်းရှိ အင်းလှေဆိပ်ကို စစ်ကောင်စီမှ ပိတ်ထားပြီး သွားလာမှု ပြုလုပ်သူများကို ပစ်ခတ်မှုရှိနေကြောင်း စုံစမ်းသိရှိရသည်။
ယခုရက်ပိုင်း အောက်တိုဘာ တတိယပတ်အတွင်း အင်းထဲသွားလာသူများကို စစ်ကောင်စီက ပစ်ခတ်မှု ရှိနေကြောင်း ဖယ်ခုံ PDF တပ်ရင်း (၂) တာဝန်ရှိသူ တစ်ဦး ကပြောသည်။
အဆိုပါ အင်းလှေကြောင်းလမ်းကို PDF မှ အသုံးပြုပြီး စစ်ကောင်စီ လက်အောက်ခံ ထွေအုပ်ရုံးကို လက်နက်ကြီးဖြင့် ပစ်ခတ်ခဲ့သည့် လမ်းကြောင်း ဖြစ်ခဲ့ဖူးကြောင်း ဖယ်ခုံ PDF ထံမှ သိရသည်။
“ပစ်ခတ်တာတော့ ဟုတ်တယ်။ ကျနော်တို့လည်း အဲ့လိုကြားမိတယ်။ ဘယ်သူ့ လှေဆိပ်ကို ပစ်တာလဲတော့ မသိရဘူး။ သူတို့ လှေဆိပ်ကို ပိတ်လိုက်ကတည်းက သွားလာတာတွေရှိရင် ပစ်တယ်တဲ့။ ထိခိုက်ဒဏ်ရာ ရတဲ့ သူတွေ ရှိတာတော့ မကြားသေးဘူး။ သူတို့ပစ်တာ အခု ရက်ပိုင်းပဲ ရှိသေးတယ်။ အဲ့လမ်းကြောင်းနဲ့လည်း ကျနော်တို့ သူတို့ ထွေအုပ်ရုံးကို ပစ်ခတ်ခဲ့ဖူးတယ်” ဟု ၎င်း ကပြောသည်။
အဆိုပါ စစ်ကောင်စီသည် အင်းအရှေ့ဘက်ကမ်းရှိ လှေဆိပ်ကို ပိတ်ထားလိုက်ပြီး အနောက်ဘက်ကမ်းမှ အရှေ့ဘက်သို့ လာသည့်သူများကိုလည်း ပစ်ခတ်မှုရှိကြောင်း သိရသည်။
ထိုအပြင် စစ်ကောင်စီများက အင်းဖက်တွင် နေ့စဉ် အမြဲစောင့်ကြည့် စစ်ဆေးနေလျက်ရှိကြောင်း သိရသည်။
“မြို့ထဲကော၊ အင်းဖက်တွေကော သူတို့ အတွက် အမြဲစစ်ဆေး သွားလာနေတာတော့ ရှိတယ်။ သူတို့ပိတ်ထားတာက အရှေ့ဘက်ကမ်းကို ပိတ်ထားတာ။ အနောက်ဘက်ကမ်းကိုတော့ မပိတ်ဘူးတဲ့။ ဒါမယ့်လည်း ဘယ်သူမှ သိပ်မသွားလာရဲဘူး။ အနောက်ဘက်ကမ်းကနေ အရှေ့ဘက်ကမ်းရောက်ရင် သူတို့တွေ့ရင်တော့ ပစ်ရင်ပစ်မှာပေါ့” ဟု အထက်ပါ ပုဂ္ဂိုလ် ကပြောသည်။
ထိုလှေဆိပ်လမ်းကြောင်းသည် ဖယ်ခုံ အင်းအရှေ့ဘက်ကမ်း နှင့် ညောင်ရွှေ အင်းလေး အထိ ခရီးလမ်းကြောင်း ပေါက်သည်ဟု သိရသည်။
ဖယ်ခုံမြို့ အင်းလှေဆိပ်သည် တိုက်ပွဲဖြစ်ပွားမှုမရှိပေမယ့် စစ်ကောင်စီက အောက်တိုဘာ ၁၈ ရက်နေ့မှ စတင်ပြီး အင်းလှေဆိပ်ကို ပိတ်လိုက်ခြင်းဖြစ်ကြောင်း သိရသည်။
