သျှမ်းပြည်မြောက်ပိုင်း မိုင်းရယ်မြို့နယ်အတွင်းတွင် အမည်မသိသည့် အမျိုးသား ၆ ဦး တို့သည် အိမ်ဆေးသုတ်ပေးမည်ဟု အကြောင်းပြချက်ဖြင့် ဒေသခံများထံ ပိုက်ဆံ လိမ်လည်တောင်းယူသွားကြောင်း စုံစမ်း သိရသည်။
ယမန်နေ့ အောက်တိုဘာ ၂၀ ရက်နေ့ မနက် ၁၀ နာရီ ဝန်းကျင်တွင် မန်ပုံကျေးရွာသို့ အမျိုးသား ၆ ဦး၊ ဆိုင်ကယ် ၃ စီးဖြင့် ရောက်လာပြီး မန်ကောင်းရပ်ရှိ ရွာလူကြီး လုံးစိုင်း ၏အိမ်ကို ဆေးသုတ်ပေးမည် ဟု ပြောကာ ပိုက်ဆံများ လိမ်ယူသွားကြောင်း သိရသည်။
“လုံးစိုင်းတို့ အိမ်က နှစ်ထပ်ဖြစ်တယ်၊ အောက်ထပ်က အုတ် နဲ့ အပေါ်က ပျဥ်ကာအိမ်ပေါ့၊ ဗမာစကားပြော ၆ ယောက်က အိမ်ဆေးသုတ်ပေးမယ်တဲ့၊ လုံးစိုင်းက ခွင့်မပြုသေးဘူး၊ သူတို့က ဆေးတွေ ဖြန်းပြီး အိမ်အောက်ထပ် ကို ဆေးသုတ်သွားတာ၊ အိမ်ရှင်ကလည်း ဆေးနံ့ နဲ့ တို့ဆေးမိသလိုမျိုး ကြောင်တောင်တောင်ဖြစ်ပြီး ဘာစကားမှ မပြောနိုင်ခဲ့ဘူး၊ သူတို့ ဆေးသုတ်ပြီး ပိုက်ဆံကို ၂ သိန်းခွဲ တောင်းတယ်၊ အိမ်ရှင် လက်ထဲမှာ ပိုက်ဆံ ၂ သိန်းပဲ ရှိနေတော့ အဲ့ ၂ သိန်းလုံးကို သူတို့ ယူသွားတယ်” ဟု လုံးစိုင်း၏ ဆွေမျိုးတော်စပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ အမျိုးသား ၆ ဦးတို့ အိမ်ကို သုတ်သွားသည့် ဆေးသည် အပြာရောင်ဖြစ်ပြီး ပြင်းရှရှ အနံ့ရှိကြောင်း နှင့် အဆိုပါ ရနံ့ကြောင့် အိမ်ရှင် တစ်မိသားစုလုံးက တို့ဆေးမိသလို ဖြစ်ပြီး အသိစိတ်လွတ်ကာ ၎င်းတို့ ပြောသမျှ လိုက်လုပ်ပေးလိုက်ရကြောင်း လုံးစိုင်း၏ ဆွေမျိုး တော်စပ်သူ တစ်ဦးက သျှမ်းသံတော်ဆင့်ကို ပြောသည်။
ယခုလ အောက်တိုဘာလ တတိယပတ်အတွင်းမှာ မိုင်းရယ်မြို့နယ် နားဖျိုင်းကျေးရွာတွင်လည်း ယင်းဖြစ်စဥ်လို မျိုး ကြုံတွေ့ ရပြီး ပိုက်ဆံ ၈ သိန်း ဆုံးရှုံး လိုက်ရကြောင်း စုံစမ်းသိရသည်။
“နားဖျိုင်းရွာမှာလည်း အိမ်ကို ဆေးသုတ်ပေးမယ်ဆိုပြီးတော့ တစ်အိမ်လုံးကို အပြာရောင် ဆေးသုတ်သွားတာ၊ အနံ့ ကလည်း အရမ်းပြင်းပြီး အိမ်ရှင်တွေက တို့ဆေးမိသလိုဖြစ်ပြီး သူတို့ပိုက်ဆံ တောင်းတဲ့အချိန် သေတ္တာထဲ ရှိတဲ့ ပိုက်ဆံ ၈ သိန်းလုံး ကို ထုတ်ပေးရတာ၊ သူတို့က ပိုက်ဆံယူပြီး ထွက်သွားတာ ခဏအကြာမှ အိမ်ရှင်တွေ အသိဝင်လာပြီး လိုက်ပေမဲ့ မမှီတော့ဘူး” ဟု ဖြစ်စဥ်ကို သိသည့်အမျိုးသမီးတစ်ဦးက ပြောသည်။
လက်ရှိတွင် အဆိုပါ ဆေးလိုက်သုတ်ပေးနေသည့် အဖွဲ့ကို သက်ဆိုင်ရာ တာဝန်ရှိသူများက လိုက်လံရှာဖွေနေပြီး အနယ်နယ် အရပ်ရပ်မှ ပြည်သူများ သတိထား နေထိုင်ကြရန် လိုအပ်ကြောင်း မန်ပုံကျေးရွာအုပ်စု ဥက္ကဌ လုံးဆောက သျှမ်းသံတော်ဆင့် ကိုပြောသည်။
“ဒီလိုမျိုး ကိစ္စက ရွာသားတွေ ခက်ခက်ခဲခဲရှာလာတဲ့ ငွေကြေးကို မတရားတဲ့ နည်း နဲ့ အတင်းယူသွားသလို ဖြစ်နေတယ်၊ ဒါကြောင့် ထပ်မဖြစ်ရအောင် အနယ်နယ် အရပ်ရပ်က ပြည်သူတွေ သတိထားပါ၊ သူတို့အုပ်စု နဲ့ အတွေ့မခံပါနဲ့၊ ကျနော်တို့ သက်ဆိုင်ရာကလည်း သူတို့ကို ရှာဖွေနေပါတယ်” ဟု လုံးဆောက ပြောသည်။
ယခုလို ဖြစ်စဥ်မျိုးသည် မိုင်းရယ်မြို့နယ် အပြင် သျှမ်းပြည်မြောက်ပိုင်းရှိ ကွတ်ခိုင်မြို့နယ်၊ နမ့်ခမ်းမြို့နယ်၊ မူဆယ်မြို့နယ် နှင့် ပြီးခဲ့သည့် စက်တင်ဘာလတွင်လည်း သျှမ်းပြည်တောင်ပိုင်း အောင်ပန်းမြို့တွင် လူစုတစ်ဖွဲ့က နေအိမ်ထဲဝင်လာပြီး ဆေးအတင်းလာရောက် သုတ်ပေးကာ ငွေတောင်းခံမှုလည်း ရှိခဲ့ကြောင်း သိရသည်။
စစ်တပ် အာဏာသိမ်းပြီးနောက်ပိုင်းတွင် ပြည်သူများ စားဝတ်နေရေး နှင့် ဝမ်းစာရှာဖွေ စားသောက်ရေးလည်း ခက်ခဲလာပြီး လောင်းကစားဝိုင်းများ၊ မူးယစ်ဆေးဝါးများ၊ သူခိုးများ၊ ဓားပြများ ပိုမို များပြားလာသော်လည်း တာဝန်ရှိ ရဲများက ဖမ်းဆီး အရေးယူမှုများလည်း မရှိကြောင်း သိရသည်။
