သျှမ်းပြည်မြောက်ပိုင်း မူဆယ်မြို့ စွမ်ဆော် ရပ်ကွက်ရှိ မြို့မ ပြည်သူ့စစ် ခေါင်းဆောင်နေထိုင်ရာ အိမ် နှင့် တပ်စခန်း (၁) နေရာ ကို လက်နက်ကိုင် တပ်ဖွဲ့မှ ဝင်ရောက်တိုက်ခိုက် ခဲ့ကြောင်း စုံစမ်းသိရှိရသည်။
ယနေ့ အောက်တိုဘာ (၂၁) ရက် နံနက် ၄ နာရီဝန်းကျင်တွင် အမှတ် (၃) မြို့မ ပြည်သူ့စစ်တပ်ဖွဲ့ နေထိုင်သည့် နေအိမ် နှင့် မူဆယ်မြို့ ရေအား လျှပ်စစ်အနီးရှိ ပြည်သူ့စစ်တပ်စခန်း ကို TNLA နှင့် ပြည်သူ့ကာကွယ်ရေးတပ်ဖွဲ့ (PDF) တို့က ဝင်ရောက် ပစ်ခတ်ပြီးနောက် နှစ်ဖက် အပြန်အလှန် လက်နက်ကြီး လက်နက်ငယ်ဖြင့် တိုက်ပွဲဖြစ်ပွားခဲ့ကြောင်း မူဆယ်ဒေသခံ အမျိုးသားတစ်ဦး ကပြောသည်။
“ ဒီနေ့ မနက် ၄ နာရီ ၇ မိနစ် အချိန်က သေနတ်သံတွေ စပြီး ကြားရတယ်။ မြို့မ ပြည်သူ့စစ် အမှတ် (၃) နေတဲ့ ၄ ထပ်တိုက်နေအိမ် နဲ့ မူဆယ်မြို့ ရေအား လျှပ်စစ်မှာရှိတဲ့ ပြည်သူ့စစ် တပ်စခန်းကို PDF နဲ့ TNLA တွေက ဝင်ရောက် တိုက်ခိုက်ခဲ့တယ်။ သူတို့ နှစ်ဖက် အပြန်အလှန် တိုက်ပွဲဖြစ်တာက နာရီဝက်လောက်ကြာတယ်။ ထိခိုက်ဒဏ်ရာရတဲ့ သူတော့ မသိရသေးဘူး“ ဟု ၎င်း ဒေသခံ တစ်ဦးက ပြောသည်။
အဆိုပါ ပြည်သူ့စစ်တပ်ဖွဲ့ နှင့် TNLA ပူးပေါင်းတပ်ဖွဲ့ PDF တို့ နှစ်ဖက်အပြန်အလှန် နာရီဝက်ကြာအောင် တိုက်ပွဲ ဖြစ်ပွားပြီးနောက် ပြည်သူ့စစ်ဘက်မှ တစ်ဖတ်သတ် လက်နက်ကြီး၊ လက်နက်ငယ် ဖြင့် ဆက်လက်ပစ်ခတ်ခဲ့ကြောင်း ၎င်း က ဆက်ပြောသည်။
တိုက်ပွဲဖြစ်ပွားမှုကြောင့် ၎င်း ပတ်ဝန်းကျင်အနီးရှိ ပြည်သူများ၏ နေအိမ်၊ ဘုန်းကြီးကျောင်း ဇရပ်များက ပျက်စီးမှုများ ရှိခဲ့သော်လည်း ထိခိုက်ပျက်စီးဆုံးရှုံးမှု၏ တန်ဖိုးကိုတော့ မသိရှိရသေးပေ။
“နှစ်ဖက် အပြန်အလှန် ပစ်ခတ်တော့ နေအိမ်တွေ၊ ဘုန်းကြီးကျောင်းက ဇရပ်တွေ လက်နက်ကြီး ကျည်ထိပြီး ပျက်စီးတာတွေ ရှိပါတယ်။ လူတွေတော့ ထိခိုက်ဒဏ်ရာ မရှိဘူး။ ပြည်သူနေအိမ်တွေတော့ ပျက်စီးမှုများတယ် “ ဟု ၎င်းဒေသခံတစ်ဦးက ထပ်လောင်းပြောသည်။
အလားတူ အောက်တိုဘာ ၁၉ ရက်တွင်လည်း မူဆယ်မြို့ စစ်ကောင်စီ၏ တပ်မ (၉၉) လက်အောက် ခမရ (၄၂၁) တပ်ရင်းမှူး ဒု-ဗိုလ်မှူးကြီး ပြည့်ဖြိုးအောင် နှင့်အတူ အရာရှိ တစ်ဦးအား ရှမ်းပြည်နယ်မြောက်ပိုင်း ပြည်သူ့လုံခြုံရေးနှင့်ကာကွယ်ရေးတပ်ဖွဲ့ က တိုက်ခိုက်ခဲ့ကြောင်း သိရသည်။
