သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင်းရှိ ပြည်သူများထံ ပြည်သူ့စစ်ထဲဝင်ရန် စစ်ကောင်စီ လက်အောက်ခံများက လိုက်လံစည်းရုံးနေကြောင်း စုံစမ်းသိရှိရသည်။
ယခု အောက်တိုဘာလ ပထမပတ် မှစတင်ပြီး အင်းလေးဒေသ အင်းပေါခုံကျေးရွာရှိ စစ်ကောင်စီသည် ပြည်သူများကို ပြည်သူ့စစ်ထဲ ဝင်ရန်အတွက် တစ်ယောက်လျှင် ကျပ်ငွေ တစ်သိန်းခွဲ နှင့် ဆန်တစ်အိတ် ထောက်ပံ့ကြေးပေးမည်ဟု လိုက်လံစည်းရုံးနေကြောင်း အင်းလေးဒေသခံ တစ်ဦး က သျှမ်းသံတော်ဆင့် ကိုပြောသည်။
လက်ရှိ ရွှေဘို ပေါ်ဆန်းမွှေး ဆန်တစ်အိတ် တန်ဖိုးသည် တစ်သိန်း ဝန်းကျင်ရှိပြီး စစ်ကောင်စီမှ ထောက်ပံ့မည့် ဆန်သည် မည်သည့် ဆန်အမျိုးအစားဖြစ်သည်ကို မသိရှိရသေးပေ။
“အင်းပေါခုံရွာ နဲ့ တချို့ရွာမှာရှိတဲ့ အုပ်ချုပ်ရေးမှူးတွေကို လာစည်းရုံးတာ တွေ့ရတယ်။ ပြည်သူ့စစ်ထဲ ဝင်ဖို့ လူရှာခိုင်းတယ်။ ပြည်သူ့စစ်ထဲ ဝင်ရင် တစ်ယောက်ကို ပိုက်ဆံတစ်သိန်းခွဲ နဲ့ ဆန်တစ်အိတ် ထောက်ပံ့ကြေး ပေးမယ်လို့ ပြောတယ်။ တချို့က အင်းထဲမှာ ရှာစားဖို့ ခက်ခဲတော့ ပြည်သူ့စစ်ထဲ ဝင်ဖို့ နာမည်စာရင်းသွားပေးကြတယ် “ ဟု ၎င်းဒေသခံတစ်ဦးက ပြောသည်။
လက်ရှိ အင်းပေါခုံရွာတွင် ပြည်သူ့စစ် ထဲဝင်ရန် နာမည်စာရင်းပေးထားသူမှာ (၂၀) ဦးထက် မနည်း ရှိနေပြီး စစ်သင်တန်းကို တောင်ကြီးမြို့သို့ သွားတက်ရောက်ရမည်ဖြစ်ကြောင်း သိရှိရသည်။
စစ်အာဏာ သိမ်းပြီးနောက်ပိုင်း အင်းလေးဒေသရှိ ပြည်သူများသည် စားဝတ်နေရေးအတွက် ပိုမိုကြပ်တည်းလာ သဖြင့် စစ်ကောင်စီက အခွင့်ကောင်းယူကာ ယခုလို ပြည်သူ့စစ်ထဲ ဝင်ရန် လိုက်လံစည်းရုံးနေကြောင်း အင်းလေး ဒေသခံတစ်ဦးက ပြောသည်။
“စစ်အာဏာသိမ်းပြီးတော့ အရမ်းရိုက်ခတ်သွားတယ်။ စက်လှေမောင်းတဲ့သူတွေ၊ ယက်ကန်းလုပ်တဲ့သူတွေ၊ ဆိုင်ခန်းဖွင့်ထားတဲ့သူတွေ စတဲ့ စီးပွားရေး လုပ်တဲ့သူတွေက ခက်ခဲသွားတယ်။ အင်းထဲက အခြေခံ အလုပ်သမား တွေဆို ပိုပြီးတော့ ခက်ခဲသွားတာပေါ့ ။ အဲ့ဒါကို စစ်ကောင်စီက အခွင့်ကောင်းယူပြီး ထောက်ပံ့ကြေးပေးမယ် ဆိုပြီး လာစည်းရုံး နေတယ်လို့တော့ မြင်တယ် “ ဟု ၎င်းဒေသခံတစ်ဦးက ပြောသည်။
ပြီးခဲ့သည့် စက်တင်ဘာလအတွင်း ရွာငံ၊ ပင်းတယ၊ ညောင်ရွှေ၊ ရပ်စောက် စသည့် မြို့နယ်များရှိ ကျေးရွာ ဒေသများမှာ စစ်ကောင်စီ လက်အောက်ခံ မြို့နယ် ဦးစီးဌာနများ နှင့် ရဲတပ်ဖွဲ့များ က လုံခြုံရေး၊ တရားဉပဒေ စိုးမိုးရေး၊ ရပ်ရွာအေးချမ်းသာယာရေး နှင့် ဒေသဖွံ့ ဖြိုးရေးလုပ်ငန်းဟူ၍ ခေါင်းစဉ် တပ်ပြီး စစ်ကောင်စီကို ထောက်ခံပေးရန် လိုက်လံဟောပြောပွဲ စည်းရုံးခဲ့ကြောင်း သိရသည်။
