သျှမ်းပြည်မြောက်ပိုင်း နမ့်ခမ်းမြို့နယ်ရှိ ကချင်လွတ်မြောက်ရေးတပ်မတော် (KIA) ရောက်ရှိ လှုပ်ရှားနယ်မြေအတွင်းနေ ဒေသခံ ပြည်သူများအနေဖြင့် အခွန်ဆက်ကြေး ပေးဆောင်မှု ပျက်ကွက်ပါက အရေးယူသွားမည်ဟု KIA ထုတ်ပြန် ထားသည်။

အဆိုပါ အခွန်ဆက်ကြေး ပေးဆောင်ရမည်မှာ KIA အမှတ် (၄) ၊ အမှတ် (၆) နှင့် အမှတ် (၁၀) တပ်မဟာ လှုပ်ရှားနယ်မြေအတွင်းရှိ ဘဏ်များ၊ ကုမ္ပဏီများ၊ စီးပွားရေးလုပ်ငန်းရှင်များသည် ယခုလ အောက်တိုဘာလကုန်အထိ အခွန်များ ပေးဆောင်ရမည်ဟု အကြောင်းကြားစာ ထုတ်ပြန်လာကြောင်း နမ့်ခမ်းဒေသခံ တစ်ဦးက ပြောသည်။

“သူတို့ လှုပ်ရှားနယ်မြေ အတွင်းမှာရှိတဲ့ ပြည်သူတွေကို အခွန်ပေးဆောင်ဖို့ အကြောင်းကြားစာပေးလာတယ်။ သူတို့သတ်မှတ် တဲ့စည်းကမ်း နဲ့ အခွန်ငွေကို ပေးရမယ်လို့ အကြောင်းကြားလာတာ“ ဟု ၎င်း ဒေသခံတစ်ဦးက ပြောသည်။

နမ့်ခမ်းမြို့နယ် လမ်းမဘေးရှိ အိမ်ဆိုင်၊ ကား ၊ ဆိုင်ကယ် ပြင်ဆိုင်များကိုလည်း ကချင်လွတ်မြောက်ရေး တပ်မတော် (KIA/KIO) ထံ အခွန်ကောက်ခံနေရသည်ဟုလဲ ဒေသခံများက ပြောကြသည်။

“ဈေးထဲကို ကောက်တာတော့ မဟုတ်ဘူး။ အပြင်က အိမ်ဈေးဆိုင်ငယ်တွေပါ လာကောက်တာ။ တစ်ခါမှ မကြုံဖူးတဲ့ သူတောင် အခုမှ ကြုံရတာ။ ကား၊ ဆိုင်ကယ် ပြင်ဆိုင်ဖွင့်ထားသူလည်း သူတို့က လာကောက်တယ်။ ဆိုင် အမျိုးအစားပေါ်မူတည်ပြီးတော့ ၃ သိန်း ကနေ ၁၅ သိန်း အထိ ပေးဆောင်ရတာတွေရှိတယ်“ ဟု ၎င်း ဒေသခံတစ်ဦးက ပြောသည်။

အခွန်ဆက်ကြေးကောက်ခံသည့် ကိစ္စ နှင့် ပတ်သက်ပြီး KIO တောင်ပိုင်းတိုင်း အခွန်ဌာနကို သျှမ်းသံတော်ဆင့်မှ ဆက်သွယ်မေးမြန်းပေမယ့် ဖုန်းလက်ခံ ဖြေကြားခဲ့ခြင်း မရှိပေ။

နမ့်ခမ်းမြို့နယ်သည် တအောင်း (ပလောင်) အမျိုးသား လွတ်မြောက်ရေး တပ်မတော် TNLA၊ ကချင်လွတ်မြောက်ရေး တပ်မတော် KIA/KIO နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA လှုပ်ရှားသော နယ်မြေတစ်ခု ဖြစ်ပြီး နှစ်စဉ်နှစ်တိုင်း ပြည်သူများက တိုင်းရင်းသား လက်နက်ကိုင် တပ်ဖွဲ့များထံ အခွန်များ၊ ဆက်ကြေးများ ဆောင်နေရကြောင်း သိရသည်။