သျှမ်းပြည်တောင်ပိုင်း ဖယ်ခုံမြို့တွင် ယနေ့ အောက်တိုဘာ (၁၈) ရက် နေ့ခင်းပိုင်းမှာ စစ်ကောင်စီဘက်မှ အကြောင်းမဲ့ လက်နက်ကြီး ရမ်းသမ်းပစ်ခတ်ပြီး အင်းလှေဆိပ်ကို စစ်ကောင်စီ က သွားလာခွင့် ပိတ်လိုက်ကြောင်း စုံစမ်း သိရှိရသည်။
“တိုက်ပွဲတော့ မဖြစ်ဘူး။ သူတို့ ဘက်က တစ်ဖက်သတ်ပစ်နေတာ။ ဆောင်ကန်းကျေးရွာက သျှမ်း နဲ့ ကယား ကြားမှာ ပစ်နေတာ။ ပြီးတော့ လှေဆိပ်သွားလမ်းလည်း ပိတ်လိုက်တာ” ဟု ဖယ်ခုံ PDF တပ်ဖွဲ့ဝင် တစ်ဦးက ပြောသည်။
ထိုနေရာကို စစ်ကောင်စီက ကင်းချထားပြီး အကြောင်းမဲ့ လှေဆိပ်ကို သွားလာခွင့် ပိတ်လိုက်ကြောင်း ဒေသခံများ ကပြောသည်။
“ ဒီနေ့ မနက်ပိုင်းမှာ ပိတ်လိုက်တာ။ ဘာကြောင့် ပိတ်လဲတော့ မသိဘူး။ အကြောင်းမဲ့ ပိတ်လိုက်တာ။ သူတို့ အဲ့နားမှာ ကင်းချထားတယ်။ ပုန်းပြီးတော့ ချထားတာ။ တိုက်ပွဲလည်း မဖြစ်ဘူး” ဟု ဒေသခံ အမျိုးသားတစ်ဦး က ပြောသည်။
အဆိုပါ လှေဆိပ်လမ်းကြောင်းသည် ဖယ်ခုံ အရှေ့ဘက်ကမ်း နှင့် ညောင်ရွှေ အင်းလေး အထိ ခရီးပေါက်ကြောင်း သိရသည်။
ယခုလို ပိတ်လိုက်သောကြောင့် ပြည်သူများ သွားလာရန်အတွက် အခက်အခဲရှိကြောင်း သိရသည်။
“အဲ့လမ်းက ဖယ်ခုံအရှေ့ဖက်ကမ်း၊ ညောင်ရွှေ အင်းလေးထိ သွားလို့ရတယ်။ သူတို့ ဒီလို ပိတ်လိုက်တော့ ကျနော်တို့ သွားလာဖို့က ခက်ခဲမှုရှိတာပေါ့။ ပြီးတော့ ကန်ဘေးမှာလည်း သိပ်ပြီး သွားမထိုင်ရဲတော့ဘူး” ဟု ဒေသခံ တစ်ဦးက ပြောသည်။
လက်ရှိ ဖယ်ခုံမြို့တွင် တိုက်ပွဲဖြစ်ပွားမှုမရှိကြောင်း သိရသည်။ သို့သော် ကရင်နီပြည် လွိုင်ကော်ဘက်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲ ပြင်းထန်နေလျက်ရှိကြောင်း သိရသည်။
Leave a Comments