Wednesday, May 22, 2024

အရက်မူးသူ တစ်ဦး ပြည်သူ့စစ်ကို ဓားနဲ့ခုတ်

Must read

သျှမ်းပြည်တောင်ပိုင်း ဆီဆိုင်မြို့နယ် နောင်မွန်ကျေးရွာအုပ်စုရှိ ဟိုနောင်ကျောင်းတိုက်တွင် အရက်မူးပြီး သောင်းကျန်းနေသည့် ပြည်သူတစ်ဦးက နယ်ထိန်းပြည်သူ့စစ်တစ်ဦးကို ဓားဖြင့် ခုတ်လိုက်ကြောင်း စုံစမ်း သိရှိရသည်။

ယမန်နေ့ အောက်တိုဘာ ၁၇ ရက် ည ၈ နာရီဝန်းကျင်တွင် ဟိုနောင်ကျောင်းတိုက်မှ နှစ်စဉ်ပြုလုပ်နေသော ဆီမီးပူဇော်ပွဲထဲတွင် အရက်မူးပြီး သောင်းကျန်းနေသော ဂျွန်အောင် ဆိုသူက နယ်ထိန်းပြည်သူ့စစ်တစ်ဦးကို ဓားဖြင့် ခုတ်လိုက်ကြောင်း နောင်မွန်ဒေသခံ တစ်ဦးက သျှမ်းသံတော်ဆင့်ကို ပြောသည်။

ဆီမီးပူဇော်ပွဲ

“ဂျွန်အောင် ဆိုတဲ့တစ်ယောက်က သူ အရက်မူးပြီး သူများကို ရန်ရှာတာ။ နယ်ထိန်းပြည်သူ့စစ်က သူ့ကိုသွားထိန်းတော့ ရုတ်ရင်းဆန်ခတ်ဖြစ်ပြီး ဓား နဲ့ ခုတ်လိုက်တာ။ ဘယ်နှစ်ချက် ခုတ်မိသလဲတော့ သေချာမသိရဘူး။ နယ်ထိန်း ပြည်သူ့စစ်လည်း သေနတ်ထုတ်ပြီး လေးချက်လောက်ပစ်လိုက်တာ။ သူ့ခြေထောက်ကို သေနတ်နှစ်ချက် မှန်သွားတယ် “ ဟု ၎င်း ဒေသခံတစ်ဦးက ပြောသည်။

အဆိုပါ ဓားဖြင့် ခုတ်ခံရသော နယ်ထိန်းပြည်သူ့စစ် ကိုဒုံးညိုဆိုသူက ထိခိုက်ဒဏ်ရာရရှိသဖြင့် တောင်ကြီးဆေးရုံသို့ ဆေးကုသမှု ခံယူနေပြီး အရက်မူးသည့် ဂျွန်အောင်ဆိုသူအား ရဲတပ်ဖွဲ့များက ဖမ်းဆီးသွား ကြောင်းသိရသည်။

ထို့အပြင် အရက်မူးပြီး သောင်းကျန်းနေသော ပြည်သူတစ်ဦး နှင့် နယ်ထိန်းပြည်သူ့စစ် တစ်ဦးအား အချင်းချင်း ပဋိပက္ခဖြစ်ပွားပြီးနောက် ဆီမီးလာရောက် ပူဇော်သော ပြည်သူများလည်း ကြောက်လန့်တကြား ဖြစ်သွားကြောင်း နောင်မွန်ဒေသခံတစ်ဦးက ပြောသည်။

“သေနတ်သံ ကြားတော့ ဘာဖြစ်တာလဲပေါ့။ ပွဲလာလည်တဲ့သူ၊ ဆီမီး ပူဇော်လာတဲ့ သူတွေလည်း ကြောက်လန့် ကုန်တယ်။ အိမ်ကို ပြန်ကုန်ကြတာ၊ ပွဲလည်းမစည်တော့ဘူး။ အခုက အရက်သမား၊ မူးယစ်ဆေးဝါး သုံးစွဲတဲ့ သူတွေ အရမ်းကို ကြောက်ဖို့ကောင်းလာတယ်“ ဟု ၎င်း ဒေသခံတစ်ဦးက ပြောသည်။

ဆီဆိုင်မြို့နယ် နောင်မွန်ကျေးရွာအုပ်စု ဟိုနောင်ကျောင်းတိုက်တွင် ယမန်နေ့ အောက်တိုဘာ ၁၇ ရက် ညမှာ နှစ်စဉ်ကျင်းပသော ဟိုနောင်စေတီပွဲတော် ဆွမ်းလောင်းပွဲတော် နှင့် ဆီမီးပူဇော်ပွဲတော်များ ပြုလုပ်ခဲ့ကြောင်း သိရသည်။

Leave a Comments

- Advertisement -spot_img

Latest article