သျှမ်းပြည်တောင်ပိုင်း ရပ်စောက်မြို့နယ် နောင်လုံကျေးရွာအုပ်စု ပန်ဟိုင်းကျေးရွာအနီးတွင် စစ်ကောင်စီတပ်ဖွဲ့ အင်အား ထပ်မံဖြည့်နေကြောင်း စုံစမ်း သိရသည်။
ပြီးခဲ့သည့် အောက်တိုဘာလ ၁၃ ရက်နေ့တွင် သျှမ်းပြည်မြောက်ပိုင်း နမ့်လန်မြို့မှ စစ်ကောင်စီတပ်အမှတ် ၅၀၅ နှင့် နောင်ချိုဘက်မှ တက်လာသည့် စစ်ကောင်စီတပ်ဖွဲ့ တို့သည် ရပ်စောက်မြို့နယ် နောင်လုံကျေးရွာအုပ်စု အတွင်းရှိ စစ်ကောင်စီတပ်ဖွဲ့ အမှတ် ၂၄၉ တို့နှင့် ပူးပေါင်းပြီး SSPP/SSA လှုပ်ရှားနေရာ အနီးသို့ စစ်အင်အားဖြည့်နေကြောင်း ဒေသခံများပြောပြချက်အရ သိရသည်။
“၁၃ ရက်နေ့က ၁၀ စီးကျော် ရောက်လာပါတယ်၊ ရွာထဲက ဆိုင်တွေမှာ အချိုရည်တွေ စားစရာတချို့တွေ ဝယ်ကြလို့ သူတို့က နောင်ချိုဘက်၊ နမ့်လန်ဘက် လာကြတယ်ဆိုတာ သိရတာ၊ ပြီးတော့ ဒီနယ်ထဲက SSPP တွေရဲ့ လှုပ်ရှားမှုဘယ်လို ရှိလဲဆိုပြီး ရွာသားတွေကို မေးသေးတယ်၊ တောထဲကို ခြေလျင်နဲ့ သွားကြတယ်” ဟု အမည် မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နောင်လုံကျေးရွာ အနီးပတ်ဝန်းကျင်တွင် တောနင်းနေရာယူထားလျက်ရှိပြီး ၎င်းတို့ တပ်ဖွဲ့အနီးတွင် SSPP တပ်ဖွဲ့လည်း ရှိနေသည့်အတွက် ထိတွေ့တိုက်ပွဲဖြစ်ပွားမည်ကို ဒေသခံများက စိုးရိမ်နေလျက်ရှိကြောင်း သတင်းသိရသည်။
“၁၅ ရက်နေ့မှာ (အောက်တိုဘာလ) စစ်ကောင်စီတပ်ဖွဲ့က ရွာလူကြီးကို ခေါ်ပြီး ဒီနယ်ထဲက PDF တွေရှိ မရှိ လည်း မေးတယ်၊ ပြီးတော့ SSPP က ဘယ်နားတွေမှာ နေကြလဲ ဆိုတာ မေးတယ်၊ အခုတော့ သူတို့နဲ့ SSPP လှုပ်ရှားမှုက အရမ်းနီးလို့ တိုက်ပွဲဖြစ်မှာကို ကြောက်ရတယ်” ဟု အထက်ပါ ပုဂ္ဂိုလ်က ဆက်ပြောသည်။
ယင်း ကိစ္စဖြစ်စဥ်နှင့် ပတ်သက်ပြီး ရပ်စောက်မြို့နယ် ဒေသအတွင်း လှုပ်ရှားနေသည့် SSPP နယ်မြေ တာဝန်ခံက ပြည်သူလူထု ထိခိုက်မှု မရှိအောင် လုပ်ဆောင်နေကြောင်း သျှမ်းသံတော်ဆင့်ကို ပြောသည်။
“ကျနော်တို့က သူတို့စစ်ကြောင်း လာတယ်ဆိုကတည်းက သတင်းသိရပါတယ်၊ ကျနော်တို့က ရွာထဲမှာလည်း နေတာ မဟုတ်တဲ့အတွက် ကျနော်တို့ နေရာ တောထဲမှာပဲ လှုပ်ရှားနေတာ၊ ထိတွေ့မှု မရှိအောင်တော့ ကြိုးစားထိန်းနေတယ်၊ ကျော်လာရင်တော့ သေနတ်သံက ကြားရအုံးမှာပဲ” ဟု SSPP နယ်မြေတာဝန်ခံက ပြောသည်။
ပြီးခဲ့သည့် ဖေဖော်ဝါရီအတွင်း သျှမ်းပြည်တောင်ပိုင်း ရပ်စောက်မြို့နယ်တွင် မြောက်ပိုင်းမဟာမိတ် နှင့် RCSS တို့ တိုက်ပွဲဖြစ်ပွားမှုကြောင့် ဒေသခံများ စိုးရိမ်ထိတ်လန့်နေကြကြောင်း သိရှိရသည်။
