သျှမ်းပြည်တောင်ပိုင်း ရပ်စောက်မြို့နယ် မြို့ဆိုးကျေးရွာထဲတွင် ပအိုဝ်းအမျိုးသားအဖွဲ့ချုပ် PNO အမည်ခံထားသည့် လူတစ်စုက ကျေးရွာပြည်သူများကို နှိပ်စက်နေကြောင်း စုံစမ်းသိရှိရသည်။
စစ်တပ်က အာဏာသိမ်းပြီးနောက်ပိုင်းတွင် ရပ်စောက်မြို့နယ်အတွင်း PNO တပ်ဖွဲ့က လှုပ်ရှားနေပြီး ၎င်းတို့ကို အမည်ခံပြီး လက်နက်ကိုင်ထားသည့် ဦးဇော်လွင်တို့အဖွဲ့က ပြည်သူများကို နှိပ်စက်နေကြောင်း သိရသည်။
“ဦးဇော်လွင်က ပြည်သူတွေကို နှိပ်စက်နေတာ။ သူက လက်နက်အားကိုးပြီးတော့ ရွာထဲမှာ လုပ်ချင်တာလုပ်နေတာ။ ဦးဇော်လွင်က သူ့အဖွဲ့က လူတွေ ၅ ယောက်လောက်ရှိတယ်။ သူက PNO နာမည်ခံပြီးတော့လုပ်တယ်။ ပြီးတော့ PNO တပ်ဖွဲ့တွေနဲ့ ပေါင်းပြီး လုပ်နေတာ” ဟု ဒေသခံ အမျိုးသားက ပြောသည်။
ဦးဇော်လွင်သည် မြို့ဆိုးကျေးရွာထဲနေထိုင်ပြီး မြို့ဆိုးကျေးရွာပတ်ဝန်းကျင်ရှိ ကျေးရွာဒေသခံများကိုလည်း ခေါ်ယူပြီး စစ်ဆေး နှိပ်စက်ခဲ့ကြောင်း ဒေသခံ များပြောပြချက်အရသိရသည်။
“ရွာကလူနဲ့ တခြားကျေးရွာကလူတွေကို သူဖမ်းခေါ်တယ်။ ပြီးတော့ ကြိုးတုတ်ပြီး ရိုက်တာတွေလုပ်တယ်။ စစ်ဆေးတယ်ဆိုပြီး ရိုက်စစ်တာပဲ။ ဘာမှ မဟုတ်ဘဲ နှိပ်စက်နေတာ” ဟု ဒေသခံ အမျိုးသားတစ်ဦးက ပြောပြသည်။
ထိုအပြင် အောက်တိုဘာ ၁၃ ရက်နေ့က PNO က သတ်ဖြတ်လိုက်သည့် သိန်းကျော်ထွန်းကိုလည်း ဦးဇော်လွင်က ဦးဆောင်ပြီး လုပ်ဆောင်ခိုင်းခဲ့ကြောင်း သိရသည်။
လက်ရှိမှာ ၎င်းသည် ကျေးရွာမှ ထွက်ပြေးနေကြောင်း သိရသည်။
“ ဦးဇော်လွင်က အခုထွက်ပြေးနေပြီ။ သိန်းကျော်ထွန်းကို သေတာ သူလည်း အဲထဲပတ်သက်တယ်လေ။ သူက PNO နဲ့ ပေါင်းပြီးတော့ ဦးဆောင်လုပ်တာ။ ပြီးတော့ ကျနော်တို့ ပတ်ဝန်းကျင်ရွာက ရွာသားတွေကိုလည်း ခေါ်ယူလာပြီး စစ်ဆေးရိုက်နှိက်ပြတာ” ဟု ဒေသခံ အမျိုသားတစ်ဦးက ပြောသည်။
ထိုသို့ PNO နာမည်ခံပြီး လက်နက်ပေးကိုင်နေသည့် လူ့အဖွဲ့စည်းမရှိကြောင်း ၊ အကယ်၍ ရှိခဲ့ပါက အရေးယူဆောင်ရွက်သွားမည်ဖြစ်ကြောင်း ပအိုဝ်းအမျိုးသားအဖွဲ့ချုပ် PNO ပြောရေးဆိုခွင့်ရှိသူ ဗိုလ်မှူးသန်းကြွယ်က သျှမ်းသံတော်ဆင့် ကို ပြောသည်။
“ကျနော်တို့မှာ ဘယ်သူကိုမှ လက်နက်ပေးတာလည်းမရှိဘူး။ ရှေ့တန်းသွားတဲ့ သူတွေကိုတော့ ပေးထားတယ်။ ပြန်လာရင်တောင် အပ်ခိုင်းပါတယ်။ တကယ်လို့ ကျနော်တို့နာမည်နဲ့ အသုံးပြုပြီးလုပ်နေတာရှိရင် အရေးယူသွားပါမယ်။ ကျနော်တို့လည်း ပြန်စုံစမ်းကြည့်” ဟု ဗိုလ်မှူးသန်းကြွယ်က ပြောသည်။
ပြီးခဲ့သည့် အောက်တိုဘာ ၉ ရက်နေ့က PNO တပ်ဖွဲ့သည် တောသွားလည်လာသည့် ဒေသခံ ၃ ဦးကို ဖမ်းဆီးနှိက်စက်ပြီး ၁၀ ရက်နေ့က ပြန်လွတ်ပေးခဲ့ကာ ၁၃ ရက်နေ့တွင် နှိပ်စက်ခံရသူတစ်ဦး သေဆုံးသွားခဲ့ကြောင်းသိရသည်။
Leave a Comments