သျှမ်းပြည်တောင်ပိုင်း ရပ်စောက်မြို့နယ် ယမ်းတွင်းငါးကြောင်ကျေးရွာအုပ်စု မြို့ဆိုးကျေးရွာတွင်နေထိုင်သည့် အမျိုးသား (၃) ဦးကို မူးယစ်ဆေးဝါးသုံးစွဲသူဟု ပအိုဝ်းပြည်သူ့စစ် PNO မှ စွပ်စွဲပြီး ဖမ်းဆီးကာ ရိုက်နှက်မှုပြုလုပ်ခဲ့ကြောင်း စုံစမ်းသိရသည်။
ထို ဖမ်းဆီးရိုက်နှက်မှုကြောင့် အမျိုးသား (၃) ဦးထဲမှ အသက် ၂၃ နှစ် အရွယ်ရှိ ကိုသိန်းကျော်ထွန်းသည် ပြင်းထန်စွာ ဒဏ်ရာရရှိပြီး ယမန်နေ့ (အောက်တိုဘာ ၁၃) ရက်တွင် သေဆုံးသွားကြောင်း သိရသည်။
ထိုသေဆုံးသွားသည့် ကိုသိန်းကျော်ထွန်း၏ နားရွက်ပြတ်သွားသဖြင့် နောက်ကျောတွင် ရိုက်နှိက်ခံထားရပြီး လည်ပင်းတွင်လည်း ကြိုးတုတ်ထားသော ဒဏ်ရာများလည်း ရှိထားကြောင်း ကိုသိန်းကျော်ထွန်း နှင့် နီးစပ်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“မျက်နှာတွေလည်း ဒဏ်ရာတွေ ရထားတယ်။ နောက်ကျောတွေမှာလည်း သူတို့ ဝိုင်းရိုက်ထားတယ်။ ပြီးတော့ နားမှာလည်း အနာရထားတယ်။ တုတ်ဒဏ်ရာတွေနဲ့ ပြည့်နေတယ်။ နှိပ်စက်ခံရပြီး လမ်းတောင်သူ မလျှောက်နိုင်ဘူး။ ဒဏ်ရာတော်တော်ပြင်းထန်တယ်” ဟု ၎င်းအမျိုးသားက ဆိုသည်။
ထိုသူများကို အောက်တိုဘာ ၉ ရက် ညနေပိုင်းတွင် ဖမ်းဆီးသွားပြီး ၁၀ ရက်နေ့၌ သက်ဆိုင်ရာ မိသားစုဝင်များက ပိုက်ဆံပေးပြီး ပြန်လည်သွားခေါ်ထုတ်လာခဲ့ကြောင်း သိရသည်။
လက်ရှိမှာ ကျန်ရှိနေသည့် (၂) ယောက်သည်လည်း ဆေးကုသခံနေရကြောင်း သိရသည်။
“ကျန်တဲ့ ၂ ယောက်ကလည်း ဆေးကုသ နေရတယ်။ တစ်ယောက်က နားရွက်ပြတ်ထားတယ်လေ။ ကျန်တဲ့တစ်ယောက်ကလည်း ဗိုက်ထိပြီးတော့ ဆေးရုံတွေ လိုက်ပြထားရတယ်” ဟု အမည်မဖော်လိုသူက ပြောသည်။
အလားတူ ထိုပြည်သူ ၃ ဦးကို ဖမ်းဆီးနှိပ်စက်ခြင်းမရှိကြောင်း ရှိခဲ့ပါကလည်း နိုင်ငံတော် နှင့် အတူ အရေးယူဆောင်ရွက်သွားမည်ဖြစ်ကြောင်း ပအိုဝ်းအမျိုးသားအဖွဲ့ချုပ် PNO/PNA ပြောရေးဆိုခွင့် ရှိသူ ဗိုလ်မှူးသန်းကြွယ်က သျှမ်းသံတော်ဆင့် ကို ပြောသည်။
“ မဟုတ်ဘူးထင်တယ်။ ကျနော်ဘာမှ မကြားရဘူး။ တကယ်လို့ မူးယစ်ဆေးဝါး ဖမ်းတယ်၊ ရိုက်သတ်တယ်ဆိုရင် အမှုဖွင့်မှာပေါ့လေ။ ကျနော်တို့ အဖွဲ့အနေနဲ့တော့ အဲ့လိုရိုက်သတ်တာတော့ လုံးဝမဖြစ်နိုင်ဘူး။ တကယ်လို့ ဖြစ်ခဲ့ရင်လည်း နိုင်ငံတော်အနေနဲ့ပဲ တာဝန်ယူသွားမှာ။ မဖြစ်နိုင်ဘူးထင်တယ်။ ကျနော်တော့ ဘာမှ မကြားရသေးဘူး” ဟု ဗိုလ်မှူးသန်းကြွယ်က ပြောသည်။
လက်ရှိတွင်လည်း မြို့ဆိုးကျေးရွာဒေသခံ နှင့် လူငယ်များကလည်း ကျေးရွာအတွင်းမှ ထွက်ပြေးတိမ်းရှောင် သွားနေပြီဖြစ်ကြောင်း သိရသည်။
အဆိုပါကိစ္စနှင့် ပတ်သက်ပြီး ပအိုဝ်းအမျိုးသားအဖွဲ့ချုပ် PNO အနေဖြင့် အမြန်ဆုံး ဖြေရှင်းပေးရန် ပြည်သူများကလည်း မျှော်လင့်တောင်းဆိုနေကြသည်။
