သျှမ်းပြည်မြောက်ပိုင်း ကွတ်ခိုင်မြို့နယ်အတွင်းမှ တိုက်နယ် ဆရာဝန်တစ်ဦး၏ ညီဖြစ်သူသည် လက်နက်ကိုင် အဖွဲ့တစ်ဖွဲ့၏ ဖမ်းဆီးခေါ်ဆောင်သွားခြင်း ခံရကြောင်း သတင်းသိရသည်။
ပြီးခဲ့သည့် အောက်တိုဘာလ ၁၁ ရက်တွင် ကွတ်ခိုင်မြို့နယ် ကာလိုင်ကျေးရွာမှ တိုက်နယ်ဆရာဝန်၏ ညီ ဖြစ်သူ ဆေးအကူလုပ်နေသည့် အမျိုးသား တစ်ဦးသည် ဆေးရုံအတွင်း ရှိနေစဥ် ဖမ်းဆီးခေါ်ဆောင်သွားခြင်း ဖြစ်ကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဖမ်းဆီးခံရသူက ဆရာဝန်မဟုတ်ဘူး၊ ဆရာဝန်ရဲ့ ညီဖြစ်တာ၊ သူ့မှာ ဆေးလက်မှတ်တွေ ဘာတွေလည်း မရှိဘူး၊ ဒါပေမဲ့ ဆရာဝန်ဖြစ်တဲ့ အစ်ကိုက သင်ပေးပြပေးလို့ သူ့အစ်ကို ကိုကူပြီး ဆေးကုသမှုတွေ လုပ်ပေးနေတဲ့သူပေါ့၊ ၁၁ ရက်နေ့မှာ ဆေးရုံထဲ ဆေးကုပေးနေတဲ့အချိန်မှာ ဖမ်းဆီးခံလိုက်ရတယ်” ဟု အထက်ပါ အမျိုးသမီးက ပြောသည်။
ကာလိုင်ကျေးရွာတွင် တိုက်နယ်ဆေးရုံတစ်ခုရှိနေပြီး တာဝန်ကျသည့် ဆရာဝန်ဖြစ်သူ၏ ညီကို လက်နက်ကိုင် တပ်ဖွဲ့တစ်ခုမှ လာရောက်ဖမ်းဆီးခြင်းဖြစ်ကြောင်း ဒေသခံများက ပြောသည်။
အဆိုပါ ညီအစ်ကို နှစ်ဦးသည် ကာလိုင်ကျေးရွာ တိုက်နယ်ဆေးရုံတွင် လွန်ခဲ့သည့် ၃ နှစ်ကတည်းက တာဝန်ကျ နေခြင်းဖြစ်ပြီး ပတ်ဝန်းကျင် နှင့် တခြားသော အဖွဲ့အစည်းများကို ပြဿနာရှိခဲ့ခြင်းလည်း မရှိကြောင်း ဒေသခံများက ပြောသည်။
“သူ့မှာ (ဖမ်းဆီးခံရသူ) ဆေးလက်မှတ်တွေ သင်တန်းတွေလည်း မရှိပဲနဲ့ ဆေးကုသမှုတွေလုပ်နေတာ့ မတော်လို့ လူနာဘက်တစ်ခုခုဖြစ်သွားရင် မကောင်းဘူးလေ၊ ဒါပေမဲ့ သူတို့ ဒီကို ရောက်တာ ၃ နှစ်ရှိပြီ၊ ဘာပြဿနာမှ ရှိတယ်လို့ မကြားမိဘူး၊ အခုလာဖမ်းသွားတာလည်း ဘာကြောင့်မှန်းမသိရဘူး” ဟု အထက်ပါ အမျိုးသမီးက ဆက်ပြောသည်။
ယင်းကဲ့သို့ ဖမ်းဆီးခေါ်ဆောင်မှု ပြုလုပ်သည့် လက်နက်ကိုင် အဖွဲ့အစည်းသည် ကချင်လွတ်မြောက်ရေး တပ်မတော် နှင့် ပူးပေါင်းတပ်ဖွဲ့ KIA၊ PDF တို့မှ လာရောက်ဖမ်းဆီးခြင်း ဖြစ်ကြောင်း ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။
ကွတ်ခိုင်မြို့နယ်သည် တိုင်းရင်းသားလက်နက်ကိုင် အဖွဲ့အစည်းများ ပေါများသည့် အပြင် စစ်ကောင်စီ တပ်ဖွဲ့ နှင့် ၎င်းတို့ လက်အောက်ခံ ပြည်သူ့စစ် တပ်ဖွဲ့များ သွားလာလှုပ်ရှားမှုလည်း ရှိသည့် ဒေသဖြစ်သည်။
