သျှမ်းပြည်တောင်ပိုင်း တောင်ကြီးမြို့နယ်၊ ပင်လောင်းမြို့နယ်၊ နောင်တရား၊ အောင်ပန်းမြို့ အတွင်းရှိ စစ်ကောင်စီ စစ်ဆေးရေးဂိတ်ကို ဆိုင်ကယ် ဆင်းတွန်းပြီး ဂိတ် ဖြတ်သွားရကြောင်း စုံစမ်းသိရှိရသည်။
ယခုရက်ပိုင်းအတွင်းတွင် စစ်ကောင်စီ စစ်ဆေးရေးဂိတ်များက စစ်ဆေးမှုကြမ်းနေပြီး အသွားအလာကိုလည်း တင်းကြပ်ထားကြောင်း သိရသည်။
“သူတို့ အရမ်းစစ်တယ်။ စစ်ဆေးမှုတွေက အရင်က ထက်ပိုပြီးများလာတယ်။ အသွားအလာလည်း သတိထားသွားရတာ။ သူတို့စစ်တဲ့ ဂိတ်ရှေ့ဆိုရင် ဆိုင်ကယ်သမားက ဆင်းတွန်းပြီး ဂိတ်ကိုကျော်မှ ဆိုင်ကယ်ပြန်မောင်းရတာ။ ဂိတ်ရှေ့ကို ဆိုင်ကယ်မောင်းပြီးဖြတ်မသွားရဘူး” ဟု ကိုယ်တိုင်ကြုံတွေ့ခဲ့သည့် အောင်ပန်းမြို့ အမျိုးသားတစ်ဦးက ပြောသည်။
တောင်ကြီးမြို့နယ်၊ ပင်လောင်းမြို့နယ်၊ အောင်ပန်းမြို့ထဲအတွင်းရှိ စစ်ကောင်စီ စစ်ဆေးရေးဂိတ် အားလုံးနီးပါးက ဆိုင်ကယ်များကို ဆင်းတွန်းပြီး ဖြတ်သွားကြရကြောင်း သိရသည်။
အလားတူ စစ်ကောင်စီက စစ်ဆေးမှုတင်းကြပ်နေပြီး စစ်ဆေးရေးဂိတ်မှာ ဖမ်းဆီးမှုများလည်းရှိနေကြောင်း သိရသည်။
လက်ရှိတွင်လည်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့က ဖယ်ခုံမြို့ နှင့် မိုးဗြဲမြို့၊ လွိုင်ကော်ဘက်တွင် စစ်ရေးတင်းမာနေသောကြောင့် စစ်ကောင်စီသည်လည်း ပင်လောင်းဘက်မှတစ်ဆင့် တိုက်ပွဲဖြစ်ပွားသည့်နေရာကို စစ်အင်အားဖြည့်တင်းနေကြောင်း သိရသည်။
ထိုသို့ စစ်အင်အားဖြည့်တင်းရန်အတွက် အသုံးပြုသည့် လမ်းကြောင်းဖြစ်သည့်အတွက်ကြောင့် စစ်ဆေးရေး တင်းကြပ်လာကြောင်း ပင်လောင်းမြို့ ဒေသခံ တစ်ဦးက ပြောသည်။ စစ်ဆေးမှု တင်းကြပ်လာသောကြောင့် ပြည်သူများလည်း စားဝတ်နေရေးအတွက် သွားလာရန် ခက်ခဲလာကြောင်း သိရသည်။
“သူတို့ မိုးဗြဲဘက်ကို စစ်အင်အားဖြည့်ရင် ဒီကနေ ဖြတ်သွားတယ်လေ။ အဲ့ကြောင့်မလို့ စစ်ဆေးရေးကြမ်းလာတာ။ သူတို့ဒီလိုအရမ်းစစ်တော့ ကျနော်တို့ သွားလာရလည်း ခက်တယ်လေ။ တစ်ခါလေ ခရီးသွားဖို့လိုရင်လည်း အရမ်းကို ရှုပ်လာတယ်။ တစ်ချို့နေရာဆိုရင် တော်တော်ရစ်သေးတယ်” ဟု ပင်လောင်းမြို့ ဒေသခံ တစ်ဦးက ပြောသည်။
အလားတူ ပင်လောင်းမြို့နယ် တီကျစ်ကျောက်မီးသွေးစက်ရုံရှေ့တွင် ဖမ်းဆီးခံရသည့် လူငယ် ၁ ဦးကိုလည်း စစ်ကောင်ီစက စက်တင်ဘာ ၂၉ ရက်နေ့မှာ ထောင်ဒဏ် ၁၀ နှစ် ချမှတ်လိုက်ကြောင်း သိရသည်။
ထိုတီကျစ် စစ်ဆေးရေးဂိတ်တွင် လူငယ် ၂ ဦး ဖမ်းဆီးခံထားရကြောင်း သိရသည်။
Leave a Comments