သျှမ်းပြည်တောင်ပိုင်း လဲချားမြို့ နှင့် တောင်ကြီးမြို့ကြားရှိ ပြည်ထောင်စု လမ်းမကြီးတွင် စစ်ကောင်စီ စစ်ဆေးရေးဂိတ်သည် ကျောင်းသားများထံ ငွေကြေးတောင်းခံမှုများ ရှိနေကြောင်း စုံစမ်းသိရှိရသည်။
အဆိုပါ စစ်ဆေးရေးဂိတ်များသည် အိမ်စီးကားများ၊ လိုင်းကားများနှင့်အတူ ပါလာသည့် ခရီးသည်များကိုလည်း စစ်ဆေးပြီး ခရီးသည်ထံများလည်း ငွေတောင်းယူမှုများ ရှိကြောင်း သိရသည်။
လဲချားမြို့ နှင့် တောင်ကြီးမြို့ ကြားရှိ စစ်ကောင်စီ ဂိတ် (၃) ခု ရှိနေပြီး အနည်းဆုံးငွေ (၆,၀၀၀) ကျပ် ရှိထားရန်လိုအပ်ကြောင်း ကိုယ်တိုင်ကြုံတွေ့ခဲ့သည့် တက္ကသိုလ်ကျောင်းသူတစ်ဦးက ပြောသည်။
“ကျမက တောင်ကြီးကနေ ကျောင်းသွားတက်လာတာ။ လဲချားကိုပြန်တာ ကြားထဲမှာ ဂိတ် (၃) ခုရှိတယ်။ ကျမဆိုဂိတ် (၃) ခု ဖြတ်တာ ၆,၀၀၀ လောက်ကုန်သွားတယ်။ ခရီးသည်တစ်ချို့ဆိုရင် ဒီထက်အများကြီးကုန်တယ်။ စစ်လည်းစစ်ဆေးတယ်” ဟု ၎င်းက ပြောသည်။
ယခင်က စစ်ဆေးရေးဂိတ်များတွင် ငွေကြေးပေးရတာမရှိဘဲ လက်ရှိမှာ ငွေကြေးတောင်းလာသောကြောင့် ပြည်သူများ ခရီးသွားရန် ခက်ခဲလာကြောင်း သိရသည်။
“ကျမ ကျောင်းသွားတက်တုန်းကတော့ လမ်းမှာ စစ်ဆေးတာ သိပ်မပေးရဘူး။ အပြန်မှ ပေးရတာ။ ကားခလည်း ဈေးကြီးတယ်လေ။ ဟိုအရင် အာဏာမသိမ်းခင်ဆို လွတ်လွတ်လပ်လပ် သွားလို့ရတယ်။ အခုက မရတော့ဘူး” ဟု အထက်ပါ ကျောင်းသူ ကပြောသည်။
ထိုအပြင် လက်ရှိမှာ စားဝတ်နေရေးအတွက် ပြည်သူများ ခက်ခဲနေပြီး ကုန်သည်များကလည်း ကုန်ကူးသန်းရောင်းဝယ်ရန် အတွက် အမြတ်မရှိကြောင်း သိရသည်။
အလားတူ လဲချားမှ တောင်ကြီးသို့ ကုန်သွယ်ရေးလုပ်နေသည့် အမျိုးသမီးတစ်ဦးကလည်း “ဘာမှ အမြတ်မကျန်ဘူး။ တောင်ကြီးကနေ ကုန်ပစ္စည်း သွားယူလာရင်လည်း ကြားထဲ လမ်းမှာ သူတို့ဂိတ်ကြေးတွေပေးရတယ်။ အသွားလည်း ပေးရ။ အပြန်လည်း ပေးရတယ်။ တစ်ခါပေးရင် ၁ သောင်းလောက်ရှိတယ်လေ။ ကားခ၊ ဆီဖိုး နဲ့ ဈေးကြီးတော့ အမြတ်မကျန်ဘူး” ဟု ပြောသည်။
အာဏာသိမ်းပြီးနောက်ပိုင်း ဝါးရှောင်သခင်ဂိတ်၊ မြို့ဝင်မြို့ထွက်ဂိတ်များမှာ စစ်ဆေးမှု တင်းကြပ်လာပြီး ဖမ်းဆီးမှုများလည်း ရှိလာကြောင်း သိရသည်။
Leave a Comments