သျှမ်းပြည်အရှေ့ပိုင်း တာချီလိတ်မြို့တွင် ရေကြီးရေလျှံမှု အကြိမ်ကြိမ်ဖြစ်ပွားပြီးနောက် ရပ်ကွက်တချို့ရှိ လမ်းများ ပျက်စီးကာ ပြည်သူများ သွားလာရန်အတွက် ခက်ခဲနေကြောင်း စုံစမ်းသိရှိရသည်။
မယ်ခေါင် ရပ်ကွက် (၃) တိုင်းရင်းသားနှစ်ခြင်း ခရစ်ယာန် ဘုရားရှိခိုးကျောင်း လမ်းရှေ့ နှင့် တာချီလိတ် လေယာဉ်ကွင်းလမ်းတလျောက် စသည့် မြို့တွင်းရှိ ရပ်ကွက်လမ်းများမှာ အကြိမ်ကြိမ် ရေတိုက်စားခြင်းခံရပြီးနောက် လမ်းများ ဆိုးရွားစွာ ပျက်စီးနေကြောင်း တာချီလိတ်ဒေသခံ အမျိုးသား တစ်ဦး ကပြောသည်။
“လမ်းတွေက ရေတိုက်စားသွားတော့ ပျက်စီးသွားတာ။ ချိုင့်ခွက်တွေဖြစ်ပြီး ဆိုင်ကယ်စီးရင် အရမ်းခုန်တယ်။ အဲ့လိုတွေဖြစ်သွားတော့ ဘယ်သူမှ မြန်မြန် မစီးတော့ဘူး။ အခုပျက်စီးသွားတာ ဆိုင်ကယ်၊ ကားတွေသွားဖို့ အဆင်မပြေတော့ဘူး “ ဟု ၎င်းအမျိုးသားတစ်ဦးက ပြောသည်။
အဆိုပါ ရပ်ကွက်တွင်းရှိ လမ်းများ ဆိုးရွားစွာ ပျက်စီးနေပြီး လက်ရှိတွင် ပြည်သူများ သွားလာရန်အတွက် ခက်ခဲနေသောကြောင့် စည်ပင်သာယာရေးဌာန အနေဖြင့် အမြန်ဆုံး ပြုပြင်ပေးရန် လိုအပ်နေကြောင်း တာချီလိတ် ဒေသခံများက ဆိုသည်။
“သက်ဆိုင်ရာ တာဝန်ရှိသူတွေ လမ်းတွေ အမြန်ပြင်ပေးဖို့ တောင်းဆိုချင်တယ်။ သွားဖို့ လာဖို့လဲ အခက်အခဲဖြစ်နေတယ်။” ဟု တာချီလိတ် ဒေသခံ တစ်ဦး ကပြောသည်။
သျှမ်းပြည်အရှေ့ပိုင်း တာချီလိတ်မြို့နယ်၊ ကျိုင်းတုံမြို့နယ် နှင့် မိုင်းဆတ်မြို့နယ်တို့တွင် ယခုနှစ်ရေကြီးမှုသည် ယခင်ကထက် ပိုမိုများလာကြောင်း သိရသည်။
သျှမ်းပြည်အရှေ့ ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တုတူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝ ပတ်ဝန်းကျင်များသည် ယခင်ကထက် ပျက်စီးကာ မိုးရာသီတွင် ရေကြီးရေလျှံမှုဖြစ်ပြီး၊ နွေရာသီတွင် ရေခန်းခြောက်မှုကို ပြည်သူများ ကြုံတွေ့လာရသည်။
