သျှမ်းပြည် မြောက်ပိုင်း သိန္နီမြို့နယ် နမ့်စလပ်ကျေးရွာအုပ်စု အတွင်း လက်နက်ကြီး ကျပေါက်ကွဲမှုကြောင့် အရပ်သား ပြည်သူတစ်ဦးသေဆုံးပြီး ထိခိုက်ဒဏ်ရာရသူများလည်း ရှိနေကြောင်း သတင်းသိရသည်။
ယမန်နေ့ (အောက်တိုဘာလ ၆) ရက် ည ၆ နာရီဝန်းကျင်တွင် နမ့်စလပ်ကျေးရွာ အုပ်စုမှ နမ့်အွန်ရွာနှင့် တွန်မုံရွာကြားတွင် စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး ကားပေါ်ပါသည့် စစ်ကောင်စီတပ်သားများမှ လက်နက်ကြီး လက်နက်ငယ်ဖြင့် ရမ်းသမ်းပစ်ခတ်ခဲ့ကြောင်း ဒေသခံများက ပြောသည်။
“မနေ့ညက သိန္နီကနေ နမ့်စလပ်ဘက်ကို ဦးတည်လာတဲ့ စစ်ကောင်စီ ယာဥ်တန်း မိုင်းနှစ်လုံးမိရာကနေ ကားပေါ် မှာရှိတဲ့ စစ်သားတွေက လက်နက်ကြီး/ငယ်နဲ့ လှမ်းပစ်တာ လမ်းပေါ်က နမ့်အွန်ရွာသားတစ်ဦး ထိမှန် သေဆုံးတယ်၊ အဲ့လိုပဲ တွန်မုံရွာသားနှစ်ဦးနဲ့ ပန်သီးရွာသားတစ်ဦး စုစုပေါင်း သုံးဦးက ထိခိုက်ဒဏ်ရာရတယ်” ဟု နမ့်စလပ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ လက်နက်ကြီး ထိမှန်သေဆုံးသူ အမျိုးသားသည် နေမကာင်းသည့် သက်ကြီးရွယ်အို မိဘနှစ်ပါးကို လုပ် ကိုင်ကျွေးမွေးနေသည့် အသက် (၂၀) အရွယ်တစ်ဦးတည်းသော သားဖြစ်ပြီး အရပ်သားပြည်သူသုံးဦးအပြင် နမ့်အွန်ရွာမှ ကျွဲတစ်ကောင်လည်း ထိမှန်ဒဏ်ရာရကြောင်း ဒေသခံများက ပြောသည်။
“သေဆုံးသူရဲ့ မိသားစုဝင်တွေကတော့ ခက်ခဲတာ အမှန်ပဲ၊ ပြီးတော့ အခုချိန်ထိ စစ်ကောင်စီ တပ်သားတွေ သွားလာလှုပ်ရှားမှုက အဲ့ဒီ အနီးပတ်ဝန်းကျင်တွေ ရှိနေတုန်းပါ၊ အင်အားတော့ မများဘူး၊ ဒဏ်ရာရတဲ့ ရွာသားတွေလည်း မြို့ပေါ်တက် ဆေးကုသမှု မလုပ်နိုင်ဘူးပြောတယ်” ဟု အထက်ပါ ပုဂ္ဂိုလ်က ဆက်ပြောသည်။
ယင်းပစ်ခတ်မှုများသည် အာဏာသိမ်း စစ်ကောင်စီနှင့် ကချင်လွတ်မြောက်ရေး တပ်မတော် ပူးပေါင်းတပ်ဖွဲ့ KIA / PDF ကြား ထိတွေ့တိုက်ပွဲများဖြစ်ကြောင်း ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပါ။
စစ်တပ်အာဏာသိမ်းပြီးနောက်ပိုင်းတွင် စစ်ကောင်စီတပ်ဖွဲ့သည် သျှမ်းပြည်မြောက်ပိုင်းအတွင်း၌ KIA တပ်ဖွဲ့အပြင် တခြားသော တိုင်းရင်းသား လက်နက်ကိုင် တပ်ဖွဲ့များနှင့် ထိတွေ့တိုက်ပွဲ မကြာခဏဖြစ်ပွား လေ့ရှိသည်။
