သျှမ်းပြည်မြောက်ပိုင်း ကျောက်မဲမြို့တွင် ခရိုင်ရုံးအတွင်း ဗုံးပေါက်ကွဲမှုဖြစ်ပွားခဲပြီး စစ်ကောင်စီ ရဲတပ်ဖွဲ့များက လုံခြုံရေးတိုးမြင့်ထားကြောင်း စုံစမ်းသိရှိရသည်။
ယမန်နေ့ (အောက်တိုဘာ ၅) ည ၉ နာရီ ဝန်းကျင်တွင် ခရိုင်ရုံးအတွင်း ဗုံးပေါက်ကွဲမှုဖြစ်ပွားပြီး လျှပ်စစ်မီးများကို ဖြတ်တောက်ထားကာ စစ်ကောင်စီက လုံခြုံရေးတိုးမြင့်ပြီး စစ်ဆေးနေကြောင်း သိရသည်။
“ မနေ့ညက ဗုံးပေါက်ကွဲပြီးတော့ လျှပ်စစ်မီးတွေ ပျက်သွားတာ။ ပြီးတော့ စစ်ကောင်စီတွေက လုံခြုံရေးတွေ လာချထားတယ်။ ရဲတွေနဲ့ ဘာတွေနဲ့ လာစောင့်နေကြတာ။ ဒီနေ့လည်း လုံခြုံရေးတွေ ပိုချထားပြီး စစ်ဆေးနေတာရှိတယ်” ဟု ကျောက်မဲမြို့ ဒေသခံ အမျိုးသားတစ်ဦးက ပြောသည်။
အဆိုပါ ဗုံးပေါက်ကွဲမှုကြောင့် လူသူထိခိုက်မှုမရှိသော်လည်း အဆောက်အအုံးအနည်းပျက်စီးသွားကြောင်း သိရသည်။
ထိုအပြင် ယနေ့ (အောက်တိုဘာ ၆) ရက်တွင်လည်း ဈေးအနီးတစ်ဝိုက် နှင့် ဘဏ်ရှေ့တွင် ယခင်ကထက်ပိုပြီး လုံခြုံရေးဂိတ်ကို ချမှတ်ပြီး စစ်ဆေးနေကြောင်း မျက်မြင်တွေ့သူတစ်ဦးက ပြောသည်။
“ ဒီနေ့ဈေးတွေမှာ ပြီးတော့ ဘဏ်ရှေ့တွေမှာ သူတို့ ပိုပြီးစစ်ဆေးနေတယ်။ အရင်ကထက် လုံခြုံရေးဂိတ်က များနေတယ်။ ဒီနေ့မနက်ဈေးသွားတာ ရဲတွေ အများကြီးတွေ့ခဲ့တယ်။ မနေ့က ပေါက်ကွဲမှုက လူထိခိုက်တာတော့မရှိဘူး။ သူတို့ရုံးရဲ့ မှန်စလေးတွေကွဲတာတော့ ရှိတယ်” ဟု ၎င်းက ပြောသည်။
ကျောက်မဲမြို့သည် မြောက်ပိုင်းမဟာမိတ်တပ်များဖြစ်ကြသော ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၊ ကချင်လွတ်မြောက်ရေးတပ်မတော် (KIA) ၊ တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) ၊သျှမ်းပြန်လည်ထူထောင်ရေးကောင်စီ (RCSS) နှင့် စစ်ကောင်စီ တပ်ဖွဲ့ လှုပ်ရှားသည့်နယ်မြေဖြစ်ကြောင်း သိရသည်။
စစ်တပ်က အာဏာသိမ်းပြီးနောက် သျှမ်းပြည်အတွင်းရှိ မြို့နယ်အများစု အစိုးရရုံးတွင် ပေါက်ကွဲမှု မကြာခဏ ဖြစ်ပွားနေလျက်ရှိကြောင်း သိရသည်။
