သျှမ်းပြည်မြောက်ပိုင်း မန်တုံမြို့နယ်အတွင်း အာဏာသိမ်း စစ်ကောင်စီတပ်ဖွဲ့နှင့် ကချင်လွတ်မြောက်ရေး တပ်မတော် KIA ပူးပေါင်းတပ်ဖွဲ့တို့ တိုက်ပွဲထပ်မံဖြစ်ပွားခဲ့ပြီး ပြည်သူ့နေအိမ်ထံ လက်နက်ကြီးကျခဲ့ကြောင်း သတင်းသိရသည်။

ယမန်နေ့ (အောက်တိုဘာ ၄ ) ရက် နံနက်ပိုင်း ၁၀ နာရီခွဲဝန်းကျင်တွင် မန်တုံမြို့နယ် မြို့မရပ်ကွက် အနီးတွင် အာဏာသိမ်းစစ်ကောင်စီနှင့် KIA/PDF တို့ တိုက်ပွဲဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“မနေ့က စစ်ကောင်စီ ခလရ ၁၃၀ နဲ့ KIA/PDF တို့ တိုက်ပွဲဖြစ်ခဲ့ပါတယ်။ စစ်ကောင်စီဘက်က လက်နက်ကြီးနဲ့ ဦးတည်ချက်မရှိ ရမ်းပစ်လို့ မြို့မရပ်ကွက်ထဲ လူနေ အိမ်တစ်လုံး ပျက်စီးသွားတယ်။ အိမ်ရှင်တွေက စစ်ရှောင်နေတာမို့ လူထိခိုက်မှုတော့ မရှိဘူး” ဟု မန်တုံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ တိုက်ပွဲသည် ၂ နာရီ နီးပါးခန့်ကြာခဲ့ပြီး စစ်ကောင်စီဘက်မှ လက်နက်ကြီးများဖြင့် အရပ်လေးမျက်နှာသို့ ရမ်းသမ်းပစ်ခတ်ခဲ့ကြောင်း နှင့် နှစ်ဖက်တပ်ဖွဲ့မှ တပ်သားထိခိုက်မှုများ ရှိသော်လည်း အရေအတွက် အတိအကျ မသိရကြောင်း ဒေသခံများက ပြောသည်။

လက်ရှိတွင် မန်တုံမြို့မှ တိုက်ပွဲဖြစ်ပွားသည့် နေရာနှင့် နီးသည့် ဒေသခံများသည် နမ္မတူ နှင့် လားရှိုးဘက်သို့ စစ်ရှောင်ထွက်ပြေးမှုများလည်းရှိနေကြောင်း အထက်ပါ ပုဂ္ဂိုလ်က ဆက်ပြောသည်။

“အိမ်စီးကားတွေ လိုင်းကားတွေနဲ့ ထွက်ပြေးကြတဲ့ ပြည်သူတွေ မနေ့ ညနေနဲ့ ဒီကနေ့အထိ ကားအစီး ၄၀ လောက်ရှိနေပြီ၊ တချို့က နမ္မတူဘက်သွားကြတယ်၊ တချို့က လားရှိုးအထိ ဆွေမျိုးတွေ ရှိတဲ့အရပ်တွေကို စစ်ရှောင်နေကြတယ်၊ ဒီနေ့တော့ ပစ်ခတ်သံ မကြားရဘူး” ဟု ၎င်းက ပြောသည်။

ထို့အပြင် ပြည်သူများမှ စစ်ဘေးရှောင်နေရစဥ်တွင် နမ္မတူမြို့နယ်အတွင်းမှ ကျူဆော့ကျေးရွာရှိ စစ်ဘေးရှောင်စခန်းမှ စစ်ရှောင်ပြည်သူများသည် အောက်တိုဘာလ ၁၅ ရက်မတိုင်ခင် နေရပ်ပြန်ရန် မြို့နယ်ထွေအုပ်မှ စာထုတ်ပြန်ခဲ့ကြောင်း စစ်ရှောင်စခန်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ပြီးခဲ့တဲ့ ၂၀၁၆ ကတည်းက စစ်ရှောင်လာတဲ့ ဒီကျူဆော့စခန်းက စစ်ရှောင်အိမ်ထောင်စု ၄၀ လောက်ကို ဒီလ ၁၅ ရက်မတိုင်ခင် နေရပ်ပြန်ရမယ်တဲ့၊ သူတို့တွေက မန်တုံဘက်ရွာလည်းပါတယ်၊ အခုသူတို့နေရပ်ဘက်မှာ တိုက်ပွဲဖြစ်လို့ စစ်ရှောင်အသစ်တွေတောင် ရောက်လာကြတာ၊ ဘယ်လိုပြန်ရမလဲ” ဟု အထက်ပါ ပုဂ္ဂိုလ်က ပြောသည်။

စစ်ကောင်စီ လက်အောက်ခံ ထွေအုပ်မှ ပြန်ခိုင်းသည့် ကျူဆော့စစ်ရှောင်စခန်းမှ ဒေသခံများသည် ပန်ကော်ရွာ၊ လွယ်စပိတ်ရွာ၊ လွယ်ကန်ရွာနှင့် လွယ်အန်ရွာမှ ဒေသခံများဖြစ်ကြပြီး လက်ရှိတွင် စစ်ရေးတင်းမာမှု ရှိနေသည့် နယ်မြေဖြစ်ကြောင်းလည်း သိရသည်။