သျှမ်းပြည်နယ် မြောက်ပိုင်း မူဆယ်မြို့ ရွှေလီမြစ်ထဲတွင် အသက် (၁၆)နှစ် အရွယ်ရှိ ကလေးတစ်ဦး ရေနစ်ပျောက်ဆုံးနေကြောင်း သတင်းရရှိသည်။

ဖြစ်စဥ်မှာ ယမန်နေ့ (အောက်တိုဘာ ၁)ရက် နံနက်ပိုင်းတွင် မူဆယ်မြို့သို့ လာရောက်အလုပ်လုပ်သည့် အသက် (၁၆)နှစ် အရွယ်ရှိ မောင်ပြည့်ဖြိုးကျော်သည့် ရွှေလီမြစ်ထဲ ရေဆင်းကူးရာမှ ရေနစ်ပျောက်ဆုံးသွားကြောင်း မူဆယ်မြို့ တော်ရွက်ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ မနေ့ မနက်ပိုင်းကတည်းက သူတို့ ပန်းရံ အလုပ်သမားတွေ ရွှေလီမြစ်ထဲရေသွားဆော့ကြတာ။ အဲ့မှာ ရေဆင်းချိုးရင်းနဲ့ ပျောက်သွားတာ။ အခုထိ မတွေ့သေးဘူး။ လူမှုပရဟိတ အဖွဲ့တွေအများကြီးလာကူရှာပါတယ်” ဟု တော်ရွက် ဒေသခံ အမျိုးသားက ဆိုသည်။

လက်ရှိ ပျောက်ဆုံးနေသည့် ကလေးသည် မန္တလေးတိုင်းဒေသကြီးမှ မူဆယ်သို့ လာရောက်အလုပ်လုပ်သည့် သူဖြစ်ကြောင်း ၊ ယနေ့ထိ ထိုပျောက်ဆုံးနေသည့် ကလေးကိုဆက်လက်ရှာနေကြောင်းလည်း သိရသည်။

“ အခုထိရှာနေသေးတယ်။ ဒီရွှေလီမြစ်က တခြား မြို့ကလာတဲ့ဧည့်သည်ဆိုရင် လူစားတယ်ဆိုတဲ့ ဓလေ့ရှိတယ်။ နောက် ဒေသခံတောင် မြစ်ရဲ့ ဘယ်နားမှာက နက်လဲဆိုတာ မသိကြဘူး” တော်ရွက်ဒေသခံ အမျိုးသား က ထပ်လောင်းပြောသည်။

ရွှေလီမြစ်ထဲတွင် သဲထုတ်လုပ်မှုရှိပြီး မြစ်ရေတိမ်နက် အခြေအနေကို မသိရှိကြသဖြင့် ရေဆင်းကူးခြင်း မပြုလုပ်သင့်ကာ မူးပြီးရေဆင်ဆော့ခြင်းလည်း မပြုလုပ်သင့်ကြောင်း မူဆယ်ဒေသခံများက ပြောသည်။