သျှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့နယ်ခွဲ မန်ပေါက်ကျေးရွာနေ စစ်ရှောင် (၂) ဦးသည် မိုင်းငေါ့မြို့ သျှမ်းစာပေယဥ်ကျေးမှု ကျောင်းသို့ စားနပ်ရိက္ခာ သွားသယ်ယူရင်း လမ်းတွင် မတော်တဆ ယာဉ်တိုက်မှု ဖြစ်ပွားသဖြင့် ဆေးကုသရန် အကူအညီလိုအပ်နေကြောင်း စုံစမ်းသိရှိရသည်။
စက်တင်ဘာ ၂၈ ရက် နံနက်ပိုင်းတွင် မန်ပေါက်ကျေးရွာမှ စစ်ရှောင် (၂) ဦးသည် မိုင်းငေါ့မြို့ သျှမ်းစာပေယဉ်ကျေးမှုကျောင်းသို့ တစ်လစာအတွက် စားနပ်ရိက္ခာများကို သွားရောက်သယ်ယူရင်း ကွန်ကောက်ကျေးရွာ လမ်းမကြီးပေါ်တွင် ဆိုင်ကယ်တစ်စီးဖြင့် တိုက်မိကာ စိုးရိမ်ရ ထိခိုက်ဒဏ်ရာရရှိခဲ့ပြီး လက်ရှိမှာ ဆေးကုသရန် အကူအညီ လိုအပ်နေကြောင်း စစ်ရှောင်ကူညီသူ ဒေသခံ တစ်ဦးက သျှမ်းသံတော်ဆင့်ကို ပြောသည်။
“မိုင်းငေါ့ သျှမ်းစာပေယဉ်ကျေးမှု ကျောင်းမှာ စစ်ရှောင်က စားနပ်ရိက္ခာ သွားသယ်ဖို့ လမ်းမှာ ဆိုင်ကယ်တစ်စီး နဲ့ တိုက်မိတာ။ အမျိုးသား တစ်ယောက်ကတော့ ဦးခေါင်းမှာ စိုးရိမ်ရတဲ့ ထိခိုက်မှုတော့ ရတယ်။ မနေ့က စစ်ရှောင်ကို ကျောက်မဲပြည်သူ့ဆေးရုံကို သွားပို့တော့ လျှပ်စစ်မီးက ပြတ်တော့ လူနာကိုပြန်ယူ လာရတယ်။ ပြီးမှ လားရှိုးဆေးရုံကို သွားပို့ရတာပေါ့ “ ဟု ၎င်းဒေသခံတစ်ဦးက ပြောသည်။
ထိခိုက်ဒဏ်ရာရရှိသည့် စစ်ရှောင်များမှာ အသက် (၄၂) နှစ်အရွယ်ရှိ အမျိုးသားတစ်ဦး နှင့် အသက် (၃၀) ကျော်ရှိ အမျိုးသမီးတစ်ဦး ဖြစ်ကြပြီး အမျိုးသားမှာ ဆေးဝါးကုသရန်အတွက် ငွေကြေးလိုအပ်နေကြောင်း စစ်ရှောင်ကူညီသူ ကော်မတီတစ်ဦးက ပြောသည်။
“လူနာကတော့ ထိခိုက်ဒဏ်ရာရပြီးတော့ ဆေးရုံကိုပို့ထားတယ်။ သူတို့အတွက် ငွေကြေး အကူအညီတော့ လိုအပ်နေတယ်။ ပြီးတော့လည်း စစ်ရှောင်တွေအတွက် စားနပ်ရိက္ခာတွေကော လိုအပ်နေတယ် “ ဟု ၎င်းကဆိုသည်။
ပြီးခဲ့သည့် စက်တင်ဘာ ၂၄ ရက်တွင် နောင်ချိုမြို့နယ် ဘန့်ကွေးကျေးရွာအနီးတွင်လည်း စစ်ကောင်စီ ကား နှင့် ရဲဝန်ထမ်းမိသားစု ကားတိုက်မိရာမှ ရဲမေတစ်ဦး နှင့် အမျိုးသားတစ်ဦး သေဆုံးသွားကြောင်း စုံစမ်းသိရှိရသည်။
Leave a Comments