ပင်လုံကတိကဝတ် အကောင်အထည်ဖော်မှု နှင့် အမျိုးသားတန်းတူရေး ဖော်ဆောင်ရေးအတွက် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP) တို့သည် အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် နှင့် တွေ့ဆုံစဥ်က ပြောဆိုခဲ့သည်။

အဆိုပါ ပြောဆိုမှုသည် စက်တင်ဘာ (၂၆) ရက်နေ့က စစ်ကောင်စီ ခေါင်းဆောင် နှင့် ဆွေးနွေးပွဲ ပြုလုပ်ခဲ့သည့် “ဝ” ပြည်သွေးစည်းညီညွတ်ရေးပါတီ (UWSA) ၊ အမျိုးသား ဒီမိုကရက်တစ် မဟာမိတ်တပ်မတော် (NDAA) မိုင်းလားအဖွဲ့ နှင့် ရှမ်းပြည်တိုးတက်ရေးပါတီ (SSPP) စသည့် အဖွဲ့ (၃) ဖွဲ့က ခေါင်းဆောင်များ နေပြည်တော်သို့ တွေ့ဆုံ ဆွေးနွေးချိန်တွင် ပြောဆိုခဲ့သည်။

ထိုဆွေးနွေးပွဲသည် UWSA မှ “ဝ” ပြည်နယ်ရရှိရေး၊ (NDAA) မှ မိုင်းလား ကိုယ်ပိုင်အုပ်ချုပ်ခွင့်ရရှိရေး နှင့် (SSPP) တပ်ဖွဲ့မှ အချက် (၉) ချက်ပါရှိသည့် ဆွေးနွေးချက်များထဲမှ ပင်လုံ ကတိကဝတ် အကောင်အထည်ဖော်မှု နှင့် အမျိုးသားတန်းတူရေးကို ဖော်ဆောင်နိုင်ဖို့အတွက် ဗမာပြည်နယ်ကိုဖွဲ့စည်းရေး စသည့် အချက်များကို စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် နှင့် တွေ့ဆုံစဥ် ဆွေးနွေးခဲ့သည်။

“SSPP အနေနဲ့ သျှမ်းမူ ခေါ် တောင်ကြီးမူကို စွဲစွဲမြဲမြဲဆုပ်ကိုင်ထားတယ်လို့ ဆိုရပါမယ်။ SSPP ရဲ့ တင်ပြမှုဟာ သျှမ်းလူမျိုးတမျိုးထဲအတွက်သက်သက် တောင်းဆိုမှုမဟုတ်ဘဲ တပြည်လုံးအတွက် တောင်းဆိုလိုက်တာ တပြည်လုံး အတိုင်းအတာဆောင်တဲ့ နိုင်ငံရေး ပြဿနာကို ဆွဲထုတ်လိုက်တာလို့ ပြောရပါမယ်။ ပြောရရင် SSPP က တိုင်းရင်းသားလူမျိုးများရဲ့ တန်းတူရေး၊ ကိုယ်ပိုင်ပြဌာန်းခွင့်နဲ့ ပတ်သက်ပြီး ခေါင်ကို ကိုင်လိုက်တယ်လို့ ပြောရပါမယ်”ဟု တိုင်းရင်းသားအရေး လေ့လာသုံးသပ်သူ ဦးမောင်မောင်စိုးက ၎င်း၏ လူမှုကွန်ယက် စာမျက်နှာမှာ ရေးသားထားသည်။

စက်တင်ဘာ (၂၇) ရက်က နေပြည်တော်မှာ ကျင်းပတဲ့ စစ်ကောင်စီ အစည်းအဝေးမှာ စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် မှ ဖက်ဒရယ် အခွင့် အရေးများ ပေးအပ်ရာမှာ ဖြစ်သင့်ဖြစ်ထိုက်သည့် ဖက်ဒရယ် အခွင့်အရေးများကို ပေးအပ်မှာဖြစ်ကြောင်း နှင့် ပြည်ပ ပရောဂများကြောင့် တိုင်းရင်းသားလက်နက်ကိုင် အဖွဲ့အစည်းများ အနေဖြင့် ဝါဒကွဲပြားနေကြောင်း ဗိုလ်ချုပ်မှူးကြီး မင်းအောင်က ပြောသည်။

တိုင်းရင်းသားလက်နက်ကိုင်အဖွဲ့များနှင့် ငြိမ်းချမ်းရေး ဆွေးနွေးဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က စတင်ဖိတ်ခေါ်ခဲ့တာဖြစ်ပြီး ပထမအကြိမ်အဖြစ် တိုင်းရင်းသား လက်နက်ကိုင်အဖွဲ့တချို့ နှင့် မေလမှ စတင်ပြီး တဖွဲ့ချင်းတွေ့ဆုံဆွေးနွေးခဲ့သည်။