သျှမ်းပြည်တောင်ပိုင်း ပင်းတယမြို့နယ်တွင် ပြစ်မှုကျူးလွန်ခြင်းမရှိသော PDF သင်တန်းဆင်း အလင်းဝင် ရောက်သူများအား မိဘအုပ်ထိန်းသူများထံ လွှဲပြောင်းပေးအပ်ပွဲ အခမ်းအနားကို ယမန်နေ့ စက်တင်ဘာ ၂၅ ရက်တွင် ကျင်းပခဲ့ကြောင်း စုံစမ်းသိရှိရသည်။
အဆိုပါ အခမ်းအနားမှာ စစ်ကောင်စီ လက်အောက်ခံ သက်ဆိုင်ရာ အရာရှိများက ပြုလုပ်ပြီး ပြည်သူကို ထင်ယောင်ထင်မှားအောင် သတင်းမှားတပ်ပြီး ဖြန့်ဝေနေကြောင်းဟု အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
“PDF တပ်ဖွဲ့ မရှိတော့လို့ အလင်းပြန်ဝင်ကြတယ်ဆိုတဲ့ ပုံစံမျိုးပေါ့။ အခုက သူတို့လုပ်ချင်သလို လုပ်နေပြီး သတင်းအမှားတွေ ဖြန့်နေတာ၊ အလင်းဝင်တယ်ဆိုတဲ့သူကလည်း သူတို့လူပဲဖြစ်နိုင်တယ် “ ဟု ၎င်းကဆိုသည်။
ပြီးခဲ့သည့် ဇွန်လ ၃၀ ရက်နေ့တွင် ရွာငံပြည်သူ့ကာကွယ်ရေး တပ်ဖွဲ့ (YPDF) နှင့် ချိုးဖြူပြောက်ကျား တပ်ဖွဲ့ (JPGF) တို့ပူးပေါင်းတပ်ဖွဲ့က ပင်းတယမြို့နယ်မှ တခြားမြို့နယ်သို့ ရွှေ့ပြောင်းခဲ့ရကြောင်း သိရသည်။
ထို့အပြင် စက်တင်ဘာလ ၂ ရက်နေ့တွင် စစ်ကောင်စီလက်အောက်ခံ ဌာနဆိုင်ရာများက ပင်းတယမြို့နယ် အတွင်းရှိ ကျေးရွာများတွင် တစ်ရွာထွက်တစ်ရွာဝင်ပြီး (၂၀၂၃) ခုနှစ် ရွေးကောက်ပွဲအတွက် စစ်ကောင်စီတပ်ဖွဲ့ ကို ထောက်ခံရန်အတွက် လိုက်လံဟောပြောခဲ့ကြောင်း သိရသည်။