သျှမ်းပြည်မြောက်ပိုင်း နမ့်ခမ်းမြို့မစျေးအတွင်း တိုင်းရင်းသားလက်နက်ကိုင် တပ်ဖွဲ့တစ်ဖွဲ့မှ ယနေ့ (စက်တင်ဘာ ၂၅)ရက် မွန်းတည့်ချိန် (၁၂)နာရီခန့် ရောက်လာပြီး ပစ်ခတ်မှု ဖြစ်ပွားခဲ့ကြောင်းစုံစမ်းသိရသည်။
ယနေ့ စက်တင်ဘာ (၂၅) ရက် မွန်းတည့်ချိန် (၁၂)နာရီခန့် နမ့်ခမ်းမြို့မစျေးထဲသို့ အမည်မသိလက်နက်ကိုင် တပ်ဖွဲ့တစ်ဖွဲ့မှ ဝင်ရောက်လာပြီး စျေးအတွင်း ပစ်ခတ်မှုဖြစ်ပွားခဲ့ပြီး မြို့မစျေးက စျေးသည်များ စိုးရိမ်မှု ဖြစ်ပွားနေကြောင်း သိရသည်။
“အရပ်ဝတ် နဲ့ လူ (၆)ယောက်ဝင်လာပြီး သေနတ်ကို မိုးပေါ်ပစ်ခတ်တဲ့အတွက် စျေးထဲက သူတွေအားလုံး အလန့်တကြားဖြစ်ကုန်ပြီး ရုတ်ရုတ်သဲသဲ ဖြစ်ကြကုန်တယ်။ ဆိုင်တွေလည်း အမြန်ပိတ်သိမ်းနေကြပြီ” ဟု နမ့်ခမ်းဒေသခံ အမျိုးသမီး တစ်ဦးပြောသည်။
ထိုမြို့မစျေးအတွင်း လာရောက်ပစ်ခတ်သည့်အဖွဲ့သည် မည်သည့် တိုင်းရင်းသားလက်နက်ကိုင် တပ်ဖွဲ့ဖြစ်သည်ကို မသိရှိရသေးပေ။
“စျေးသည်တွေပြောသံအရတော့ (TNLA) တပ်သားတွေ အခွန်ကောက်ဖို့ လိပ်စာကဒ်ပေးရင်းစျေးသည်တွေလည်း ပုံရိုက်တဲ့အတွက် စျေးသည်တွေက လန့်ပြီး ရှုပ်ယှက်ခတ်သွားတော့ သူတို့က စိတ်တိုပြီး သေနတ်ကို မိုးပေါ် အချက် (၂၀) နီးပါးလောက် ပစ်လိုက်တယ်”ဟု နမ့်ခမ်းမြို့မစျေးထဲ စျေးဝယ်သူ တစ်ဦး က သျှမ်းသံတော်ဆင့် ကိုပြောသည်။
ပြီးခဲ့သည့် ဇွန်လ (၆) ရက်တွင်လည်း နမ့်ခမ်းမြို့မစျေးအတွင်း တအောင်း (ပလောင်) အမျိုးသားလွတ်မြောက်ရေးတပ်မတော် (TNLA) စစ်သားများ မြို့ထဲ ဝင်လာသည့် သတင်းကြောင့် စျေးသည်များ ထိတ်လန့်ကာ ဆိုင်ခန်းများ အလန့်တကြား ပိတ်သိမ်းခဲ့ရသည့် ဖြစ်စဥ်များလည်း ရှိခဲ့ဖူးသည်။
အလားတူ နမ့်းခမ်းမြို့မစျေးအတွင်း တိုင်းရင်းသားလက်နက်ကိုင်တပ်ဖွဲ့များ အခွန်လာရောက်ကောက်ယူမှု ပြုလုပ်ရင်း ပစ်ခတ်မှုဖြစ်ပွားပြီး အခွန်လာကောက်သည့် သူများလည်း သေဆုံးမှု ဖြစ်ပွားခဲ့သည့် ဖြစ်စဥ်များလည်း ရှိခဲ့ဖူးသည်။
Leave a Comments