သျှမ်းပြည်မြောက်ပိုင်း မူဆယ်မြို့တွင် နေထိုင်သည့် ကားပွဲစားလုပ်ဆောင်သည့် အမျိုးသမီးတစ်ဦးကို ကားလုပြီး မုဒိမ်းကျင့် သတ်ဖြတ်ခဲ့သူ ၄ ဦးကို ယမန်နေ့ (စက်တင်ဘာ ၂၃) ရက် နံနက်ပိုင်းတွင် သေဒဏ် နှင့် ထောင်ဒဏ် ချမှတ်လိုက်ကြောင်း စုံစမ်းသိရသည်။

လွန်ခဲ့သည့် မတ် ၁၂ ရက် ညနေပိုင်းတွင် အမျိုးသားတစ်ဦးက အသက် ၂၁ နှစ်အရွယ် အမျိုးသမီးထံ ကားကြည့်မည်ဟုဆိုပြီး ဖုန်းဆက်ခေါ်ရာမှ အမျိုးသမီးသည် နေအိမ်မှ ကားမောင်းသွားပြီး မူဆယ်မြို့ စွမ်စော်ရပ်ကွက်ရှိ ကချင်သင်္ချိုင်းအတွင်းတွင် အဆိုပါ အမျိုးသမီးငယ်တစ်ဦးကို အုပ်စုလိုက် မုဒိမ်းကျင့်ကာ သတ်ဖြတ်လိုက်ပြီး ကားကိုပါ လုယူသွားခဲ့ခြင်း ဖြစ်သည်။

ထို မုဒိမ်းမှုကျူးလွန်ပြီး သတ်ဖြတ်ခဲ့သည့် လူငယ် ၄ ဦး ဖြစ်သည့် ချောက်ရို့ ၊ မောင်ထွေး (ခ) အားရှန်နှင့် အားရှင် (ခ) မြင့်ဦး တို့ကို ရာဇာသတ်ကြီး ပုဒ်မ ၃၉၂ အတွက် အလုပ်ကြမ်း နှင့် ထောင်ဒဏ် ၁၀ နှစ်၊ ရာဇာသတ်ကြီး ပုဒ်မ ၃၇၆ (၁) အရ ထောင်ဒဏ် ၂၀ နှစ် နှင့် ရာဇာသတ်ကြီး ပုဒ်မ ၃၀၂ (ဂ) ၃၄ အရ သေဒဏ် ဖြင့် သီးခြားကျခံစေပြီး၊ အားချန် (ခ) သိန်းဦး ကို ရာဇာသတ်ကြီး ပုဒ်မ ၃၉၂/၁၁၄ အရ ပြစ်မှုထင်ရှားသဖြင့် အလုပ်ကြမ်းဖြင့် ထောင်ဒဏ် ၁၀ နှစ် ကို မူဆယ်ခရိုင် တရားရုံးမှ အမိန့်ချလိုက်သည်။

“အသက် ၂၁ နှစ် မိန်းကလေးကို ကားလုပြီး မုဒိမ်းကျင့်တဲ့လူငယ် ၃ ဦးကိုသေဒဏ်နဲ့ ကျန် တစ်ဦးကိုတော့ အလုပ်ကြမ်းနဲ့ ထောင်ဒဏ် ၁၀ နှစ် ချလိုက်တယ်။ ဒီလိုချတဲ့အပေါ်တော့ လက်ခံပါတယ်။ နောက်နောင် ဒီလိုမဖြစ်အောင်တော့ ပြင်းထန်တဲ့ အမှုတွေလုပ်ပြမှ ရမယ်” ဟု မူဆယ်မြို့မှ ၎င်းအမျိုးသမီးငယ်၏ မိသားစု နှင့် နီးစပ်သူ တစ်ဦးက သျှမ်းသံတော်ဆင့် ကို ပြောသည်။

မူဆယ်မြို့သည် တရုတ်နယ်စပ်မြို့တမြို့ဖြစ်သည့်အလျောက် လက်နက်ကိုင်ပေါများကာ လူသတ်မှု မကြာခဏ ဖြစ်ပွားပြီး ဓားပြတိုက်မှုလည်း နေ့စဥ်နှင့်အမျှ ကြားရပြီး သက်ဆိုင်ရာမှ တာဝန်ယူဖြေရှင်းဖော်ထုတ်မှု အားနည်း နေသေးကြောင်း မူဆယ်ဒေသခံများ ပြောပြချက်အရ သိရသည်။