သျှမ်းပြည် အရှေ့ပိုင်း “ဝ” ညီညွတ်ရေးတပ်မတော် ( UWSA) ထိန်းချုပ်နယ်မြေ အဝင်၊အထွက် စစ်ဆေးရေးဂိတ် တစ်ခုဖြစ်သည့် ကောင်းစန်း (မိုင်းလွေ) ဂိတ်ကို ကိုဗစ် – ၁၉ ထပ်မံဖြစ်ပွားမှုကြောင့် ခေတ္တပိတ်ထားကြောင်း စုံစမ်းသိရသည်။
အဆိုပါ “UWSA” ထိန်းချုပ်နယ်မြေ ကောင်းစန်း(မိုင်းလွေ) ဂိတ် ကို စက်တင်ဘာ ၂၂ ရက်မှစပြီး ခေတ္တပိတ်လိုက်ကြောင်း ဒေသခံ ကားသမားတစ်ဦးက ပြောသည်။
“လောဆယ်တော့ ဘယ်နှရက်ပိတ်မယ်ဆိုတာ မသိသေးဘူး။ ကိုဗစ် ထပ်ဖြစ်လို့ဆိုတဲ့ အကြောင်းပြချက်နဲ့ ပိတ်လိုက်တာပဲ။ ကျနော်လည်း သေချာတော့မသိဘူး” ဟု ကားသမား တစ်ဦးက ဆိုသည်။
ထို့အပြင် လတ်တလောမှ ကိုဗစ် – ၁၉ ကူးစက်မှုနှုန်း မြင့်တက်လာသည့်အတွက် “ဝ” ထိန်းချုပ်သည့် ဒေသ ဝင်၊ထွက်ပါက ကွာရန်တင်းစင်တာ (၇) ရက်ဝင်ရမည်ဖြစ်ပြီး၊ ကွာရန်တင်းဝင်ရောက်လိုပါက မိမိ စားစရိတ်ဖြင့် (၇)ရက် ဝင်ရမည်ဟုလည်း “ဝ” ဒေသ ထုတ်ပြန်ချက်အရသိရသည်။
UWSA ထိန်းချုပ်သည့် ဒေသသို့ ဝင်ရောက်လာပါက ကွာရန်တင်းစင်တာ ကို တစ်ရက်လျှင် တရုတ်ယွမ်ငွေ (၁၃၀) ၊ မြန်မာကျပ်ငွေ ကာလပေါက်စျေး (၅သောင်း) နီးပါး၊ ဟိုတယ်ကွာရန်တင်း ဝင်ပါက တရက်လျှင် တရုတ်ယွမ်ငွေ (၁၈၀) မြန်မာငွေကျပ်ငွေ ကာလပေါက်စျေး (၆သောင်း) ကျော် ကျသင့်ကြောင်း သိရသည်။
လွန်ခဲ့သည့် သြဂုတ်လတွင် “ဝ” ဒေသ အဝင်၊ အထွက် ဂိတ်အားလုံးပိတ်ထားရန် စစ်ကောင်စီဘက်မှလည်း ညွှန်ကြားထားခဲ့ကြောင်းသိရသည်။
Leave a Comments