သျှမ်းပြည်တောင်ပိုင်း တောင်ကြီးခရိုင် ဆီဆိုင်မြို့နယ် တဘက်ကျေးရွာအုပ်စု နောင်ပရင်ကျေးရွာတွင် လယ်မြေသိမ်းဆည်း ထားခံရသော နယ်မြေပိုင်ရှင်များ ခြိမ်းခြောက်ခံနေရကြောင်း စုံစမ်းသိရှိရသည်။
ပအိုဝ်းပြည်သူ့စစ် PNO တပ်ဖွဲ့က ပြည်သူပိုင်လယ်မြေကို ယခုနှစ် ဇူလိုင်လ ပထမပတ်တွင် သိမ်းဆည်းကာ ပဲ၊ ပြောင်း စိုက်ခင်းများ ဖျက်ဆီးခဲ့ပြီး ပိုင်ရှင်ဖြစ်သူကိုလည်း ထပ်မံခြိမ်းခြောက်မှု ပေးနေကြောင်း ဒေသခံတစ်ဦးက သျှမ်းသံတော်ဆင့် ကို ပြောသည်။
“နယ်မြေကို သိမ်းထားပြီးတော့ စိုက်ခင်းတွေ အကုန်လည်း ဖျက်ဆီးခဲ့တယ်။ ဟိုတစ်ခေါက်က စိုက်ခင်း သွားကြည့်တော့ တုတ်၊ ဓားတွေနဲ့ ရိုက်မယ်။ သတ်ပစ်မယ်ဆိုပြီး ခြိမ်းခြောက်တာ။ ပအိုဝ်းပြည်သူ့စစ် PNO/PNA လက်အောက်ခံ အရပ်သားတွေက ခြိမ်းခြောက်ခဲ့တာ။ ပြီးတော့ နယ်မြေကို စစ်ကောင်စီအပ်လိုက် ပြီလို့ပြောတယ်“ ဟု ၎င်း ဒေသခံတစ်ဦးက ပြောသည်။
ဇူလိုင်လထဲတွင် ပအိုဝ်းပြည်သူ့စစ် PNO တပ်ဖွဲ့က နောင်ပရင်ကျေးရွာရှိ ပြည်သူပိုင် နယ်မြေဧကပေါင်း ၁၃ ဧကကို အတင်းအဓမ္မ သိမ်းယူခဲ့ပြီး သြဂုတ် (၂၄) ရက်တွင် စပါးစိုက်ခင်းမှအပ စိုက်ခင်းများ အားလုံးကို ဖျက်စီးခဲ့ လိုက်ကြောင်းဆိုသည်။
အလားတူ ပြည်သူ့စစ် PNO တပ်ဖွဲ့က နယ်မြေကို သိမ်းယူခဲ့ပြီးနောက် စပါးစိုက်ခင်းများ သွားရောက် ကြည့်ရှုရန်အတွက် ဒေသခံများက ကြောက်လန့်စိုးရိမ်နေကြောင်း သိရသည်။
“သူတို့ သိမ်းထားတဲ့ နယ်မြေထဲမှာ စပါးစိုက်ခင်းတော့ မဖျက်ဆီးတော့ဘူး။ ဘယ်ချိန်မှာ လာရောက်ဖျက်ဆီးမယ်ဆိုတာ မပြောတတ်ဘူး။ အခုဘယ်သူမှ လယ်သွားမကြည့်ရဲတော့ဘူး။ သူတို့ကို လည်းကြောက်နေရတယ်“ ဟု ၎င်းအထက်ပုဂ္ဂိုလ်က ဆိုသည်။
ထို့အပြင် ရပ်စောက်မြို့နယ် ပအိုဝ်းပြည်သူ့စစ် PNO ထိန်းချုပ်သော ပင်ဖြစ်ကျေးရွာ၊ မြေမဲကျေးရွာ စသည့် ကျေးရွာဒေသတွင် ပြည်သူ့စစ် PNO က မူးယစ်ဆေးဝါးအကြောင်းပြပြီး ပိုက်ဆံတောင်းခံမှုရှိနေကြောင်း ရပ်စောက်ဒေသခံတစ်ဦးက သျှမ်းသံတော်ဆင့်ကို ပြောသည်။
“အရင်နှစ်ကလည်း ပြည်သူလယ်မြေသိမ်းပြီးတော့ ပြန်ငှားစားခိုင်းတယ်။ ပြီးတော့ မူးယစ်ဆေးဝါး အကြောင်းပြပြီး ပိုက်ဆံတောင်းတယ်။ သူတို့တောင်းသလောက် ပေးရမယ်လို့ ခြိမ်းခြောက်တယ်။ စစ်သားသစ် စုဆောင်းဖို့အတွက်လည်း ဖိအားပေးတယ်“ ဟု ၎င်း အမျိုးသားတစ်ဦးက ပြောသည်။
စစ်ကောင်စီ လက်အောက်ခံ ပအိုဝ်းအမျိုးသားအဖွဲ့ချုပ် (PNO/PNA) သည် ဆီဆိုင်မြို့နယ်၊ ပင်လောင်းမြို့နယ် နှင့် ဟိုပုံးမြို့နယ်အထိ တစ်အိမ်ကို ငွေ ၃ သောင်းကျပ် နှင့် ဆန် (၁) ပြည်ကို ကောက်ယူခဲ့ပြီး အသက် (၁၈) နှစ်မှ (၃၅) နှစ်အရွယ်လူငယ်များကို စစ်သင်တန်းပေးခဲ့ကြောင်း သိရသည်။
Leave a Comments