သျှမ်းပြည်တောင်ပိုင်း တောင်ကြီးမြို့နယ် ပုံးအင်းဒေသ ဟိုတပ်ကျေးရွာတွင် သျှမ်းရိုးရာ ဓလေ့ထုံးစံလှေလှော် ပြိုင်ပွဲကို ပြန်လည် ပြုလုပ်ခဲ့ကြောင်း စုံစမ်းသိရှိရသည်။
ပုံးအင်းဒေသ လှေလှော်ပြိုင်ပွဲကို စက်တင်ဘာ ၁၈ရက်နှင့် စက်တင်ဘာ ၁၉ရက် တွင် ၂ရက်သာ ကျင်းပခဲ့သည်။
သျှမ်းရိုးရာလှေလှော်ပြိုင်ပွဲ ပြုလုပ်ရခြင်းမှာ ခေတ်အဆက်ဆက်မှ ရိုးရာဓလေ့ ထုံးစံကို ပမပျောက်ရန်၊ မျိုးဆက်လူငယ်များအတွက် လှေလှော်ပြိုင်ဆိုင်တတ်ရန်၊ ရိုးရာဓလေ့ ထုံးစံကို ထိန်းသိမ်းတတ်ရန် နှင့် ပုံးအင်းဒေသ ကျေးရွာတစ်ရွာနှင့်တစ်ရွာ ချစ်ကြည်ရေး ကောင်းမွန်ရန် အတွက် ဆောင်ရွက်ခြင်းဖြစ်ကြောင်း သိရသည်။
“ အဓိကတော့ ပုံးအင်းမှာရှိဖူးတဲ့ သျှမ်းရိုးရာလှေလှော်ပြိုင်ပွဲရဲ့ ထုံးစံကို မပပျောက်အောင် နှစ်စဉ်နှစ်တိုင်း ပြုလုပ်ခဲ့တယ်။ (၂၀၀၈)ခုနှစ်ကနေ (၂၀၁၄) ခုနှစ်ထိ အကြောင်းအမျိုးမျိုးကြောင့် (၆) နှစ်လောက် ရပ်ဆိုင်းခဲ့ ရတယ်။ အဲ့ဒီလိုမျိုး ရပ်ဆိုင်းရတဲ့အတွက် ပုံးအင်းမှာရှိဖူးတဲ့သျှမ်းရိုးရာ လှေလှော်ပြိုင်ပွဲ ပမပျောက်အောင်၊ ထိန်းသိမ်းပြုလုပ်ရတယ် “ ဟု ဦးဇင်းက မိန့်ကြားသည်။
အလားတူ ယခုနှစ်တွင် အလှူရှင်ဒါနများက မြန်မာကျပ်ငွေ သိန်း (၃၀)လှူသန်းလာခဲ့ပြီး ဟိုတပ်ကျေးရွာမှ ဦးဇင်းတစ်ပါးက ဦးဆောင်ကာ ပုံးအင်း ပြည်သူများနှင့် သျှမ်းရိုးရာ ဓလေ့ထုံးစံလှေလှော် ပြိုင်ပွဲကို ပြုလုပ်ကျင်းပ နိုင်ခဲ့ကြောင်း လှေလှော်ပြိုင်ပွဲထဲမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ အလှူရှင်ဒါနတစ်ယောက်ကနေပြီးတော့ ပိုက်ဆံသိန်း (၃၀) လှူလာတယ်။ ပုံးအင်းမှာ နှစ်စဉ်နှစ်တိုင်း လှေလှော် ပြိုင်ပွဲကို ပြုလုပ်ဖို့အတွက်တော့ မလွယ်ဘူး။ ပိုက်ဆံအများကြီးတော့ ကုန်ပါတယ်။ ကျနော်တို့ ဟိုတပ် ကျေးရွာ ဦးဇင်းတစ်ပါး ဦးဆောင်ပြီး ပုံးအင်းထဲကပြည်သူများ စုပေါင်းလုပ်နိုင်ခဲ့လို အခုလိုရိုးရာပွဲကို ကျင်းပနိုင် ခဲ့တယ်။ ပွဲလာကြည့်ရှူ့သူတွေလည်း အရမ်းများတယ် “ လို့ တာဝန်ရှိသူတစ်ဦးက ပြောသည်။
ပုံးအင်းဒေသရိုးရာ လှော်လျော်ပြိုင်ပွဲ ပုံးအင်းဒေသမှ ကျေးရွာပေါင်း (၆၄) ရွာကပါဝင်ခဲ့ပြီး အင်းလေးဒေသမှ လှေလှော်ပြိုင်ဆိုင်သူ အဖွဲ့(၁) ဖွဲ့နှင့် အမျိုးသား (၆) ယောက်လှေတစ်စီး ၊ အမျိုးသား (၄) ယောက်လှေတစ်စီး နှင့် အမျိုးသမီး (၅) ယောက် လှေတစ်စီးဟူပြီး လှေလှော်ပြိုင်ခဲ့သည်။
ထို့အပြင် ပုံးအင်းလူငယ်များ ပုံးအင်းဒေသ သျှမ်းရိုးရာ ဓလေ့ထုံးစံလှေလှော်ပြိုင်ပွဲကို ထုံးစံအမွေအနှစ် အနေဖြင့် မပပျောက်သွားအောင် ထိန်းသိမ်းကြရန်နှင့် လာမည့်နှစ်တိုင်းတွင်လည်း ထပ်မံပြုလုပ်မည်ဖြစ် ကြောင်းဆိုသည်။
Leave a Comments