ရုရှား ရူဘယ်ငွေ နှင့် မြန်မာကျပ်ငွေ ကို တိုက်ရိုက် အသုံးပြုနိုင်ရေး အတွက် စစ်ကောင်စီဘက်က ခြေလှမ်းနေကြောင်းသိရသည်။

စီးပွားရေး နှင့် ကုန်သွယ်မှုဆိုင်ရာ ဆက်စပ်လုပ်ငန်းများတွင် ရူဘယ်ငွေ နှင့် ကျပ်ငွေ တိုက်ရိုက်ပေးချေရန်လုပ်ဆောင်ကြောင်း၊ ရုရှားငွေ ပေးချေမှုစနစ်သုံးကဒ် MIR ကို ပြည်တွင်း၌ အသုံးပြုနိုင်ရန်အတွက် ခြေလှမ်းနေကြောင်း စစ်ကောင်စီ ပြောခွင့်ရပုဂ္ဂိုလ် က ပြောကြားခဲ့သည်။

ပြီးခဲ့သည့် စက်တင်ဘာ ပထမပတ်တွင် စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ရုရှားနိုင်ငံက ကျင်းပပြုလုပ်သည့် (၇) ကြိမြောက် အရှေ့ဖျား စီးပွားရေး ဖိုရမ်ကို တက်ရောက်ခဲ့သည်။

စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် ၏ ရုရှားခရီးစဥ်တွင် ရုရှားသမ္မတ နှင့် တွေ့ဆုံ ဆွေးနွေးမှု ရခဲ့ပြီး ဆွေးနွေးမှုမှာ မြန်မာ့ကုန်သွယ်ရေး လုပ်ငန်းတွင် ရုရှားငွေ ရူဘယ်၊ အိန္ဒိယ ရူဘီ နှင့် တရုတ်ယွမ် တို့ကို တိုက်ရိုက် ပေးချေနိုင်ရန် ဆွေးနွေးခဲ့ကြသည်။

မြန်မာနိုင်ငံသည် ရုရှားနိုင်ငံထံ လောင်စာဆီများကို စတင်ဝယ်ယူနေပြီး ရုရှားငွေကြေး ရူဘယ် နှင့် ပေးချေရန် အသင့်ရှိကြောင်း ဗိုလ်ချုပ်မှူးကြီး မင်းအောင်လှိုင် က ပြောဆိုထားသည်ကို ရုရှားနိုင်ငံထုတ် (RIA) သတင်းတွင်ဖော်ပြထားကြောင်း VOA က ရေးသားဖော်ပြထားသည်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံသည် ငွေးကြေးဖောင်းပွမှု ကြုံတွေ့ရခြင်း၊ စက်သုံးဆီ စျေးနှုန်းမြင့်တက်လာခြင်း၊ ကုန်စျေးနှုန်းများ အဆမတန် မြင့်တက်ခြင်း၊ ရွှေစျေး မြင့်တက်လာခြင်း နှင့် အမေရိကန် တစ်ဒေါ်လာလျှင် (၂၅၀၀) ကျပ်အထိ မြင့်တက်လာခဲ့သည်။