သျှမ်းပြည်မြောက်ပိုင်း ကျောက်မဲမြို့နယ်တွင် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) မှ ကျောက်မဲမြို့ အခွန်လွတ်ဈေးဘက်ရှိ လက်ဘက်ရည်ဆိုင်အတွင်း လူဝင်ဖမ်းဆီးမှု ပြုလုပ်ပြီးနောက် စစ်ကောင်စီမှ ညမထွက်ရအမိန့် ထုတ်ပြန်လာကြောင်း သတင်းသိရသည်။

ယမန်နေ့ (စက်တင်ဘာ ၁၉) ရက် ည ၇ နာရီဝန်းကျင်တွင် စစ်ကောင်စီ မှ အင်အားအပြည့်ရှိသည့် စစ်ကား ၈ စီး ဝန်းကျင်သည် ကျောက်မဲမြို့တော်ခန်းမသို့ရောက်ပြီး ရပ်ရွာအုပ်ချုပ်ရေးမှူးများမှ တစ်ဆင့် ပြည်သူများ သိရှိရခြင်းဖြစ်ကြောင်း ကျောက်မဲမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မနေ့ညက ၇ နာရီလောက်မှာ မြို့တော်ခန်းမအနီးမှာ စစ်ကား ၈ စီးလောက်က စစ်သားတွေ အပြည့်နဲ့ ရောက်လာတယ်။ အဲ့ကြောင့် ကျမတို့က ထူးဆန်းတယ်လို့ တွေးပြီးမကြာဘူး ရာအိမ်မှူး နဲ့ အုပ်မှူးတွေဆီကနေ ည ၇ နာရီနောက်ပိုင်း အပြင် မထွက်ရဘူးလို့ အကြောင်းကြားလာတယ်။ စာမထုတ်ဘူး လိုက်လည်း မကြေညာဘူး” ဟု ၎င်း အမျိုးသမီးက ပြောသည်။

လက်ရှိ ကျောက်မဲမြို့နယ်အတွင်း ည ၇ နာရီနောက်ပိုင်း အပြင်မထွက်ရဟု ထုတ်ပြန်တားမြစ်လာခြင်းသည် ပြီးခဲ့သည့် စက်တင်ဘာလ ၁၈ ရက်နေ့ ညတွင် TNLA တပ်ဖွဲ့မှ အခွန်လွတ်ဈေးဘက်ရှိ လက်ဘက်ရည်ဆိုင်အတွင်း လူဝင်ဖမ်းခြင်းနှင့် သက်ဆိုင်နိုင်ကြောင်းလည်း ဒေသခံများက ပြောသည်။

“အဲ့လက်ဘက်ရည်ဆိုင်အတွင်းကို ဝင်ဖမ်းတဲ့အချိန်က ည ၈ နာရီလောက်ပဲ ရှိအုံးမယ်။ တပ်သားသစ် စုဆောင်းတဲ့ စာရင်းထဲ ပါတဲ့သူတွေကို ဝင်ဖမ်းတာတဲ့။ စာရင်းမပါတဲ့ သူလည်း ဖမ်းသွားတဲ့အထဲပါတော့ မဆိုင်တဲ့သူတွေကို မနေ့က (စက်တင်ဘာလ ၁၉) ရက် မွန်းလွဲပိုင်းမှာ ပြန်လွတ်ပေးတယ်လို့ ကြားတယ်။ အဲ့ဒါပြီး ညရောက်တော့ ၇ နာရီနောက်ပိုင်း ည မထွက်ရ အမိန့် ထွက်လာတာပဲ” ဟုအထက်ပါ အမျိုးသမီးက ဆက်ပြောသည်။

ယင်းကဲ့သို့ ညမထွက်ရ အမိန့်ထွက်ပေါ်လာခြင်းနှင့် ပတ်သက်ပြီး ဒေသခံပြည်သူများ အနေဖြင့် ဝမ်းစာရှာဖွေ စားသောက်ရေးအတွက် ပိုမိုခက်ခဲလာနိုင်ကြောင်း နှင့် သူခိုးဓါးပြများ ပိုမိုများပြားလာမည်ကို စိုးရိမ်ရကြောင်းလည်း ဒေသခံများက ပြောသည်။

“တချို့က ညဈေးဆိုင်လေးဖွင့်ပြီး ဝမ်းစာအတွက် လုပ်ရတာရှိတယ်။ အခုလို လုပ်ရင် သူတို့အတွက် ခက်ခဲသွားမှာပေါ့။ နောက်တစ်ခုက သူခိုးတွေက လူခြေတိတ်ချိန် လှုပ်ရှားတာများတာလေ။ အခုလို ၇ နာရီနောက်ပိုင်း လမ်းပေါ် လူမရှိတော့ရင် သူခိုးတွေ ထင်သလို လှုပ်ရှားလို့ ရသွားမှာပေါ့” ဟု ကျောက်မဲမြို့နယ်မှ အသက် ၅၀ ဝန်းကျင် အမျိုးသားတစ်ဦး ကလည်း ပြောသည်။

ကျောက်မဲမြို့သည် စစ်တပ်မှ နိုင်ငံတော် အာဏာသိမ်းပြီးနောက် လောင်းကစားဝိုင်းများ ပေါများစွာ ပေါ်ထွက်လာပြီး သက်ဆိုင်ရာ တာဝန်ရှိသူများလည်း ဖြေရှင်းနှိမ်နင်းခြင်းမရှိကြောင်း ဒေသခံများက ပြောသည်။

ကျောက်မဲမြို့သည် မြောက်ပိုင်းမဟာမိတ်တပ်များဖြစ်ကြသော ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၊ ကချင်လွတ်မြောက်ရေးတပ်မတော် (KIA) ၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီ တပ်ဖွဲ့ လှုပ်ရှားသည့် နယ်မြေဖြစ်ကြောင်း သိရသည်။