သျှမ်းပြည်မြောက်ပိုင်း ကျောက်မဲမြို့နယ် တအာင်း (ပလောင်) အမျိုးသား လွတ်မြောက်ရေး တပ်မတော်တို့မှ တပ်သားသစ်အတွက် ဖမ်းဆီးမှုများကြောင့် ဒေသခံ လူငယ်များက ထွက်ပြေးတိမ်းရှောင်နေရကြောင်း သတင်းသိရသည်။

ပြီးခဲ့သည့် စက်တင်ဘာလ ၁၅ ရက် ည ၈ နာရီဝန်းကျင်တွင် တောင်ပေါ် ကျေးရွာများမှ မြို့အနီး ၂ မိုင်ကုန်း တွင် လာရောက်နေထိုင်သည့် ၈ တန်းကျောင်းသား တစ်ဦးကို TNLA တပ်ဖွဲ့မှ ဖမ်းဆီးသွားခဲ့ကြောင်း ဒေသခံများက သျှမ်းသံတော်ဆင့် ကိုပြောသည်။

“သူတို့က အစပိုင်းမှာ တောင်ပေါ်ရွာမှာ နေကြတာပေါ့၊ သူတို့သား ကျောင်းတက်ဖို့အတွက်ဆိုပြီး ၂ မိုင်ကုန်းမှာ အိမ်ငှားပြီးနေကြတာ။ ကြာသပတေးနေ့ (စက်တင်ဘာလ ၁၅ ရက်) ည ၈ နာရီလောက်မှာ TNLA တွေက လာဖမ်းသွားတယ်။ တပ်သားသစ် စာရင်းထဲပါလို့တဲ့၊ အခုဆို မြို့ထဲ ရပ်ကွက်ထဲမှာ ဘာလူငယ်မှ မကျန်သလောက် ဖြစ်နေပြီ” ဟု ကျောက်မဲမြို့မှ အမည်မဖော်လိုသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ဖမ်းဆီးခံရသည့် အဆိုပါ ကျောင်းသားသည် အခြေခံပညာမူလွန်ကျောင်းအမှတ် (၃) တွင် ပညာသင်ယူနေသည့် ကျောင်းသားဖြစ်သည့်အတွက် လက်ရှိတွင် ဆရာ/မများနှင့် မိဘများက ပြန်လွတ်ပေးရန် သက်ဆိုင်ရာများထံသို့ တောင်းဆိုထားကြောင်းလည်း သိရသည်။

ယခု ရက်ပိုင်းအတွင်းတွင် ကျောက်မဲကြီးကျေးရွာအုပ်စု၊ အမှတ် ၈ ရပ်ကွက် နှင့် အမှတ် ၉ ရပ်ကွက် (တောင်နောက်) တို့တွင် TNLA တပ်ဖွဲ့၏ စစ်သားသစ်အကြောင်းပြ ဖမ်းဆီးမှုများ ညတိုင်းနီးပါး ရှိနေသည့်အတွက် လူငယ်လူရွယ်များက နိုင်ငံခြားသို့ ထွက်ပြေးတိမ်းရှောင်နေရကြောင်းလည်း ဒေသခံများက ပြောသည်။

“တအာင်း (ပလောင်) လူငယ်တွေ သိပ်မရှိတော့ဘူး၊ နိုင်ငံခြားထွက်တဲ့သူကထွက်၊ တခြားနေရာသွားတိမ်းရှာင်တဲ့ သူကသွားနဲ့ ရပ်ရွာထဲမှာ အဖိုးအရွယ်တွေပဲကျန်တယ်၊ ဒါတောင် အသက် ၇၀ ကျော် အဖိုးလည်း သူတို့ (TNLA) က ဖမ်းသွားသေးတယ်၊ သူ့သားက ရှောင်တိမ်းနေလို့ဆိုပြီး ရိုက်နက် နှိပ်စက်ပြီးမှ ပြန်လွတ်ပေးတာ၊ ၂ ရက်ကြာ တော့ ဆုံးသွားတယ်” ဟု ကျောက်မဲမြို့ ဒေသခံ အမျိုးသားတစ်ဦးက ပြောသည်။

သေဆုံးသူ အသက် ၇၀ အဖိုးသည် သားဖြစ်သူကို TNLA တပ်ဖွဲ့မှ ဖမ်းရန်လာစဥ်တွင် မတွေ့သဖြင့် ၎င်းကို ၃ ရက် ဖမ်းဆီးခံရပြီး ခန္ဓာကိုယ်အနှံ့ ညိုမဲဒဏ်ရာနှင့် အတွင်းကြေ ဒဏ်ရာတို့ကြောင့် ပြန်လွတ်လာပြီး ၂ ရက် အကြာ ဆေးရုံတွင် ကုသမှုခံယူစဥ် သေဆုံးသွားခဲ့ရကြောင်း ၎င်းက ပြောသည်။

ယင်းကဲ့သို့ ဖြစ်စဥ်ကိစ္စရပ်များနှင့် ပတ်သက်ပြီး အသေးစိတ် မသိရှိရသေးကြောင်း ကျောက်မဲမြို့နယ်မှ TNLA တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“အသေးစိတ်ကို ကျနော်တို့ ပြောလို့ မရသေးဘူး၊ ဆက်လက်စုံစမ်းဖို့ လိုသေးတယ်၊ တပ်သားသစ်ကောက်တာ တော့ မူဝါဒ ရှိတဲ့အတိုင်းပဲ လုပ်ဆောင်ကြပါတယ်၊ ကျန်တာတော့ မသိရဘူး” ဟု အထက်ပါ တာဝန်ရှိသူက ပြောသည်။

ကျောက်မဲမြို့သည် မြောက်ပိုင်းမဟာမိတ်တပ်များဖြစ်ကြသော ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၊ ကချင်လွတ်မြောက်ရေးတပ်မတော် (KIA) ၊ တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) နှင့် စစ်ကောင်စီ တပ်ဖွဲ့ လှုပ်ရှားသည့် နယ်မြေဖြစ်ကြောင်း သိရသည်။